மத்திய அமைச்சரவையில் விரைவில் மாற்றம்? மாநிலங்களவை வேட்பாளர் பட்டியல் தரும் முக்கிய அறிகுறி!

டெல்லி, ஜுன் 10: மத்தியில் பிரதமர் நரேந்திர மோடி தலைமையிலான அமைச்சரவையில் விரைவில் பெரிய அளவில் மாற்றங்கள் செய்யப்படலாம் என்ற எதிர்பார்ப்பு அரசியல் வட்டாரங்களில் வலுத்துள்ளது. பாஜகவின் பல்வேறு மாநிலப் பிரிவுகளில் மேற்கொள்ளப்பட்டு வரும் புதிய மாற்றங்கள் மற்றும் ஜூன் 18-ஆம் தேதி நடைபெறவுள்ள மாநிலங்களவைத் தேர்தலுக்கான வேட்பாளர்கள் ஒதுக்கீடு ஆகியவற்றைத் தொடர்ந்து இந்த ஊகங்கள் எழுந்துள்ளன. பாஜக தலைமையிலான தேசிய ஜனநாயகக் கூட்டணி (NDA) அரசு 12 ஆண்டுகளை நிறைவு செய்துள்ள நிலையிலும், அதன் மூன்றாவது பதவிக்காலத்தின் இரண்டாவது ஆண்டு நடந்து வரும் சூழலிலும், பிரதமர் மோடி தனது அமைச்சரவையில் இந்த மாற்றங்களை மேற்கொள்ள வாய்ப்புள்ளதாக தகவல்கள் வெளியாகியுள்ளது.

இதையும் படிக்க: பதவியேற்று 4399 நாட்கள்.. நேருவைப் பின்னுக்குத் தள்ளி பிரதமர் மோடி மாபெரும் சாதனை!

கட்சிப் பதவிக்கு மாறும் மத்திய அமைச்சர்கள்?

பாஜகவின் புதிய தேசியத் தலைவராக நிதின் நபின் நியமிக்கப்பட உள்ளதாகவும், இம்மாத இறுதிக்குள் அவரது தலைமையிலான புதிய குழு அறிவிக்கப்படும் என்றும் கூறப்படுகிறது. இதன் காரணமாக, தற்போது மத்திய அமைச்சரவையில் பொறுப்பில் இருக்கும் சில முக்கியத் தலைவர்கள் விடுவிக்கப்பட்டு, அவர்களுக்குக் கட்சியில் முக்கியப் பொறுப்புகள் வழங்கப்படலாம் எனத் தெரிகிறது. இதன் தொடக்கமாக, ஏற்கனவே டெல்லி மாநில பாஜக தலைவராக மத்திய அமைச்சர் ஹர்ஷ் மல்ஹோத்ராவும், உத்தரப் பிரதேச மாநில பாஜக தலைவராக மற்றொரு மத்திய அமைச்சர் பங்கஜ் சௌத்ரியும் நியமிக்கப்பட்டுள்ளனர். புதிய அமைப்பை வலுப்படுத்துவதற்காக நிதின் நபின் பல்வேறு மாநிலங்களுக்குப் பயணம் மேற்கொண்டு நிர்வாகிகளுடன் ஆலோசனையில் ஈடுபட்டு வருகிறார்.

மாநிலங்களவை சீட் மறுப்பு:

தற்போது மத்திய அமைச்சர்களாகப் பதவி வகிக்கும் ரவ்நீத் சிங் பிட்டு மற்றும் ஜார்ஜ் குரியன் ஆகியோரின் மாநிலங்களவை பதவிக்காலம் விரைவில் முடிவடைய உள்ளது. ஜூன் 18 அன்று நடைபெறவிருக்கும் மாநிலங்களவைத் தேர்தலுக்கான பாஜக வேட்பாளர் பட்டியலில் இவர்களின் பெயர்கள் இடம்பெறாதது பெரும் ஆச்சரியத்தை ஏற்படுத்தியுள்ளது. பஞ்சாப் முன்னாள் முதல்வர் பியந்த் சிங்கின் பேரனான இவருக்கு மீண்டும் சீட் வழங்கப்படாததற்குக் காரணம், அடுத்த ஆண்டு தொடக்கத்தில் பஞ்சாபில் நடைபெறவிருக்கும் சட்டமன்றத் தேர்தலே ஆகும். ஆளும் ஆம் ஆத்மி கட்சியிடமிருந்து பஞ்சாபைக் கைப்பற்ற பாஜக திட்டமிட்டுள்ளதால், பிட்டுவை முழுமையாகப் பஞ்சாப் தேர்தல் பணிகளில் களம் இறக்க கட்சி தலைமை முடிவு செய்துள்ளது.

