நாளைமுதல் கனமழை இல்லை.. சென்னை வானிலை ஆய்வு மையம் முக்கிய அறிவிப்பு
Ditwah Cyclone : தித்வா புயல் காரணமாக டிசம்பர் 1, 2025 முதல் கனமழை படிபடிப்பாக குறையும் எனவும் அடுத்த 4 நாட்களுக்கு தமிழகத்தில் கனமழைக்கு வாய்ப்பில்லை எனவும் சென்னை வானிலை ஆய்வு மையம் தெரிவித்துள்ளது. அது குறித்து இந்த கட்டுரையில் விரிவாக பார்க்கலாம்.
தித்வா (Ditwah) புயல் காரணமாக தமிழகத்தில் பல பகுதிகளில் கனமழை (Heavy Rain) பெய்து வருகிறது. இந்த நிலையில் நவம்பர் 30, 2025 அன்று சென்னை வானிலை ஆய்வு மையம் வெளியிட்ட அறிவிப்பில், திருவள்ளூர், ராணிப்பேட்டை ஆகிய 2 மாவட்டங்களுக்கு அதி கனமழைக்கான ரெட் அலர்ட் கொடுக்கப்பட்டுள்ளது. அங்கு அதிகபட்சமாக 20 செ.மீ அளவுக்கு மழை பொழிவு இருக்கும் என வானிலை ஆய்வு மையம் தெரிவித்துள்ளது. மேலும், சென்னை, காஞ்சிபுரம், செங்கல்பட்டு, வேலூர் ஆகிய மாவட்டங்களில் கனமழை முதல் மிக கனமழை பெய்யும் என்பதால் ஆரஞ்சு அலர்ட் கொடுக்கப்பட்டுள்ளது. இந்த நிலையில் நாளை டிசம்பர் 1, 2025 முதல் கனமழை இருக்காது என வானிலை ஆய்வு மையம் தெரிவித்துள்ளது.
நாளை முதல் கனமழை இல்லை
தித்வா புயல் காரணமாக தமிழகத்தில் பெரும்பாலான பகுதிகளில் தொடர்ந்து மழை பெய்து வருகிறது. குறிப்பாக வட மாவட்டங்களில் கனமழை பெய்து வருவதால் மக்களின் இயல்பு வாழ்க்கை பாதிக்கப்பட்டுள்ளது. இந்த நிலையில் சென்னை வானிலை ஆய்வு மையம் முக்கிய அறிவிப்பை வெளியிட்டுள்ளது. அதன் படி டிசம்பர் 1, 2025 முதல் கனமழை படிபடிப்பாக குறையும் எனவும் அடுத்த 4 நாட்களுக்கு தமிழகத்தில் கனமழைக்கு வாய்ப்பில்லை எனவும் சென்னை வானிலை ஆய்வு மையம் தெரிவித்துள்ளது.
இதையும் படிக்க : சென்னைக்கு 220 கி.மீ தொலைவில் டிட்வா புயல்..எங்கே அதிகனமழை இருக்கும்? வானிலை ரிப்போர்ட்..
மேலும் டிசம்பர் 1, 2025 நாளை திருவள்ளூரில் மட்டும் கனமழை பெய்யும் எனவும் டிசம்பர் 2, 2025 செவ்வாய்க்கிழமை முதல் அடுத்த 4 நாட்களுக்கு கனமழை இல்லை எனவும் சென்னை வானிலை ஆய்வு மையம் அறிவித்துள்ளது. சென்யார் புயல் மற்றும் தித்வா புயல் காரணமாக தமிழகத்தில் கடந்த ஒருவாரமாக கனமழை பெய்து வருகிறது. இதனால் மக்களின் இயல்பு வாழ்க்கை பாதிக்கப்பட்டது. இந்த நிலையில் செவ்வாயக்கிழமை முதல் கனமழை இல்லை என சொல்லப்பட்டிருப்பது மக்களிடையே மகிழ்ச்சியை ஏற்படுத்தியிருக்கிறது.
இதையும் படிக்க : ‘தித்வா புயல்’ எதிரொலி: தென் தமிழகத்தில் 100 ஆண்டுகளில் இல்லாத அளவு குளிர்!!
தித்வா புயலால் 3 பேர் மரணம்
தித்வா புயல் பாதிப்பு குறித்து பேரிடர் மேலாண்மை அமைச்சர் கே.கே.எஸ்.எஸ்.ஆர்.ராமச்சந்திரன் நவம்பர் 30, 2025 அன்று செய்தியாளர்களை சந்தித்து பேசினார். அப்போது பேசிய அவர், புயல் காரணமாகப் பெய்த மழையால் இதுவரை 3 பேர் உயிரிழந்துள்ளனர். தூத்துக்குடி மற்றும் தஞ்சாவூரில் சுவர் இடிந்து இருவர் மற்றும் மயிலாடுதுறையில் மின்சாரம் தாக்கி 20 வயது இளைஞர் என மொத்தம் 3 பேர் உயிரிழந்திருக்கின்றனர். மேலும் 38 நிவாரண மையங்களில் 2,393 பேர் தங்க வைக்கப்பட்டுள்ளனர். மேலும், தமிழ்நாட்டில் கனமழை காரணமாக 56 ஆயிரம் ஹெக்டேர் விளைநிலங்கள் வெள்ளத்தில் மூழ்கி உள்ளதாகக் கணக்கெடுக்கப்பட்டுள்ளதாகவும் தெரிவித்தார்.
