IND vs SL: பைனலுக்கு முன்னேற இந்திய அணிக்கு இருக்கும் சவால்.. இலங்கை தொடர் ஏன் முக்கியம்..?
WTC Final Scenario India: இறுதிப் போட்டிக்கு முன்னேறும் வாய்ப்பைத் தக்கவைத்துக் கொள்ள, இந்திய அணிக்கு இன்னும் 9 போட்டிகள் மீதமுள்ளன. அதில், குறைந்தது 7 போட்டிகளில் வெற்றி பெற வேண்டும். 7 போட்டிகளில் வெற்றி பெற்றாலும், இந்திய அணி மற்ற அணிகளைச் சார்ந்திருக்க வேண்டியிருக்கும்.
இலங்கைக்கு எதிரான டெஸ்ட் தொடருக்கான இந்திய அணியை (Indian Cricket Team) இந்திய கிரிக்கெட் கட்டுப்பாட்டு வாரியம் 2026 ஜூலை 28ம் தேதியான இன்று அறிவித்தது. இந்தியா மற்றும் இலங்கை அணிகளுக்கு (IND vs SL Test Series) இடையேயான 2 டெஸ்ட் போட்டிகள் கொண்ட இந்தத் தொடர், வருகின்ற 2026 ஆகஸ்ட் 15ம் தேதி முதல் தொடங்குகிறது. இது 2025-27 உலக டெஸ்ட் சாம்பியன்ஷிப் சுழற்சியின் கீழ் வருகிறது. உலக டெஸ்ட் சாம்பியன்ஷிப் இறுதிப் போட்டிற்கு சுப்மன் கில் தலைமையிலான இந்திய அணி செல்ல வேண்டுமெனில், இந்தத் தொடர் மிகவும் முக்கியமானதாகும்.
ALSO READ: இலங்கைக்கு எதிரான டெஸ்ட் தொடருக்கான இந்திய அணி அறிவிப்பு – பும்ரா, சாய் சுதர்சன் நிலை என்ன?
தற்போது, இந்திய அணியின் புள்ளி சதவீதம் 48.15 ஆக உள்ளது. இது, புள்ளிப் பட்டியலில் முதலிடத்தில் இருக்கும் ஆஸ்திரேலியாவை விடக் கணிசமாகக் குறைவாகும். இந்தியா தற்போது புள்ளிப் பட்டியலில் 5வது இடத்தில் உள்ளது. 2027-ல் நடைபெறும் உலக டெஸ்ட் சாம்பியன்ஷிப் இறுதிப் போட்டியில் விளையாட விரும்பினால், வரவிருக்கும் டெஸ்ட் தொடரில் கண்டிப்பாக வெற்றியை பெறுவது முக்கியம். இறுதிப் போட்டிக்கு இந்திய அணி தகுதி பெறுவதற்கான வாய்ப்புகள் பற்றி தெரிந்து கொள்வோம்.
இந்தியாவுக்கு இன்னும் எத்தனை தொடர்களும் போட்டிகளும் மீதமுள்ளன?
உலக டெஸ்ட் சாம்பியன்ஷிப் 2025-27 தொடரில் இந்திய அணிக்கு இன்னும் 9 போட்டிகள் மீதமுள்ளன. இலங்கைக்கு எதிரான 2 டெஸ்ட் போட்டிகள், அதைத் தொடர்ந்து நியூசிலாந்துக்கு எதிரான 2 டெஸ்ட் போட்டிகள் கொண்ட தொடர் மற்றும் ஆஸ்திரேலியாவுக்கு எதிரான 5 போட்டிகள் கொண்ட சொந்த மண்ணில் நடைபெறும் டெஸ்ட் தொடர் ஆகியவை இதில் அடங்கும். இந்த 9 போட்டிகளின் முடிவுகளே இந்திய அணி இறுதிப் போட்டிக்குத் தகுதி பெறுமா என்பதைத் தீர்மானிக்கும்.
இறுதி போட்டிக்கான சமன்பாடு:
இறுதிப் போட்டிக்கு முன்னேறும் வாய்ப்பைத் தக்கவைத்துக் கொள்ள, இந்திய அணிக்கு இன்னும் 9 போட்டிகள் மீதமுள்ளன. அதில், குறைந்தது 7 போட்டிகளில் வெற்றி பெற வேண்டும். 7 போட்டிகளில் வெற்றி பெற்றாலும், இந்திய அணி மற்ற அணிகளைச் சார்ந்திருக்க வேண்டியிருக்கும். இந்திய அணி 8 போட்டிகளில் வெற்றி பெற்றால், அதன் புள்ளி சதவீதம் 68.5 ஆக உயரும். இந்திய அணி மீதமுள்ள 9 போட்டிகளிலும் வெற்றி பெற்றால், அதன் புள்ளி சதவீதம் 74.1 ஆக உயர்ந்து, இறுதிப் போட்டிக்கு முன்னேறும் வாய்ப்புகள் அதிகரிக்கும்.
ALSO READ: இந்தியா-இலங்கை டெஸ்ட் தொடர் எப்போது, எங்கு நடைபெறும்? முழு அட்டவணை இதோ!
2021 மற்றும் 2023-ஆம் ஆண்டுகளில் இந்தியா இறுதிப் போட்டிகளில் விளையாடி, முறையே நியூசிலாந்து மற்றும் ஆஸ்திரேலியாவிடம் தோற்றது என்பது குறிப்பிடத்தக்கது. 2025ம் ஆண்டில், இந்திய அணி இறுதிப் போட்டிக்குத் தகுதி பெறத் தவறியது.
