Ditwah Cyclone Live : தீவிரமடையும் தித்வா புயல்…. பூண்டி ஏரியில் இருந்து விநாடிக்கு 3500 கன அடி நீர் திறப்பு – கரையோர மக்களுக்கு எச்சரிக்கை
Ditwah Cyclone : தித்வா புயல் காரணமாக நவம்பர் 29, 2025 நள்ளிரவில், தமிழக கடற்கரையிலிருந்து சுமார் 60 கிலோமீட்டர் தூரத்தில் புயல் மையம் கொள்ளும் என சென்னை வானிலை ஆய்வு மையம் தெரிவித்துள்ளது. புயலின் தாக்கம் காரணமாக தமிழகம் மற்றும் புதுச்சேரி கடற்கரையை ஒட்டிய பகுதிகளில் 70 முதல் 90 கி.மீ வேகத்தில் காற்று வீசக் கூடும்
LIVE NEWS & UPDATES
-
16 கால்நடைகள் உயிரிழப்பு
தமிழகத்தில் பெய்து வரும் கன மழையால் 16 கால்நடைகள் மட்டுமே உயிரிழந்துள்ளதாகவும், 24 குடிசைகள் சேதமடைந்து இடிந்துள்ளதாகவும் கூறிய அவர், இச்சேதங்களைப் பற்றி ஆய்வு நடைபெற்று வருவதுடன், தேவையான நடவடிக்கைகள் எடுக்கப்பட்டு வருவதாகவும் பேரிடர் மேலாண்மைத் துறை அமைச்சர் கே.கே.எஸ்.எஸ்.ஆர். ராமச்சந்திரன் தெரிவித்துள்ளார்
-
நாளை ரெட் அலர்ட் கொடுக்கப்பட்ட மாவட்டங்கள்
தமிழ் நாட்டில் தித்வா புயல் காரணமாக நவம்பர் 30, 2025 அன்று திருவள்ளூர், ராணிப்பேட்டை ஆகிய மாவட்டங்களுக்கு மிக கனமழைக்கான ரெட் அலர்ட் கொடுக்கப்பட்டுள்ளது.
-
புதுச்சேரியில் மதுபான கடைகளை மூட உத்தரவு
தித்வா புயல் காரணமாக புதுச்சேரியில் உள்ள அனைத்து வகையான மதுபான விடுதிகள் மற்றும் மதுபான கடைகளை மூட அம்மாநில அரசு உத்தரவிட்டுள்ளது.
-
பூண்டி ஏரியில் இருந்து விநாடிக்கு 3500 கன அடி நீர் திறப்பு – கரையோர மக்களுக்கு எச்சரிக்கை
அதி கனமழை எச்சரிக்கையால் பூண்டி ஏரியில் இருந்து நீர் திறப்பு விநாடிக்கு 3500 கன அடியாக அதிகரிக்கப்பட்டுள்ளது; நவம்பர் 28, 2025 முதல் படிப்படியாக நீர் திறப்பு அதிகரிக்கப்பட்டு வருகிறது. மிக கன மழை காரணமாக நீர்வரத்து அதிகரித்தால் உபரி நீர் திறப்பும் அதிகரிக்கப்படும். பூண்டி ஏரியில் இருந்து உபரி நீர் திறக்கப்பட்டுள்ள கொசஸ்தலை ஆற்றின் கரையோர மக்கள் பாதுகாப்பாக இருக்க வேண்டும் என நீர்வளத்துறை அதிகாரிகள் அறிவுறுத்தியுள்ளனர்.
-
புதுச்சேரி கடற்கரை பகுதிக்கு மக்கள் செல்லத் தடை
தித்வா புயல் எதிரொலியாக புதுச்சேரி கடற்கரையில் கடல் கொந்தளிப்புடன் காணப்படுவதால் மக்கள் கடற்கரை மற்றும் கடற்கரை சாலையில் செல்ல தடை விதிக்கப்பட்டுள்ளது. அதிவேகமாக காற்று வீசுவதன் காரணமாக இந்த தடை விதிக்கப்பட்டுள்ளது.
