IPL 2027: வீரராக தொடரும் ஹர்திக்.. கேப்டன் பதவிக்கு 2 பெயர்.. மும்பை அணியில் பெரும் மாற்றமா?
Mumbai Indians Changes: கேப்டன் பதவியில் மாற்றம் ஏற்பட வாய்ப்பிருந்தாலும், தலைமைப் பயிற்சியாளர் விஷயத்தில் தொடர்ந்து முன்னாள் இலங்கை கேப்டனும், மும்பை இந்தியன்ஸ் அணியின் தலைமைப் பயிற்சியாளருமான மஹேல ஜெயவர்தனே, 2027 சீசனிலும் இந்தப் பொறுப்பை வகிக்க வாய்ப்புள்ளது. ஜெயவர்தனே 2024-ல் 2+1 ஆண்டு ஒப்பந்தத்தில் மும்பை இந்தியன்ஸ் அணிக்குத் திரும்பினார்.
2026 ஐபிஎல் சீசனில் (IPL 2027) ஏமாற்றமளித்த செயல்திறனுக்குப் பிறகு, மும்பை இந்தியன்ஸ் அணியில் பெரிய மாற்றங்கள் ஏற்பட வாய்ப்புள்ளது. 2027 ஐபிஎல் தொடருக்கான அணியின் தலைமையில் மாற்றம் ஏற்படக்கூடும் என்று தெரிகிறது. குறிப்பாக, மும்பை இந்தியன்ஸின் புதிய கேப்டன் பதவிக்காக இரண்டு பெயர்கள் விவாதிக்கப்பட்டு வருகின்றன. மேலும் இந்த முடிவெடுக்கும் செயல்பாட்டில் முன்னாள் கேப்டன் ரோஹித் ஷர்மாவும் ஈடுபட்டுள்ளார் என்பது தெரியவந்துள்ளது. அதன்படி, ஹர்திக் பாண்ட்யா (Hardik Pandya) ஒரு வீரராக மட்டும் தொடர்வார் என்றும், கேப்டனாக ஒரு வீரருக்கு வாய்ப்பு வழங்கப்பட இருப்பதாக தெரிகிறது.
ரோஹித் சர்மா மீண்டும் கேப்டன் ஆவாரா?
மும்பை இந்தியன்ஸ் அணியின் முன்னாள் கேப்டன் ரோஹித் சர்மா மீண்டும் அணியை வழிநடத்துவாரா என்பது குறித்து முன்னதாகப் பலத்த பேச்சு இருந்தது. இருப்பினும், ரோஹித் மீண்டும் கேப்டன் பொறுப்பை ஏற்க விரும்பவில்லை என்பது தற்போது தெரியவந்துள்ளது. எனவே, மும்பை இந்தியன்ஸ் அணி ஒரு புதிய முகத்திடம் தலைமைப் பொறுப்பை ஒப்படைக்கத் தயாராகி வருவதாகத் தெரிகிறது. கிடைத்த தகவல்களின்படி, திலக் வர்மா மற்றும் ஜஸ்பிரித் பும்ரா ஆகியோர் மும்பை இந்தியன்ஸ் அணியின் கேப்டன் பதவிக்கான முக்கியப் போட்டியாளர்களாக உள்ளனர்.
ஹர்திக் பாண்ட்யா நிலைமை என்ன?
2026ம் ஆண்டு சீசனில் மோசமாக விளையாடியதைத் தொடர்ந்து, ஹர்திக் பாண்ட்யா மும்பை இந்தியன்ஸ் அணியிலிருந்து பரிமாற்றம் செய்யப்படுவது குறித்துப் பேச்சுக்கள் எழுந்தன. பல ஃபிரான்சைஸ்கள் அவர் மீது ஆர்வம் காட்டியுள்ளதாகக் கூறப்படுகிறது. இருப்பினும், அந்தப் பரிமாற்றம் தொடர்பாக இதுவரை உறுதியான முன்னேற்றங்கள் எதுவும் நடைபெறவில்லை. இது தொடர்பாக மும்பை இந்தியன்ஸ் அணி, கொல்கத்தா நைட் ரைடர்ஸ் அணியுடன் சில பேச்சுவார்த்தைகளை நடத்தியதாகவும் கூறப்படுகிறது. சாத்தியமான ஒரு பரிமாற்றத்தில் கேமரூன் கிரீனின் பெயரும் அடிபட்டிருந்தது.
