முதல்முறையாக இடைத்தேர்தலை சந்திக்கும் மதுராந்தகம் தொகுதி.. மும்முனைப் போட்டியில் சூடாகும் தேர்தல் களம்!

செங்கல்பட்டு, செப்.11: தமிழ்நாட்டில் சென்னை மாகாணமாக இருந்த 1951-ஆம் ஆண்டில் சட்டமன்றத் தொகுதியாக உருவெடுத்த மதுராந்தகம் தனித் தொகுதி, தனது நீண்ட நெடிய அரசியல் வரலாற்றில் முதன்முறையாக தற்போது இடைத்தேர்தலை சந்திக்கவுள்ளது. 1952-இல் நடைபெற்ற முதல் சட்டமன்றத் தேர்தலில் காங்கிரஸ் கட்சி வெற்றி பெற்றுத் தனது கணக்கைத் தொடங்கியது. அதனைத் தொடர்ந்து 1957 மற்றும் 1962 ஆகிய தேர்தல்களிலும் காங்கிரஸே வெற்றி வாகை சூடியது. அதன்பின்னர் களமிறங்கிய திமுக, 1967, 1971, மற்றும் 1977 ஆகிய தொடர்ச்சியான மூன்று தேர்தல்களில் வென்று இத்தொகுதியைத் தனது கோட்டையாக மாற்றியது. 1980-இல் முதன்முறையாக அதிமுக இங்கு வெற்றிக் கொடியை நாட்டிய நிலையில், 1984-இல் மீண்டும் திமுகவும், 1989 மற்றும் 1991 தேர்தல்களில் அதிமுகவும் மாற்றி மாற்றி வெற்றி பெற்றன. தொடர்ந்து 1996-இல் திமுகவும், 2001-இல் அதிமுகவும் வென்றன. நீண்ட இடைவெளிக்குப் பின் 2006-இல் காங்கிரஸ் மீண்டும் வென்றாலும், 2011-இல் அதிமுகவும், 2016-இல் திமுகவும் வெற்றி பெற்றன.

இதையும் படிக்க: மதுராந்தகம்- தாராபுரம் இடைத்தேர்தல்.. திமுக சார்பில் களமிறங்கும் பரந்தாமன்- சுகன்யா.. முழு பின்னணி இதோ!

அதிமுக 7 முறை வென்ற தொகுதியாக மதுராந்தகம்:

தொகுதி வரலாற்றில் காங்கிரஸ் 4 முறையும், திமுக 6 முறையும் வெற்றி பெற்றுள்ள நிலையில், கடந்த 2021 மற்றும் 2026 சட்டமன்றத் தேர்தல்களில் தொடர்ச்சியாக வெற்றி பெற்று அதிமுக 7 முறை வென்ற தொகுதியாக மதுராந்தகத்தை மாற்றியது. கடந்த 2021 தேர்தலில் 86,646 வாக்குகளைப் பெற்று வெற்றி பெற்ற அதிமுகவின் மரகதம் குமரவேல், 2026 தேர்தலிலும் 69,284 வாக்குகளைப் பெற்று மீண்டும் வெற்றி பெற்றார். கடந்த தேர்தலில் தமிழக வெற்றிக் கழகத்தின் வேட்பாளர் எழில் கேத்தரின் எழில்மலை 62,904 வாக்குகள் பெற்று இரண்டாம் இடத்தைப் பிடிக்க, 59,838 வாக்குகள் பெற்ற திமுக மூன்றாவது இடத்திற்குத் தள்ளப்பட்டது. 2026 தேர்தலில் பதிவு செய்யப்பட்ட 93.22% வாக்குகளில் அதிமுக 32.58%, தவெக 29.2% மற்றும் திமுக 28.14% வாக்கு வீதம் பெற்றன. முதல் மூன்று இடங்களைப் பிடித்த கட்சிகளிடையேயான வாக்கு வித்தியாசம் மிகக் குறைவாக இருந்ததே இங்கு நிலவும் கடும் போட்டியை உணர்த்துகிறது.

மும்முனைப் போட்டியாக உருவெடுத்த களம்:

மொத்தம் 2,12,656 வாக்காளர்களைக் (1,08,079 பெண்கள், 1,04,522 ஆண்கள், 65 மூன்றாம் பாலினத்தவர்) கொண்ட மதுராந்தகம் தொகுதியில் தற்போது நடைபெறவுள்ள இடைத்தேர்தல் களம் மிகக் கடுமையான மும்முனைப் போட்டியாக உருவெடுத்துள்ளது. கடந்த இரு தேர்தல்களில் அதிமுக சார்பில் போட்டியிட்டு வெற்றி பெற்ற மரகதம் குமரவேல், அண்மையில் அதிமுகவிலிருந்து விலகி தவெகவில் இணைந்த நிலையில், தற்போது அதே மதுராந்தகம் தொகுதியில் தவெக வேட்பாளராகக் களமிறக்கப்பட்டுள்ளார். திமுக சார்பில் பரந்தாமனும், அதிமுக சார்பில் கடந்த 2011 தேர்தலில் இதே தொகுதியில் வென்ற கனிதா சம்பத்தும் களமிறக்கப்பட்டுள்ளதால் மதுராந்தகம் தேர்தல் களம் தற்போதே உச்சக்கட்ட பரபரப்பை எட்டியுள்ளது.

இதையும் படிக்க: சிவகங்கை அஜித்குமார் லாக்கப் மரணம்.. டிஎஸ்பி உள்பட 4 போலீசார் மீது கொலை வழக்கு.. நீதிமன்றம் அதிரடி உத்தரவு!

சமூக மற்றும் சமூகவியல் பின்னணி:

இத்தொகுதியின் சமூக மற்றும் சமூகவியல் பின்னணிகளும் தேர்தல் முடிவுகளைத் தீர்மானிப்பதில் முதன்மைப் பங்கு வகிக்கின்றன. மதுராந்தகம் தனித் தொகுதியை பொறுத்தவரை ஆதிதிராவிடர் சமூக மக்கள் கணிசமான எண்ணிக்கையில் வசித்து வரும் அதே வேளையில், வன்னியர் மற்றும் முதலியார் சமூகத்தைச் சேர்ந்த வாக்காளர்களும் வெற்றித் தோல்வியை தீர்மானிக்கும் முக்கிய சக்திகளாக உள்ளனர். விவசாயத்தை பிரதான வாழ்வாதாரமாகக் கொண்ட இந்த விவசாயப் பகுதியில், நீர்நிலைப் பராமரிப்பு, செய்யூர் மற்றும் மதுராந்தகம் கூட்டுறவு சர்க்கரை ஆலை நிர்வாக சீரமைப்பு, மற்றும் உள்ளூர் வேலைவாய்ப்பு கோரிக்கைகளே தேர்தலின் முதன்மைப் புகார்களாக எதிரொலிக்கின்றன. கடந்த காலங்களில் கூட்டணிக் கணக்குகள் மற்றும் தனிநபர் செல்வாக்கே வெற்றி வாய்ப்பைத் தீர்மானித்த நிலையில், இம்முறை தவெகவின் வருகை பாரம்பரிய திராவிடக் கட்சிகளின் வாக்கு வங்கியில் எந்த மாதிரியான மாற்றத்தை ஏற்படுத்தப்போகிறது என்பதும், அப்பகுதி மக்களின் நீண்டகாலக் கோரிக்கைகளுக்கு யார் முக்கியத்துவம் தருவார்கள் என்பதும் இத்தேர்தல் முடிவின் மூலம் தெரியவரும்.