சென்னையை நெருங்கும் தித்வா புயல்… வெளுத்து வாங்க காத்திருக்கும் கனமழை – வானிலை ஆய்வு மையம் எச்சரிக்கை
Heavy Rain Alert : தித்வா புயல் தற்போது பல்வேறு இடங்களில் கனமழை பெய்து வருகிறது. தற்போது புயலானது சென்னைக்கு தெற்கில் 350 கி.மீ தூரத்தில் இருப்பதாகவும், இதன் காரணமாக நாளை சென்னைக்கு மிக கனமழைக்கான ஆரஞ்சு அலர்ட் கொடுக்கப்பட்டிருப்பதாகவும் சென்னை வானிலை ஆய்வு மையம் அறிவித்துள்ளது.
சென்னை, நவம்பர் 29 : தித்வா (Ditwah) புயல் தற்போது பல்வேறு இடங்களில் கனமழை பெய்து வருகிறது. தற்போது புயலானது சென்னைக்கு தெற்கில் 350 கி.மீ தூரத்தில் இருப்பதாகவும், அது 10 கி.மீ வேகத்தில் வடக்கு மற்றும் வடமேற்குத் திசையில் நகர்ந்து வருவதாகவும் தென் மண்டல வானிலை ஆய்வு மைய தலைவர் அமுதா தெரிவித்தார். இதன் காரணமாக சென்னை (Chennai) மற்றும் அதன் புறநகர் பகுதிகளில் நவம்பர் 29, 2025 இன்றும், நவம்பர் 30, 2025 நாளையும் மிக கனமழை பெய்ய வாய்ப்பு இருப்பதாகவும், தமிழகத்தில் நாளை மறுநாள் முதல் மழையின் தாக்கம் படிப்படியாக குறையும் என்றும் அவர் தகவல் தெரிவித்தார். மேலும் சென்னையைப் பொறுத்தவரை நவம்பர் 29, 2025 இன்று நள்ளிரவுக்கு பிறகு மழை தீவிர மடையும் என்றார்.
சென்னைக்கு ஆரஞ்சு அலர்ட்
தித்வா புயல் காரணமாக தென் மாவட்டங்களில் லேசானது முதல் மிதமான மழை பெய்து வருகிறது. இந்த நிலையில் தித்வா புயல் காரணமாக நவம்பர் 29, 2025 இன்று தமிழகத்தின் கடலோர மாவட்டங்களில் கனமழை பெய்யும் என அறிவிக்கப்பட்டுள்ளது. குறிப்பாக சென்னையில் நவம்பர் 29, 30, 2025 ஆகிய இரண்டு நாட்களுக்கு மிக கனமழைக்கான ஆரஞ்சு அலர்ட் கொடுக்கப்பட்டுள்ளது. மேலும் சென்னையில் 75 கி.மீ வேகத்தில் பலத்த காற்று வீசும் எனவும் வானிலை ஆய்வு மையம் அறிவித்துள்ளது.
இதையும் படிக்க : சென்னைக்கு நாளை தான் மழையின் ஆட்டம் இருக்கும் – வெதர்மேன் சொன்ன முக்கிய அப்டேட்..
மேலும் சேலம், கள்ளக்குறிச்சி, திருச்சி, பெரம்பலூர், அரியலூர் ஆகிய 5 மாவட்டங்களக்கு நவம்பர 29, 2025 அன்று அதி கனமழைக்கான ரெட் அலர்ட் கொடுக்கப்பட்டுள்ளது. தஞ்சை, திருவாரூர், புதுக்கோட்டை ஆகிய மாவட்டங்களில் கனமழைக்கான வாய்ப்பிருக்கிறது. கடலோர பகுதிகளில் நிலவும் இந்த புயல் டிசம்பர் 1, 2025 அன்று கரையைக் கடக்கும் என வானிலை ஆய்வு மையம் அறிவித்துள்ளது.
வழக்கத்தை விட அதிக மழை
இந்த நிலையில் நவம்பர் 30, 2025 அன்று திருவள்ளூர், ராணிப்பேட்டை ஆகிய மாவட்டங்களுக்கு மிக கனமழைக்கான ரெட் அலர்ட் கொடுக்கப்பட்டுள்ளது. வட தமிழக கடலோர பகுதிகளில் 80 கி.மீ வரை காற்றின் வேகம் அதிகரிக்கும். இந்த வட கிழக்கு பருவமழை வழக்கத்தை விட 3 சதவிகிதம் அதிகமாக மழை பெய்துள்ளது என்றும் சென்னை வானிலை ஆய்வு மைய தென் மண்டல தலைவர் அமுதா தெரிவித்தார்.
இதையும் படிக்க : கனமழை எச்சரிக்கை: இந்த மாவட்டங்களில் இன்று பள்ளிகளுக்கு விடுமுறை!
நாகப்பட்டினம் மாவட்டத்தில் கோடியக்கரை பகுதியில் அதிகபட்சமாக 25 செ.மீ மழையும், வேதாரண்யத்தில் 19 செ.மீ மழையும், வேளாங்கன்னியில் 13 செ.மீ மழையும் திருத்துறைப்பூண்டி, நாகப்பட்டினம் ஆகிய இடங்களில் தலா 12 செ.மீ மழையும் பெய்துள்ளது. ராமநாதபுரத்தில் பாம்பனில் அதிகபட்சமாக பாம்பனில் 10 செ.மீ மழையும், தங்கச்சிமடம், ராமேஸ்வரம், பாம்பன், தொண்டி ஆகிய இடங்களில் தலா 7 செ.மீ மழைதயும், தீர்த்தாண்டதானம், கடலாடி திருவாடனை ஆகிய இடங்களில் 6 செ.மீ மழையும் பெய்துள்ளது. தூத்துக்குடி மாவட்டத்தில் காயல்பட்டினத்தில் தலா 7 செ.மீ மழையும், சூரங்குடி, திருச்செந்தூர் ஆகிய பகுதிகளில் தலா 6 செ.மீ மழையும் பெய்துள்ளது.
