மேகதாது அணைக்கு அனுமதி தரக்கூடாது…. பிரதமருக்கு முதல்வர் விஜய் கடிதம்
மேகதாது அணை கட்ட தமிழ்நாடு அரசின் அனுமதி தேவையில்லை என்ற ஒன்றிய அமைச்சர் ராஜ் பூசன் தெரிவித்திருந்தார். இந்த நிலையில் மேகதாது அணை விவகாரத்தில் தலையிட வேண்டும் என பிரதமருக்கு முதலமைச்சர் விஜய் கடிதம் எழுதியுள்ளார். அதில் மேகதாது அணைக்கு எந்த அனுமதியும் தரக்கூடாது என கேட்டுக்கொண்டார்.
சென்னை, ஜூலை 28 : மேகதாது அணை கட்ட தமிழ்நாடு அரசின் அனுமதி தேவையில்லை என்ற ஒன்றிய அமைச்சர் ராஜ் பூசன் தெரிவித்திருந்தார். இந்த நிலையில் மேகதாது அணை விவகாரத்தில் தலையிட வேண்டும் என பிரதமருக்கு முதலமைச்சர் விஜய் கடிதம் எழுதியுள்ளார். அதில் மேகதாது அணைக்கு எந்த அனுமதியும் தரக்கூடாது என கேட்டுக்கொண்டார்.
பிரதமருக்கு முதல்வர் விஜய் கடிதம்
காவிரி ஆற்றின் குறுக்கே ஒரு கட்டமைப்பை அமைப்பதற்கு முன்னதாக, ஆற்றின் கீழ்மடைப் பகுதிகளில் அமைந்துள்ள மாநிலங்களின் ஒப்புதலை கர்நாடகம் கட்டாயம் பெற வேண்டும் என 2018 பிப்ரவரி 16ஆம் தேதியிட்ட உச்ச நீதிமன்றத் தீர்ப்பு எங்கும்வெளிப்படையாகக் குறிப்பிடவில்லை என்று மத்திய அமைச்சர் தெரிவித்துள்ளார். கீழ்மடை மாநிலங்களின் ஒப்புதல் தொடர்பான தற்போதைய சட்ட நிலை மற்றும் நிலைபெற்ற சட்ட விதிகள் ஆகியவற்றை கணக்கில் கொள்ளாமலேயே, ‘ஜல் சக்தி’ துறை இணையமைச்சரின் இந்த ஏமாற்றமளிக்கும் பதில் அளிக்கப்பட்டிருப்பதாகத் தோன்றுகிறது.
இந்தச் சூழலில், கர்நாடகா மற்றும் ஆந்திரா ஆகியவற்றுக்கு இடையிலான அலமட்டி வழக்கின்போது, ஆற்றின் கீழ்மட்டத்தில் அமைந்துள்ள மாநிலத்தின் ஒப்புதல் மிக அவசியமானது என்று உச்ச நீதிமன்றத்தின் அரசியலமைப்பு அமர்வு அளித்த தீர்ப்பை நினைவுபடுத்த விரும்புகிறேன். அந்த தீர்ப்பில், “ஆற்றைப் பகிர்ந்து கொள்ளும் மற்ற அனைத்து மாநிலங்களின் ஒப்புதலும் மத்திய அரசின் அனுமதியும் இன்றி, கர்நாடக மாநிலம் கட்டுமானப் பணிகளை மேற்கொள்ள அனுமதிக்கப்பட முடியாது என்று தெரிவிக்கப்பட்டுள்ளது.
மேலும், காவிரி தீர்ப்பாயமே முக்கியமான வழிகாட்டு நெறிமுறைகளை வகுத்துள்ளது. வெறும் 0.1 டிஎம்சி நுகர்வுப் பயன்பாட்டைக் கொண்ட கேரளாவின் பாம்பார் நீர்மின் திட்ட வழக்கில், கீழ்நிலைப் பாசனத்திற்குப் பாதகமாக பாதிப்பு ஏற்படாத வகையில், நீர் திறப்பு அட்டவணையை கேரளாவும் தமிழ்நாடும் கூட்டாக ஒப்புக்கொள்ள வேண்டும் என்று அது உத்தரவிட்டது. இது, தீர்ப்பாயம் ஆண்டு அளவுகளுக்கு மட்டுமல்லாமல், கீழ்நிலைப் பாசன நலன்களைப் பாதிக்கும் நீர் திறப்புகளின் ஒருங்கிணைந்த ஒழுங்குமுறைக்கும் முதன்மையான முக்கியத்துவம் அளித்தது என்பதை நிரூபிக்கிறது. தீர்ப்பின் பதினொன்றாம் பிரிவு, ஒழுங்குமுறை ஆணையத்துடன் பரஸ்பர உடன்பாடு மற்றும் கலந்தாலோசனையின்றி, கீழ்நிலை மாநிலங்களுக்குத் திட்டமிடப்பட்ட விநியோகங்களைப் பாதிக்கும் நடவடிக்கைகளை எந்தவொரு மேல்நிலை மாநிலமும் எடுப்பதைத் திட்டவட்டமாகத் தடை செய்கிறது. எனவே, முன்மொழியப்பட்ட மேகதாது திட்டத்தை வெறும் ஒரு பொறியியல் முன்மொழிவாக மட்டும் மதிப்பிட முடியாது. அதன் சட்டப்பூர்வமான ஏற்புத்தன்மையானது காவிரி நீர் தீர்ப்பாயத்தின் இறுதித் தீர்ப்பு, உச்ச நீதிமன்றத்தின் 16 பிப்ரவரி 2018 தேதியிட்ட தீர்ப்பு, கீழ்நிலை மாநிலங்களின் உரிமைகள் அடிப்படையில் ஆய்வு செய்ய வேண்டும்.
‘பிரதமர் தலையிட வேண்டும்’
இத்திட்டம் குறித்த எதிர்கால நடவடிக்கைகள் அனைத்தும், ஆற்றின் கீழ்மடைப் பகுதிகளில் அமைந்துள்ள அனைத்து மாநிலங்களின் கவலைகளையும் கருத்தில் கொண்டு, விரிவான தொழில்நுட்ப மற்றும் சட்டரீதியான ஆய்வுக்குப் பின்னரே மேற்கொள்ளப்பட வேண்டும்.காவிரி ஆறு என்பது வெறும் நீராதாரமாக மட்டுமல்லாமல், தென்னிந்தியா முழுவதும் உள்ள லட்சக்கணக்கான விவசாயிகள் மற்றும் குடிமக்களின் வாழ்வாதாரமாகவும் திகழ்கிறது. மாநிலங்களுக்கு இடையிலான நதிகள் தொடர்பான விவகாரங்களை நிர்வகிக்கும் அரசியலமைப்புச் சார்ந்த நடைமுறைகள் மீதான நம்பிக்கையைத் தக்கவைக்க, தீர்ப்பாயத்தின் தீர்ப்பு மற்றும் உச்ச நீதிமன்றத்தின் தீர்ப்பு ஆகியவற்றின் மாண்பைக் காப்பது அவசியமாகும். நீதி, கூட்டாட்சி நல்லிணக்கம் மற்றும் நீதிமன்றத் தீர்ப்புகளை உண்மையாகச் செயல்படுத்துதல் ஆகியவற்றை முன்னிறுத்தி, இதில் தங்கள் மேலான தலையீட்டை நான் கோருகிறேன் என குறிப்பிட்டுள்ளார்.
