ஒரே ஆண்டில் அதிக ரன்கள்: சூர்யகுமாரின் சாதனையை முறியடித்தார் இஷான் கிஷன்
Ishan Kishan Creates History : ஒரே ஆண்டில், சர்வதேச டி20 போட்டிகளில் அதிக ரன்கள் குவித்த இந்திய வீரர் என்ற சாதனையை இஷான் கிஷன் படைத்துள்ளார். இதன் மூலம், 2022 ஆம் ஆண்டில் சூர்யகுமார் யாதவ் படைத்திருந்த சாதனையை அவர் முறியடித்துள்ளார்.
ஒரே ஆண்டில், சர்வதேச டி20 போட்டிகளில் அதிக ரன்கள் குவித்த இந்திய வீரர் என்ற சாதனையை இஷான் கிஷன் (Ishan Kishan) படைத்துள்ளார். இதன் மூலம், 2022 ஆம் ஆண்டில் சூர்யகுமார் யாதவ் படைத்திருந்த சாதனையை அவர் முறியடித்துள்ளார். நியூசிலாந்துக்கு எதிராக நவம்பர் 1, 2026 இன்று நடைபெற்ற 5வது டி20 போட்டியில், சூர்யகுமாரின் சாதனையை முறியடிக்க இஷானுக்கு 6 ரன்கள் மட்டுமே தேவைப்பட்டது. தான் சந்தித்த நான்காவது பந்தில் சிக்ஸர் விளாசி, ரன் கணக்கைத் தொடங்கிய அதே ஷாட்டிலேயே சாதனையையும் தனதாக்கினார்.
தொடர்ந்து அதிரடியாக ஆடிய அவர், 32 பந்துகளில் 61 ரன்கள் குவித்து, அந்தப் போட்டியில் இந்தியாவின் அதிகபட்ச ஸ்கோரராகவும் திகழ்ந்தார். இதன் மூலம், 2026 ஆம் ஆண்டில் விளையாடிய 37 டி20 போட்டிகளில் அவர் மொத்தம் 1,220 ரன்கள் குவித்துள்ளார். இந்த ஆண்டில் ஒரு சதமும் 8 அரைசதங்களும் அவர் அடித்துள்ளார். அவரது அதிகபட்ச ஸ்கோர் 103.
இதையும் படிக்க : WTC Points Table: தென்னாப்பிரிக்காவுக்கு எதிரான தோல்வி.. முதலிடத்தை இழந்து 3வது இடத்திற்கு சரிந்த ஆஸ்திரேலியா!
நூலிழையில் தவறவிட்ட அபிஷேக்
இதற்கு முன், 2022 ஆம் ஆண்டில் சூர்யகுமார் யாதவ் 1,164 ரன்கள் குவித்ததே, ஒரு காலண்டர் ஆண்டில் இந்திய வீரர் ஒருவர் எடுத்த அதிகபட்ச டி20 ரன்களாக இருந்தது. உலகின் நம்பர் 1 டி20 பேட்ஸ்மேனான அபிஷேக் சர்மாவுக்கும், இதே போட்டியில் சூர்யகுமாரின் சாதனையை முறியடிக்கும் வாய்ப்பு இருந்தது. ஆனால், 2 பந்துகளில் ஒரு ரன் மட்டுமே எடுத்த அவர், இரண்டாவது ஓவரின் முதல் பந்திலேயே ஆடம் மில்னேவின் பந்துவீச்சில் டேரில் மிட்செலிடம் கேட்ச் கொடுத்து வெளியேறினார். இந்திய வீரர்களில் அதிவேக டி20 சதம் அடித்த சாதனைக்குச் சொந்தக்காரரான அபிஷேக், இந்த ஆண்டு 39 போட்டிகளில் 1,153 ரன்கள் எடுத்துள்ளார்.
2026 ஆம் ஆண்டில் அதிக ரன்கள் குவித்த இந்தியர்கள்
இந்த ஆண்டு அதிக டி20 ரன்கள் குவித்த இந்திய வீரர்களின் பட்டியலில், இஷான் கிஷனும் அபிஷேக் சர்மாவும் முதல் இரண்டு இடங்களில் உள்ளனர். 2026 டி20 உலகக் கோப்பையில் தொடர் நாயகன் விருது வென்ற சஞ்சு சாம்சன் 30 போட்டிகளில் 810 ரன்களுடன் மூன்றாம் இடத்தில் உள்ளார். ஐந்தாவது டி20 போட்டியில் தொடக்க வீரராகக் களமிறங்கிய சாம்சன், 10 பந்துகளில் 4 ரன்கள் மட்டுமே எடுத்து, மில்னேவின் பந்தில் ஆட்டமிழந்தார். திலக் வர்மா, ஷ்ரேயஸ் ஐயர் ஆகியோர் அடுத்தடுத்த இடங்களில் உள்ளனர்.
இதையும் படிக்க : IND vs NZ: குல்தீப், வருண் ஏன் நீக்கப்பட்டனர்? நியூசி. தொடரில் இந்திய அணி தேர்வு குறித்து விளக்கம்!
உலகச் சாதனை படைத்த வீரர்
ஒரு காலண்டர் ஆண்டில் அதிக சர்வதேச டி20 ரன்கள் குவித்த உலகச் சாதனை, ஆஸ்திரியாவின் கரன்பீர் சிங் வசம் உள்ளது. அவர் 2025 ஆம் ஆண்டில் 32 போட்டிகளில் 1,488 ரன்கள் குவித்தார். அவருக்கு அடுத்ததாக, பாகிஸ்தானின் முகமது ரிஸ்வான், 2021 ஆம் ஆண்டில் 29 போட்டிகளில் 1,326 ரன்கள் எடுத்து இரண்டாம் இடத்தில் உள்ளார் என்பது குறிப்பிடத்தக்கது.