கேரளாவைச் சேர்ந்த மூத்த பாஜக தலைவரான இவர், சமீபத்தில் அம்மாநிலத்தில் நடந்த சட்டமன்றத் தேர்தலில் தோல்வியடைந்தது குறிப்பிடத்தக்கது. கடந்த 2022-ஆம் ஆண்டிலும் இதேபோல் மத்திய அமைச்சர்களாக இருந்த முக்தார் அப்பாஸ் நக்வி மற்றும் ஆர்.சி.பி. சிங் ஆகியோர் தங்களின் மாநிலங்களவை பதவிக்காலம் முடிவதற்குள் ராஜினாமா செய்ததும், பின்னர் அவர்களுக்கு மீண்டும் சீட் வழங்கப்படவில்லை என்பதும் இங்கு நினைவு கூரத்தக்கது.

மாநிலங்களவை தேர்தலில் புது முகங்கள்:

பாஜகவின் பலத்தின் அடிப்படையில் குஜராத் (4 இடங்கள்), ராஜஸ்தான் (2), மத்தியப் பிரதேசம் (2), மணிப்பூர் (1), அருணாச்சலப் பிரதேசம் (1) ஆகிய மாநிலங்களில் உள்ள 10 இடங்களையும், ஒடிசா இடைத்தேர்தல் இடத்தையும் பாஜக எளிதாகக் கைப்பற்றும் சூழல் உள்ளது. இவற்றுக்கான வேட்பாளர் தேர்வில் பாஜக பல்வேறு வியூகங்களைக் கையாண்டுள்ளது:

பிஜேடியிலிருந்து (BJD) விலகி பாஜகவில் இணைந்த தேபாசிஷ் சமந்தராய் ஒடிசா இடைத்தேர்தலில் வேட்பாளராக நிறுத்தப்பட்டுள்ளார். மணிப்பூரில் மாநிலத் தலைவர் ஏ. சாரதா தேவியும், அருணாச்சலப் பிரதேசத்தில் முன்னாள் மாநிலத் தலைவர் தாய் தகாக்கும் வேட்பாளர்களாக அறிவிக்கப்பட்டுள்ளனர். குஜராத் மாநிலத்தில் இதர பிற்படுத்தப்பட்ட வகுப்பினர் மற்றும் பழங்குடியின சமூகங்களுக்கு முக்கியத்துவம் அளிக்கும் வகையில் ராஜுபாய் சுக்லா, முகேஷ்பாய் ரத்வா, மான்சிங் பார்மர், ஜிதேந்திர கன்சாரியா ஆகிய நான்கு புதிய மற்றும் இளம் முகங்களுக்கு வாய்ப்பு வழங்கப்பட்டுள்ளது.

இதையும் படிக்க: மாநிலங்களவை வேட்புமனு நிராகரிப்பு.. காங்கிரஸ் தலைவர்கள் தர்ணா.. நீதிமன்றத்தை நாட முடிவு!

ஒட்டுமொத்தமாக, வரவிருக்கும் சட்டமன்றத் தேர்தல்களை எதிர்கொள்ளும் வகையிலும், கட்சியின் உள்கட்டமைப்பைப் பலப்படுத்தும் வகையிலும் இந்த அமைச்சரவை மற்றும் கட்சி மறுசீரமைப்பு அமையவுள்ளது என்பதை இந்த மாற்றங்கள் தெளிவுபடுத்துகின்றன.