கனமழை எச்சரிக்கை: இந்த மாவட்டங்களில் இன்று பள்ளிகளுக்கு விடுமுறை!
தித்வா புயல் காரணமாக தமிழகத்தில் இன்று 4 மாவட்டங்களுக்க ரெட் அலர்ட் விடுக்கப்பட்டுள்ளது. மேலும், 13 மாவட்டங்களில் மிக கனமழைக்கான ஆரஞ்ச் அலர்ட் விடுக்கப்பட்டுள்ளது. இதையொட்டி, பள்ளி, கல்லூரிகளுக்கு மழை எச்சரிக்கயை பொருத்து அந்ததந்த மாவட்ட ஆட்சியர்கள் விடுமுறை அறிவித்து வருகின்றனர்.
சென்னை, நவம்பர் 29: தமிழகத்தில் தித்வா புயல், கனமழை எச்சரிக்கையால் பல்வேறு மாவட்டங்களிலும் இன்று பள்ளிகளுக்கு விடுமுறை அளிக்கப்பட்டு வருகிறது. தித்வா புயல் டெல்டா மற்றும் வட தமிழக கடலோரப் பகுதிகளை நெருங்கி நல்ல மழையை கொடுக்க இருப்பதாக வானிலை ஆய்வு மையம் தெரிவித்துள்ளது. இதனை கருத்தில் கொண்டு கனமழை பெய்யக்கூடிய மாவட்டங்களுக்கு அந்ததந்த மாவட்ட ஆட்சியர்கள் பள்ளி, கல்லூரிகளுக்கு விடுமுறையை முடிவு செய்து அறிவிப்புகளை வெளியிட்டு வருகின்றனர். இதனிடையே, தமிழகத்தில் அனைத்து பள்ளிகளுக்கும் விடுமுறை விடப்பட்டிருப்பதாக நேற்று செய்திகள் வெளியாகின. இதுகுறித்து விளக்கமளித்த பள்ளிக்கல்வித்துறை அதிகாரிகள், பள்ளி கல்வியாண்டு காலண்டரில் நவ.29 (சனிக்கிழமை) விடுமுறை என்றே குறிப்பிடப்பட்டு உள்ளது. அந்தவகையில், இன்றைய தினம் அரசு, அரசு உதவி பெறும் பள்ளிகளுக்கு விடுமுறை தான் என்று கூறினர்.
இதையும் படிக்க: சென்னையை நோக்கி நகரும் ‘தித்வா’ புயல்: அதி கனமழை எச்சரிக்கை!!
அதேசமயம், கனமழை பெய்யும் பள்ளிகளுக்கு விடுமுறை அறிவிக்கப்படுவது என்பது தனியார் உட்பட அனைத்து வகை பள்ளிகளுக்கும் பொருத்தமானது. அதோடு, விடுமுறை அறிவிக்கப்பட்டிருந்தாலும், சில பள்ளிகளில் சிறப்பு வகுப்புகள் நடத்தப்படும். அதுபோல எந்த பள்ளிகளுக்கும் சிறப்பு வகுப்புகளை நடத்தக்கூடாது என்றும் பள்ளிக்கல்வித்துறை எச்சரித்துள்ளது.
இந்த மாவட்டங்களில் இன்று விடுமுறை:
அந்தவகையில், திருவாரூர், நாகை, மயிலாடுதுறை, கடலூர், கள்ளக்குறிச்சி, புதுக்கோட்டை, பெரம்பலூர் மாவட்டங்களில் உள்ள அனைத்து பள்ளி, கல்லூரிகளுக்கு இன்று விடுமுறை அறிவிக்கப்பட்டுள்ளது. அதேசமயம், விழுப்புரம், தஞ்சாவூர், திருச்சி ஆகிய மாவட்டங்களில் பள்ளிகளுக்கு மட்டும் விடுமுறை அறிவிக்கப்பட்டுள்ளது.
ராமநாதபுரம், ராமேஸ்வரம், R.S மங்களம், திருவாடனை வட்டங்களில் உள்ள பள்ளிகளுக்கு மட்டும் இன்று விடுமுறை அறிவிக்கப்பட்டுள்ளது. மேலும், விடுமுறை அளிக்கப்பட்டிருக்கும் மாவட்டங்களில், பள்ளிகள் எந்தவித சிறப்பு வகுப்புகளும் நடத்தக்கூடாது என்றும் மாவட்ட ஆட்சியர்கள் எச்சரித்துள்ளனர். மேலும், புதுச்சேரி, காரைக்காலிலும் பள்ளி, கல்லூரிகளுக்கு விடுமுறை அறிவிக்கப்பட்டுள்ளது.
தித்வா புயல் நிலவரம்:
அந்தவகையில், நவ.28 (வெள்ளிக்கிழமை) இரவு 10.30 மணி அளவில் இலங்கை கடலோரப்பகுதிகள் மற்றும் அதனை ஒட்டிய தென்மேற்கு வங்கக்கடல் பகுதிகளில் நிலவிய “தித்வா” புயல் வடக்கு திசையில் நகர்ந்து, இன்று அதிகாலை 2.30 மணி அளவில் அதே பகுதிகளில், இலங்கை திரிகோண மலையிலிருந்து வடமேற்கே சுமார் 80 கிலோ மீட்டர் தொலைவிலும், இலங்கை மட்டக்கிளப்பிலிருந்து வடமேற்கே 190 கிலோ மீட்டர் தொலைவிலும், காரைக்காலிலிருந்து தெற்கு-தென்கிழக்கே 220 கிலோ மீட்டர் தொலைவிலும், புதுவையிலிருந்து தெற்கு-தென்கிழக்கே 330 கிலோ மீட்டர் தொலைவிலும், சென்னையிலிருந்து தெற்கே 430 கிலோ மீட்டர் தொலைவிலும் நிலை கொண்டுள்ளது.
இதையும் படிக்க: தித்வா புயல்…. ‘அவசியமின்றி வெளியே வருவதை தவிர்க்க வேண்டும்’ – முதல்வர் எச்சரிக்கை
இது, மேலும் வடக்கு-வடமேற்கு திசையில் நகர்ந்து, இலங்கை கடலோரப்பகுதிகள் மற்றும் அதனை ஒட்டிய தென்மேற்கு வங்கக்கடல் பகுதிகளை கடந்து, 30ஆம் தேதி அதிகாலை, தென்மேற்கு வங்கக்கடல் பகுதிகளில், வடதமிழகம் – புதுவை மற்றும் அதனை ஒட்டிய தெற்கு ஆந்திர கடலோரப்பகுதிகளுக்கு அருகே நிலவக்கூடும் என்றும் வானிலை மையம் கூறியுள்ளது.
