கிருஷ்ணகிரியில் வேகமாக வந்த லாரி.. அப்பளமாக நொறுங்கிய பைக்.. 2 ஆசிரியைகள் உள்பட மூவர் பரிதாப பலி!
Krishnagiri Accident 3 Dies : கிருஷ்ணகிரி மாவட்டத்தில் இரு சக்கர வாகனம் மீது கனரக லாரி மோதியதில் 2 தனியார் பள்ளி ஆசிரியைகள் மற்றும் ஒரு மாணவன் பரிதாபமாக உயிரிழந்தார். இது தொடர்பாக வேப்பனஹள்ளி போலீசார் விசாரித்து வருகின்றனர் .
கிருஷ்ணகிரி மாவட்டம், மாதேப்பள்ளி அருகே தனியார் பள்ளி செயல்பட்டு வருகிறது. இந்தப் பள்ளியில், அதே பகுதிகளை சேர்ந்த சுதா ராணி மற்றும் முஸ்கான் ஆகியோர் ஆசிரியர்களாக பணிபுரிந்து வந்தனர். இந்த பள்ளியில், ஆசிரியர் முஸ்கானின் 7 வயது மகன் பர்கான் பயின்று வந்ததாக கூறப்படுகிறது. இந்த நிலையில், வழக்கம்போல இவர்கள் இன்று புதன்கிழமை காலை பள்ளிக்கு சென்றனர். மாலையில், பள்ளி முடிந்து, ஆசிரியைகள் சுதா ராணி, முஸ்கான் மற்றும் அவரது மகன் பர்கான் ஆகியோர் ஒரே மொபெட்டில் வீடுகளுக்கு திரும்பி சென்று கொண்டிருந்தனர். இவர்களது, வாகனம் மாதேப்பள்ளி சாலையில் சென்று கொண்டிருந்த போது, அந்த வழியாக அதிவேகமாக வந்த கனரக லாரி ஒன்று எதிர்பாராத விதமாக கட்டுப்பாட்டை இழந்து சுதா ராணி ஆகியோர் சென்ற மொபெட் பயங்கரமாக மோதி விபத்துக்குள்ளானது.
விபத்தில் தூக்கி வீசப்பட்டு உயிரிழந்த 2 ஆசிரியைகள்- மாணவன்
இந்த விபத்தில், சுதா ராணி, முஸ்கான் உள்ளிட்டோர் சாலையில் தூக்கி வீசப்பட்ட நிலையில், அவர்கள் மீது லாரியின் சக்கரங்கள் ஏறியதாக தெரிகிறது. இந்த விபத்தை ஏற்படுத்தி விட்டு லாரியின் ஓட்டுநர் வாகனத்தை நிறுத்தாமல் அங்கிருந்து தப்பி சென்று விட்டார். இதில், மூவரும் பலத்த காயமடைந்து ரத்த வெள்ளத்தில் உயிருக்கு போராடினர். இந்த விபத்தை பார்த்த அந்த வழியாக சென்ற பிற வாகன ஓட்டிகள் மற்றும் பொதுமக்கள் அவர்களை மீட்கும் முயற்சியில் ஈடுபட்டனர். ஆனால், அவர்கள் அனைவரும் அடுத்தடுத்து சம்பவ இடத்திலேயே பரிதாபமாக உயிரிழந்தனர்.
மேலும் படிக்க: தவெக நிர்வாகி திடீர் தற்கொலை.. ராமநாதபுரம் மாவட்ட செயலாளர் மீது பகீர் புகார்.. உடலை வாங்க மறுத்து உறவினர்கள் மறியலால் பதற்றம்!
வேப்பனஹள்ளி போலீசார் தீவிர விசாரணை
இந்த விபத்து குறித்து தகவல் அறிந்த வேப்பனஹள்ளி போலீசார் சம்பவ இடத்துக்கு விரைந்து சென்று விபத்தில் சிக்கி உயிரிழந்த மூன்று பேரின் சடலங்களையும் மீட்டு பிரேத பரிசோதனை மேற்கொள்வதற்காக அரசு மருத்துவமனைக்கு அனுப்பி வைத்தனர். மேலும், இந்த விபத்து தொடர்பாக அந்த பகுதியில் போலீசார் தீவிர விசாரணை மேற்கொண்டனர். தொடர்ந்து, இது தொடர்பாக கிடைக்கப்பெற்ற புகாரின் அடிப்படையில், வேப்பனஹள்ளி போலீசார் வழக்கு பதிவு செய்து விசாரணையை தீவிரப்படுத்தி உள்ளனர்.
தப்பியோடிய லாரி டிரைவருக்கு வலை வீச்சு
அத்துடன், விபத்தை ஏற்படுத்திவிட்டு நிற்காமல் தப்பி சென்ற கனரக லாரி ஓட்டுனரை வேப்பனஹள்ளி போலீசார் தீவிரமாக தேடி வருகின்றனர். மாதேப்பள்ளி பகுதியில் பள்ளி முடிந்து வழக்கம் போல வீடு திரும்பிய ஆசிரியைகள் மற்றும் மாணவர் மீது கனரக லாரி மோதியதில் மூவரும் சம்பவ இடத்திலேயே பரிதாபமாக உயிரிழந்தது அவர்களது குடும்பத்தினர் மற்றும் அந்த பகுதியில் பெரும் சோகத்தை ஏற்படுத்தி உள்ளது.
மேலும் படிக்க: பேட்மிண்டன் வீரர் வாழ்வில் விளையாடிய எமன்.. சென்னையில் காவல் உதவி ஆணையர் கண் முன்னே நிகழ்ந்த சோகம்..!
