வதந்தி: கொரோனாவுக்கு நாட்டு மருந்து? தமிழக சுகாதாரத்துறை கடும் எச்சரிக்கை!
Tamil Nadu COVID-19 Fake Remedy Alert: சமூக வலைத்தளங்களில் கொரோனாவுக்கு நாட்டு மருந்து எனப் பரவும் தவறான தகவலை தமிழ்நாடு அரசு மறுத்துள்ளது. மிளகு, தேன், இஞ்சி கலவை கொரோனாவைத் தடுக்கும் என்கிற தகவல் 2018-ம் ஆண்டு சளி மருந்தாக வெளியானதுதான் எனத் தெளிவுபடுத்தப்பட்டுள்ளது.
தமிழ்நாடு ஜூன் 06: கொரோனா (Tamilnadu Covid-19) பெருந்தொற்று மீண்டும் அதிகரிக்கும் என அச்சுறுத்தல் நிலவும் சூழலில், கொரோனா தொற்றுக்கு நாட்டு மருந்து ஒன்றை தமிழ்நாடு பொது சுகாதாரத்துறை அங்கீகரித்துள்ளதாக சமூக வலைத்தளங்களில் ஒரு தவறான தகவல் வேகமாகப் பரவி வருகிறது. இந்த வதந்தியை மறுத்துள்ள பொது சுகாதாரத்துறை, இது போன்ற தவறான தகவல்களைப் பரப்புவோர் மீது கடும் நடவடிக்கை எடுக்கப்படும் என எச்சரித்துள்ளது. பொதுமக்கள் இதுபோன்ற தவறான தகவல்களை நம்ப வேண்டாம் என்றும், அதிகாரப்பூர்வமான தகவல்களை மட்டுமே நம்புமாறும் தமிழக பொது சுகாதாரத்துறை தரப்பில் கேட்டுக்கொள்ளப்பட்டுள்ளது.
பரவி வரும் தவறான தகவல் என்ன?
சமூக வலைத்தளங்களில் பரவி வரும் தகவலில், கொரோனா தொற்று ஏற்பட்டால் மருத்துவமனைக்குச் செல்லத் தேவையில்லை என்றும், மும்பையில் கண்டுபிடிக்கப்பட்ட ஒரு நாட்டு மருந்தை தமிழக அரசு அங்கீகரித்துள்ளதாகவும் குறிப்பிடப்பட்டுள்ளது. மேலும், “ஒரு ஸ்பூன் மிளகு பொடியும், இரண்டு ஸ்பூன் தேன், கால் ஸ்பூன் இஞ்சி சாறும் கலந்து வெறும் வயிற்றில் ஐந்து நாட்கள் தொடர்ந்து சாப்பிட்டு வந்தால் 100% கொரோனாவைத் தடுத்துவிடலாம்” என்றும் அந்தச் செய்தி கூறுகிறது.
தமிழக அரசின் உண்மை சரிபார்ப்பும் மறுப்பும்
இந்தத் தவறான தகவலை தமிழ்நாடு அரசு தகவல் சரிபார்ப்பகம் தெளிவுபடுத்தியுள்ளது. அவர்கள் அளித்த விளக்கத்தின்படி, இந்தக் குறிப்பிட்ட சமையல் குறிப்பு, கடந்த 2018 ஆம் ஆண்டு (கொரோனா பரவலுக்கு முன்னரே) சளி மற்றும் இருமலுக்கான கசாயம் தயாரிக்கும் முறையாக ஒரு இணையதளத்தில் புகைப்படங்களுடன் வெளியிடப்பட்டது. அதே புகைப்படங்களுடன், அந்தக் குறிப்பை கொரோனா மருந்து என்று தற்போது பரப்பி வருகின்றனர்.
உலக சுகாதார நிறுவனத்தின் நிலைப்பாடு
உலக சுகாதார நிறுவனம் (WHO) மற்றும் மத்திய சுகாதாரத்துறை ஆகியவை தேன், இஞ்சி மற்றும் மிளகு ஆகியவை கொரோனாவுக்கு மருந்து என்பதற்கு அறிவியல் பூர்வமாக எந்த ஆதாரமும் இல்லை என்று திட்டவட்டமாக அறிவித்துள்ளன.
தமிழக பொது சுகாதாரத்துறையின் அதிகாரப்பூர்வ அறிவிப்பு
தமிழக பொது சுகாதாரத்துறை மிகவும் தெளிவான அறிவிப்பை https://www.tndphpm.com/#/வெளியிட்டுள்ளது. அதன்படி:
அங்கீகாரம் இல்லை: கொரோனாவிற்கு தமிழ்நாடு பொது சுகாதாரத்துறை எந்தவொரு மருந்து மற்றும் தடுப்பூசிகளையும் அங்கீகரிக்கவில்லை.
அதிகாரப்பூர்வ வழிகாட்டுதல்கள்: உலக சுகாதார நிறுவனம் (WHO) மற்றும் மத்திய சுகாதாரத்துறை என்னென்ன வழிகாட்டுதல்களையும், மருந்துகளையும், தடுப்பூசிகளையும் வழங்க அறிவுறுத்துகிறதோ, அவற்றை மட்டுமே தமிழ்நாடு அரசு சுகாதாரத்துறை செயல்படுத்தும்.
வதந்தி பரப்புவோர் மீது நடவடிக்கை: கொரோனாவைத் தடுக்கும் நாட்டு மருந்தை அரசு அங்கீகரித்ததாகப் பரவும் தகவல் முற்றிலும் தவறானது என்றும், இது போன்ற தவறான தகவல்களைப் பரப்பினால் சம்பந்தப்பட்டவர்கள் மீது கடும் நடவடிக்கை எடுக்கப்படும் என்றும் எச்சரிக்கப்பட்டுள்ளது.
பொதுமக்கள் இதுபோன்ற தவறான தகவல்களை நம்ப வேண்டாம் என்றும், அதிகாரப்பூர்வமான தகவல்களை மட்டுமே நம்புமாறும் தமிழக பொது சுகாதாரத்துறை தரப்பில் கேட்டுக்கொள்ளப்பட்டுள்ளது.
