அதிமுக எம்எல்ஏ-க்கள் ராஜினாமா வழக்கு.. உயர்நீதிமன்றம் வைத்த செக்.. அலறவிட்ட இபிஎஸ்!!

சென்னை, செப்.02: தமிழக அரசியலில் பெரும் அதிர்வலைகளை ஏற்படுத்திய அதிமுக சட்டமன்ற உறுப்பினர்களின் ராஜினாமா விவகாரத்தில் தற்போது முக்கிய சட்டப் போராட்டங்களும் புதிய திருப்பங்களும் அரங்கேறி வருகின்றன. தகுதி நீக்க நடவடிக்கைகள் நிலுவையில் இருந்த காலத்தில், அதிமுகவைச் சேர்ந்த 6 எம்.எல்.ஏ-க்கள் அளித்த ராஜினாமா கடிதங்களை பேரவைச் சபாநாயகர் உடனடியாக ஏற்றுக் கொண்டது செல்லாது என அறிவிக்கக் கோரி தொடரப்பட்ட வழக்கில், சென்னை உயர்நீதிமன்றம் தனது இறுதித் தீர்ப்பைத் தேதி குறிப்பிடாமல் ஒத்திவைத்துள்ளது. அதேவேளையில், தனது ராஜினாமாவைத் திரும்பப் பெறக் கோரி இசக்கி சுப்பையா தாக்கல் செய்த மனுக்கள் நீதிமன்றத்தாலும் சட்டப்பேரவைச் செயலராலும் அதிரடியாக நிராகரிக்கப்பட்டுள்ளன.

மேலும் படிக்க: தாய்மாமன் தங்க மோதிரம் திட்டம்.. கோவையில் கணக்கெடுப்பில் இறங்கிய அதிகாரிகள்.. விரைவில் தங்க மழை!

உயர்நீதிமன்றத்தில் காரசார வாதங்கள்:

தலைமை நீதிபதி சுஷ்ருத் அரவிந்த் தர்மாதிகாரி மற்றும் நீதிபதி ஜி. அருள்முருகன் அடங்கிய அமர்வு முன்பாக இந்த வழக்கு மீண்டும் விசாரணைக்கு வந்தது. அப்போது அதிமுக கொறடா அக்ரி கிருஷ்ணமூர்த்தி மற்றும் தேசிய மக்கள் சக்தி கட்சித் தலைவர் எம்.எல்.ரவி ஆகியோர் தரப்பில் ஆஜரான வழக்கறிஞர்கள், எம்.எல்.ஏ-க்கள் ராஜினாமா கடிதத்தைக் கொடுத்த சில நிமிடங்களிலேயே அமைச்சரைச் சந்தித்து தமிழக வெற்றிக் கழகத்தில் (தாவேகா) இணைந்ததாகவும், சபாநாயகர் இதுகுறித்து எவ்வித உரிய விசாரணையையும் நடத்தாமல் அவசர அவசரமாக ராஜினாமாவை ஏற்றுக்கொண்டார் என்றும் வாதிட்டனர்.

இதற்குப் பதிலளித்துப் பேசிய சபாநாயகர் தரப்பு வழக்கறிஞர், சட்டமன்ற உறுப்பினர் ஒருவர் சுயவிருப்பத்தின் பேரில் ராஜினாமா செய்ய முன்வரும்போது, அவரைப் பதவியில் தொடர்ந்து நீடிக்குமாறு சபாநாயகரோ அல்லது அரசோ நிர்பந்திக்க முடியாது என்றும், மக்கள் பிரதிநிதியின் விருப்பத்தை ஏற்று முடிவெடுப்பதே ஜனநாயக நடைமுறை என்றும் வாதிட்டார். இருதரப்பின் விரிவான வாதங்களையும் கேட்டறிந்த நீதிபதிகள், வழக்கின் தீர்ப்பைத் தேதி குறிப்பிடாமல் ஒத்திவைத்து உத்தரவிட்டனர்.

இசக்கி சுப்பையாவின் கூடுதல் மனு நிராகரிப்பு:

வழக்கு விசாரணையின் போது மற்றொரு திருப்பமாக, அம்பாசமுத்திரம் தொகுதியின் முன்னாள் எம்.எல்.ஏ இசக்கி சுப்பையா தரப்பில் கூடுதல் மனு ஒன்று தாக்கல் செய்யப்பட்டது. அதில், தொகுதி மக்கள் பிரதிநிதி இல்லாமல் பாதிக்கப்படுவதால், இடைத்தேர்தல் தொடர்பான வழக்கு முடியும் வரை தன்னை மீண்டும் அம்பாசமுத்திரம் தொகுதி உறுப்பினராகப் பணியாற்ற அனுமதிக்க வேண்டும் எனத் தெரிவிக்கப்பட்டது. ஆனால், இந்த விசித்திரமான கோரிக்கையை ஏற்க முடியாது எனக் கூறி சென்னை உயர்நீதிமன்றம் இசக்கி சுப்பையாவின் கூடுதல் மனுவைத் திட்டவட்டமாக நிராகரித்தது.

அதேபோல், “தனது ராஜினாமாவை ஏற்க வேண்டாம்” எனச் சட்டப்பேரவைச் செயலரிடம் இசக்கி சுப்பையா அளித்த கடிதமும் பேரவைச் செயலகத்தால் நிராகரிக்கப்பட்டது. சட்டப்பேரவை விதிகளின்படி அளிக்கப்பட்ட ராஜினாமாவைத் திரும்பப் பெற வழிவகை இல்லை என்றும், அம்பாசமுத்திரம் தொகுதி ஏற்கனவே காலியான தொகுதியாக அறிவிக்கப்பட்டுவிட்டதால் இடைத்தேர்தல் நடத்துவதே சட்டப்பூர்வத் தீர்வு என்றும் பேரவைச் செயலர் விளக்கம் அளித்துள்ளார்.

மேலும் படிக்க: முதலமைச்சரான பின் முதல் வெளிநாட்டு பயணம்.. லண்டனில் முதலீட்டாளர்களை சந்திக்கும் CM விஜய்!

எடப்பாடி பழனிசாமி காரசார விமர்சனம்:

இந்த விவகாரம் குறித்து கோவையில் செய்தியாளர்களைச் சந்தித்த அதிமுக பொதுச்செயலாளர் எடப்பாடி பழனிசாமி கடுமையாக விமர்சித்துப் பேசினார். “மற்ற கட்சிக்குத் தாவிய எம்.எல்.ஏ-க்களுக்கு அவர்கள் நினைத்தது எதுவும் நடக்கவில்லை; ஆட்சிக்கு வந்துவிடலாம் என எண்ணி அவசரப்பட்டு பதவி விலகிச் சென்றவர்கள், இப்போது மீண்டும் பழைய பதவியே வேண்டும் என நீதிமன்றக் கதவுகளைத் தட்டிக்கொண்டிருப்பது அவர்களது அரசியல் முதிர்ச்சியற்ற தன்மையையே காட்டுகிறது” எனச் சாடினார்.