-
தீவிரமடையும் தித்வா புயல்… 47 விமானங்கள் ரத்து
சென்னையில் கனமழை மற்றும் பலத்த காற்று காரணமாக சென்னை விமான நிலையத்துக்கு வரும் மற்றும் சென்னை விமான நிலையத்தில் இருந்து கிளம்பும் 47 உள்நாட்டு மற்றும் சர்வதேச விமானங்கள் ரத்து செய்யப்பட்டுள்ளதாக அறிவிக்கப்பட்டுள்ளது. இதனால் பயணிகள் விமான நிலையம் கிளம்பும் முன் விமான நிறுவனங்களை தொடர்பு கொண்டு விசாரித்துக்கொள்ள அறிவுறுத்தப்பட்டுள்ளது.
-
ராமேஸ்வரத்தில் வீடுகளுக்குள் மழை நீர் – மக்கள் அவதி
ராமநாதபுரம் மாவட்டம் ராமேஸ்வரம் வேர்கோடு, இந்திரா நகர், மாந்தோப்பு, என்எஸ்கே தெரு ஆகிய பகுதிகளில் பெய்து வரும் கனமழை காரணமாக 100க்கும் மேற்பட்ட வீடுகளுக்குள் மழை நீர் புகுந்தது. இதனால் மக்களின் இயல்பு வாழ்க்கை வெகுவாக பாதிக்கப்பட்டுள்ளது.
-
கடலூரில் வெளுத்து வாங்கும் கனமழை
தித்வா புயல் சென்னைக்கு அருகே 10 கி.மீ வேகத்தில் நெருங்கி வரும் நிலையில் கனமழை வெளுத்து வாங்கி வருகிறது. இதனால் அப்பகுதியில் சாலையில் வெள்ளப்பெருக்கு ஏற்பட்டுள்ளது. கனமழை காரணமாக மக்களின் இயல்பு வாழ்க்கை கடுமையாக பாதிக்கப்பட்டுள்ளது.
-
சென்னையை நெருங்கும் தித்வா புயல்
வேதாரண்யத்திற்கு 80 கி.மீ தொலைவில் மையம் கொண்டுள்ள தித்வா புயல், தொடர்ந்து மணிக்கு 10 கி.மீ வேகத்தில் நகர்ந்து வருகிறது. சென்னைக்கு 290 கி.மீ தூரத்திலும், யாழ்ப்பாணத்தில் இருந்து வடகிழக்கில் 110 கி.மீ தூரத்திலும் புயல் நிலை கொண்டுள்ளதாக வானிலை ஆய்வு மையம் தெரிவித்துள்ளது.
-
5 ஆம் எண் கூண்டு ஏற்றம்…
முன்னெச்சரிக்கை நடவடிக்கையாக கடும் வானிலைக்கு துறைமுகம் உட்படும் என்பதைக் குறிக்கும், 5ம் எண் கூண்டு புதுச்சேரி, கடலூர், நாகை, காரைக்கால் துறைமுகத்தில் ஏற்றப்பட்டுள்ளது. மேலும் சென்னை, எண்ணூர், காட்டுப்பள்ளி, பாம்பன் மற்றும் தூத்துக்குடி துறைமுகங்களில் 4ம் எண் கூண்டு ஏற்றப்பட்டுள்ளது குறிப்பிடத்தக்கது.
தித்வா புயல் காரணமாக நவம்பர் 29, 2025 நள்ளிரவில், தமிழக கடற்கரையிலிருந்து சுமார் 60 கிலோமீட்டர் தூரத்தில் புயல் மையம் கொள்ளும் என சென்னை வானிலை ஆய்வு மையம் தெரிவித்துள்ளது. புயலின் தாக்கம் காரணமாக தமிழகம் மற்றும் புதுச்சேரி கடற்கரையை ஒட்டிய பகுதிகளில் 70 முதல் 90 கி.மீ வேகத்தில் காற்று வீசக் கூடும் எனவும் அடுத்த நாள் அதிகாலை புயல் தமிழக – புதுச்சேரி கடற்கரையில் சுமார் 50 கி.மீ தொலைவில் மையம் கொள்ளும் எனவும் அதன் தாக்கம் மாலை வரை இருக்கும் என வானிலை ஆய்வு மையம் எச்சரித்துள்ளது. இதன் காரணமாக தமிழகத்தில் பெரும்பாலான பகுதிகளுக்கு ரெட் அலர்ட் கொடுக்கப்பட்டுள்ளது.
Published On - Nov 29,2025 9:35 PM
