கோவை இந்து முன்னணி நிர்வாகி கொலை – 4 பேருக்கு ஆயுள் தண்டனை
Coimbatore Murder Case : கோவையை சேர்ந்த இந்து முன்னணி நிர்வாகி சசிகுமார் என்பவர் கடந்த 2016 ஆம் ஆண்டு கொலை செய்யப்பட்டார். இந்த வழக்கில் குற்றம்சாட்டப்பட்ட 4 பேருக்கும் ஆயுள் தண்டனை விதித்து பூவிருந்தவல்லி என்ஐஏ நீதிமன்றம் தீர்ப்பளித்துள்ளது. இந்த சம்பவம் தொடர்பாக கோவையில் பலத்த பாதுகாப்பு ஏற்பாடுகள் செய்யப்பட்டன.
கோவை, செப்டம்பர் 25 : கோவையை சேர்ந்த இந்து முன்னணி நிர்வாகி சசிகுமார் என்பவர் கடந்த 2016 ஆம் ஆண்டு கொலை செய்யப்பட்டார். இந்த வழக்கில் குற்றம்சாட்டப்பட்ட சதாம் உசேன், சுபேர், முபாரக், ரபிக் அல் ஹாசன் ஆகிய 4 பேருக்கும் ஆயுள் தண்டனை விதித்து பூவிருந்தவல்லி என்ஐஏ நீதிமன்றம் தீர்ப்பளித்துள்ளது. இந்த சம்பவம் தொடர்பாக கோவையில் பலத்த பாதுகாப்பு ஏற்பாடுகள் செய்யப்பட்டன.
கோவை இந்து முன்னணி நிர்வாகி கொலையில் 4 பேருக்கு ஆயுள் தண்டனை
கடந்த 2016 ஆம் ஆண்டு கோவையில் இந்து முன்னணி நிர்வாகி சி. சசிகுமார் கொலை செய்யப்பட்டார். இந்த சம்பவம் தமிழகத்தையே உலுக்கிய நிலையில், இந்த வழக்கை தமிழக அரசு சிபிசிஐடி விசாரணைக்கு மாற்றி உத்தரவிட்டது. அதன்பிறகு, மத்திய உள்துறை அமைச்சகத்தின் உத்தரவின் பேரில் கடந்த 2018 ஆம் ஆண்டு தேசிய புலனாய்வு அமைப்பு விசாரணை மேற்கொண்டது.
இதையும் படிக்க : முதல்வர் விஜய் மாலை அணிவித்த எம்ஜிஆர் சிலை.. இதை கவனித்தீர்களா.. தலையை பிய்க்கும் தவெகவினர்!
இந்த வழக்கில் சதாம் உசேன், சுபேர், முபாரக் மற்றும் முகமது ரஃபிக் அல் ஹாசன் ஆகிய 4 பேரையும் பூவிருந்தவல்லி என்ஐஏ நீதிமன்றம் குற்றவாளிகளாக அறிவித்தது. மேலும் ஒவ்வொருவருக்கும் ஆயுள் தண்டனையுடன் தலா ரூ.30 ஆயிரம் அபராதமும் விதிக்கப்பட்டது. மேலும் இந்த வழக்கில் குற்றம்சாட்டப்பட்டிருந்த அபு என்ற சையது அபுதாகிர் விடுவிக்கப்பட்டார்.
இந்த வழக்கின் விசாரணையை 2019ஆம் ஆண்டு தேசிய புலனாய்வு அமைப்பு தொடங்கியது. விசாரணையின்போது அரசு தரப்பில் 75 சாட்சிகள் விசாரிக்கப்பட்டனர். அதேபோல், குற்றம்சாட்டப்பட்டவர்கள் தரப்பில் 2 சாட்சிகள் விசாரிக்கப்பட்டதாக தெரிவிக்கப்பட்டுள்ளது. கொலை,சதி செய்தல் மற்றும் பல்வேறு குழுக்களுக்கு இடையே பகையை ஏற்படுத்த முயன்றது உள்ளிட்ட இந்திய தண்டனைச் சட்டப் பிரிவுகளின் கீழ் 4 பேரும் குற்றவாளிகளாக அறிவிக்கப்பட்டுள்ளனர்.
முன்னதாக சசிகுமார் கொலை செய்யப்பட்டதைத் தொடர்ந்து கோவை மற்றும் அதன் சுற்றுவட்டார மாவட்டங்களில் வன்முறை சம்பவங்கள் நடைபெற்றன. இந்த சம்பவங்கள் தொடர்பாக 300க்கும் மேற்பட்ட வழக்குகள் பதிவு செய்யப்பட்டதாக தேசிய புலனாய்வு அமைப்பு தெரிவித்துள்ளது. இந்த வழக்கின் விசாரணையை தேசிய புலனாய்வு அமைப்பு மேற்கொண்டபோது, குற்றச்சாட்டுக்குள்ளானவர்கள் தடை செய்யப்பட்ட பாப்புலர் ஃப்ரண்ட் ஆஃப் இந்தியா அமைப்புடன் தொடர்புடையவர்கள் என்றும், சசிகுமார் கொலை தொடர்பாக சதி செய்ததாகவும் விசாரணையில் தெரியவந்ததாக அந்த அமைப்பு தெரிவித்திருந்தது.
இதையும் படிக்க : டிஆர்பிக்காக எதை வேண்டுமானாலும் வெளியிடுவீர்களா? – ஜெம் வீரமணி வழக்கு தொடர்பான செய்திகளுக்கு உயர் நீதிமன்றம் தடை
சுமார் 10 ஆண்டுகளுக்கு முன்பு நடைபெற்ற சசிகுமார் கொலை வழக்கில் தற்போது 4 பேருக்கு ஆயுள் தண்டனை விதிக்கப்பட்டுள்ள நிலையில், விடுவிக்கப்பட்ட ஒருவரை எதிர்த்து மேல்முறையீடு செய்வது தொடர்பான சட்ட நடவடிக்கையை தேசிய புலனாய்வு அமைப்பு பரிசீலித்து வருகிறது.