இருப்பினும், வருகின்ற 2027ம் ஆண்டு ஆஸ்திரேலியாவின் பரபரப்பான டெஸ்ட் போட்டி அட்டவணை காரணமாக, கிரீனின் பணிச்சுமை குறித்து மும்பை அணி நிர்வாகம் கவலைப்படுவதாகக் கூறப்படுகிறது. எனவே, ஹர்திக் பாண்ட்யா பரிமாற்றம் செய்யப்படுவதை விட, ஒரு வீரராக அணியில் தக்கவைக்கப்படுவதற்கே அதிக வாய்ப்புள்ளது என்பது தெரியவந்துள்ளது.
பயிற்சியாளராக தொடரும் மஹேல ஜெயவர்தனே:
கேப்டன் பதவியில் மாற்றம் ஏற்பட வாய்ப்பிருந்தாலும், தலைமைப் பயிற்சியாளர் விஷயத்தில் தொடர்ந்து முன்னாள் இலங்கை கேப்டனும், மும்பை இந்தியன்ஸ் அணியின் தலைமைப் பயிற்சியாளருமான மஹேல ஜெயவர்தனே, 2027 சீசனிலும் இந்தப் பொறுப்பை வகிக்க வாய்ப்புள்ளது. ஜெயவர்தனே 2024-ல் 2+1 ஆண்டு ஒப்பந்தத்தில் மும்பை இந்தியன்ஸ் அணிக்குத் திரும்பினார். எனவே, தற்போதைய ஒப்பந்தக் காலத்தின் கடைசியாக 2027ம் ஆண்டு வரை அவரைத் தக்கவைத்துக் கொள்ள முடிவு எடுக்கப்படலாம். ஜெயவர்தனேவின் வழிகாட்டுதலின் கீழ், மும்பை இந்தியன்ஸ் அணி 2025-ல் பிளேஆஃப் சுற்றுக்குத் தகுதி பெற்றது. இருப்பினும், 2026-ல் அணியின் செயல்பாடு மிகவும் ஏமாற்றமளித்ததுடன், மும்பையால் 4 போட்டிகளில் மட்டுமே வெற்றி பெற முடிந்தது.
ALSO READ: சிஎஸ்கே அணியின் வழிகாட்டியாக எம்.எஸ்.தோனி.. பயிற்சியாளராக இவரா?
சூர்யகுமார் யாதவுக்கு கேப்டன்ஷி வழங்கப்படுமா?
இதற்கிடையில், சூர்யகுமார் யாதவின் எதிர்காலம் குறித்தும் பேச்சுக்கள் எழுந்தன. சமீபத்தில், சூர்யகுமார் யாதவ் இந்திய அணியின் டி20 கேப்டன் பதவியிலிருந்து நீக்கப்பட்டார். மேலும், ஐபிஎல் 2026 தொடரில் அவரது செயல்பாடு, அவரைப் பற்றி மும்பை இந்தியன்ஸ் என்ன முடிவு எடுக்கும் என்ற கவனத்தை ஈர்த்திருந்தது. இருப்பினும், சூர்யகுமார் யாதவை விடுவிக்கும் எண்ணம் மும்பை இந்தியன்ஸுக்கு இல்லை என்று தகவலறிந்த வட்டாரங்கள் தெளிவுபடுத்தியுள்ளன. ஒரு மோசமான சீசனின் அடிப்படையில், அனுபவமிக்க வீரரை அணியிலிருந்து விடுவிக்கும் முடிவு மும்பையிடம் இல்லை என்றும் கூறப்படுகிறது.
