ஹோட்டலில் ஓசியா சாப்பிட இப்படி செய்வதா? பிரியாணியில் இருந்த பல்லி..!
Coimbatore Restaurant Hoax: கோவை ஆர்எஸ் புரத்தில் உள்ள பிரியாணி கடையில் ரப்பர் பல்லியை வைத்து வீடியோ எடுத்த நான்கு பேர் கைது செய்யப்பட்டுள்ளனர். உணவக உரிமையாளர், இது சதி எனக் கூறி சிசிடிவி ஆதாரங்களை சமர்ப்பித்தார். இதுபோன்ற பொய் வதந்திகள் உணவகங்களின் நற்பெயரை கெடுக்கிறது.
கோவை ஜூன் 06: கோவை ஆர்எஸ் புரம் பகுதியில் உள்ள பிரியாணி கடையில் சிக்கன் குழம்பில் ரப்பர் பல்லி போட்டு வீடியோ எடுத்த நான்கு நபர்களுக்கு போலீசார் வழக்குப் பதிவு செய்துள்ளனர். உணவக உரிமையாளர், இது சதிசெயல் என சிசிடிவி ஆதாரங்களுடன் புகார் அளித்தார். விசாரணையில் உண்மையான பல்லி அல்ல, ரப்பர் பல்லி எனவும், அவர்கள் வருமுன் பத்திரிகையாளர்களுக்கு தகவல் கொடுத்ததும் தெரியவந்தது. இதையடுத்து பவானியைச் சேர்ந்த நான்கு பேருக்கு நடவடிக்கை எடுக்கப்பட்டது. இதேபோல் கடந்த மாதங்களில் காந்திபுரத்தில் பூச்சி வைத்து வீடியோ எடுத்து ஒருவருக்கு வழக்கு நடந்தது. உணவக நற்பெயரை கெடுக்க அல்லது இலவச சாப்பாட்டுக்காக இப்படிப் பொய்வதந்தி பரப்பும் செயல் அதிகரித்து வருகிறது.
உணவில் பல்லி இருப்பதாக பொய் வதந்தி
உணவகத்தில் உணவில் பல்லி இருப்பதாக பொய்வதந்தி பரப்பும் செயல்கள் ஆங்காங்கே நடந்து வருகின்றன. உணவகங்களில் இலவசமாக சாப்பிடவேண்டும் என்ற நோக்கத்தில், உணவில் பூச்சி, பல்லி இருப்பதாக கூறி வதந்தி பரப்பி வீடியோ எடுத்து பதிவேற்றும் செயற்பாடுகள் அதிகரித்துள்ளன. இதனால் உணவக உரிமையாளர்கள் மீது தவறான பழி விழும் நிலை உருவாகியுள்ளது.
இதன் அண்மைச் சம்பவமாக, கோவை ஆர்எஸ் புரம் பகுதியில் செயல்பட்டு வரும் ‘கோவை பிரியாணி’ உணவகத்தில் சிக்கன் குழம்பில் ரப்பர் பல்லியை வேண்டுமென்றே வைத்து வீடியோ எடுத்து சமூக வலைதளங்களில் பரப்பிய நான்கு நபர்களுக்கு போலீசார் எதிராக வழக்குப் பதிவு செய்துள்ளனர். மே 27ம் தேதி அந்த உணவகத்தில் சாப்பிட வந்த நபர்கள், பல்லி இருப்பதாக கூறி ஊழியர்களுடன் வாக்குவாதத்தில் ஈடுபட்ட வீடியோ வைரலானது.
வீடியோவுடன் வதந்தி – உணவகத்திற்கு நேர்ந்த பாதிப்பு
“இதை நீ சாப்பிடுவியா?” என்று கேட்கும் காட்சிகளுடன் வீடியோ எடுத்த அந்த நபர்கள், எத்தனை பேருக்கு இது பரிமாறப்பட்டது எனக் கேட்டு பரபரப்பை ஏற்படுத்தினர். இதனால் உணவகம் தற்காலிகமாக மூடப்பட்டது. பின்னர் உரிமையாளர், இது திட்டமிட்ட சதிதான் எனக் கூறி, சிசிடிவி ஆதாரங்களுடன் காவல் ஆணையரிடம் புகார் அளித்தார்.
சிசிடிவி காட்சியில் மறைமுகக் காட்சிகள் – வெளிவந்த உண்மை
கோவை காவல் துறை விசாரணையில் உணவகத்தில் உண்மையான பல்லி இல்லாமல், அது ரப்பரில் செய்யப்பட்ட பல்லி என தெரியவந்தது. மேலும், வதந்தி பரப்பும் குழு, சம்பவத்திற்கு முன்பே பத்திரிகையாளர்களுக்கு தகவல் வழங்கியிருப்பது கண்டறியப்பட்டது. இதனால் பவானி பகுதியைச் சேர்ந்த நடராஜன் உள்ளிட்ட நான்கு பேருக்கு வழக்குப்பதிவு செய்யப்பட்டது.
முந்தைய சம்பவங்களும் பாதிப்புகளும்
இதேபோல், சில மாதங்களுக்கு முன்பு கோவை காந்திபுரத்தில் உள்ள பிரபல பிரியாணி கடையில் ஒருவரால் பூச்சி வைத்து வீடியோ எடுக்கப்பட்ட சம்பவமும் இருந்தது. சிசிடிவியில் அவரது செயல் பறிக்கபட்டு, அவர் மீது வழக்கு பதிவு செய்யப்பட்டது.
வாழ்வாதாரத்தையே கேள்விக்குறியாக்கும் வதந்திகள்
பொதுவாக உணவகங்களுக்கு எதிரான இவ்வகை தவறான நடவடிக்கைகள், உணவக உரிமையாளர்களின் நற்பெயரை கெடுக்கும்போலவும், சில சமயங்களில் இலவசமாக உணவு சாப்பிடவேண்டும் என்ற நோக்கத்திலும் நடைபெறுகின்றன. உணவகத்தில் பல்லி, பூச்சி என்ற வீடியோக்கள் இணையத்தில் பரவும்போது, பொதுமக்கள் அந்த இடத்திற்கு மீண்டும் செல்ல விரும்பாமல் இருப்பது வாழ்வாதாரத்தை சீர்குலைக்கும் சூழ்நிலையை உருவாக்குகிறது.
