‘ஜனநாயகனை’ தேர்வு செய்த தமிழகம்.. ஆட்சி அமைக்க விஜய் முன் இருக்கும் சாத்தியக்கூறுகள் என்னென்ன?.. முழு விவரம்!!

தமிழக சட்டமன்றத் தேர்தலில் “தளபதி” விஜய் ஒரு வரலாற்றுச் சிறப்புமிக்க வெற்றியை நோக்கி நகர்ந்து கொண்டிருக்கிறார். மக்கள் அவரை “ஜனநாயகன்” என மகுடம் சூட்டியுள்ள போதிலும், தமிழக வெற்றிக் கழகம் ஆட்சி அமைக்கத் தேவையான பெரும்பான்மையை (118 இடங்கள்) எட்டுவதில் சிறிய சவால் நீடிக்கிறது. இதனால், தமிழகத்தில் அடுத்த அரசை அமைக்க விஜய்க்கு மற்றவர்களின் ஆதரவு தேவைப்படும் நிலை உள்ளது. 234 தொகுதிகளைக் கொண்ட தமிழக சட்டமன்றத்தில், தற்போதைய நிலவரப்படி தமிழக வெற்றிக் கழகம் 100க்கும் மேற்பட்ட இடங்களில் முன்னிலை வகித்து வருகிறது.

மேலும் படிக்க: Tamil Nadu Election 2026 Results LIVE: தமிழ்நாட்டை ஆளப்போவது யார்? முன்னிலையில் தவெக!

கூட்டணியை நோக்கி விஜய்:

அதனைதொடர்ந்து, அதிமுக கூட்டணி 75 இடங்களில் முன்னிலை பெற்று 2வது இடத்திலும், திமுக கூட்டணி 60 இடங்களில் முன்னிலை பெற்று 3வது இடத்திலும் உள்ளன. இதில், அதிமுகவுக்கும், திமுகவுக்கும் இடையே கடுமையான போட்டி நிலவுகிறது. “விஜய் அலை” திராவிடக் கோட்டைகளைத் தகர்த்திருந்தாலும், கணித ரீதியாகத் தனித்து ஆட்சி அமைப்பது சவாலாக உள்ளது. இந்தச் சூழலில், ஒரு ‘சோலோ ஹீரோ’வாகத் தெரிந்த விஜய், தற்போது ஒரு ‘கூட்டணி வடிவமைப்பாளராக’ (Coalition Architect) மாற வேண்டிய கட்டாயத்தில் உள்ளார். இன்றைய தேர்தல் முடிவுகள் இப்படியிருக்க, தமிழகத்தில் அடுத்த ஆட்சி அமைவதற்கு இருக்கும் மூன்று முக்கிய வாய்ப்புகளை பார்க்கலாம்.

 சிறிய கட்சிகளின் ஆதரவு:

தவெக 105 முதல் 112 இடங்களுக்குள் வெற்றி பெற்றால், பெரும்பான்மைக்குத் தேவையான மீதமுள்ள இடங்களுக்கு விஜய் சிறிய கட்சிகளை அணுகலாம். தற்போதைய நிலவரப்படி காங்கிரஸ் (3), பாமக (7), சிபிஐ (2) மற்றும் விசிக (2) ஆகியவை முக்கியமான இடங்களைக் கொண்டுள்ளன. இதில், சாதகம் என்னவென்றால், பெரிய எதிரிகளிடம் அதிகாரத்தை விட்டுக் கொடுக்காமல் தனது ‘கிங்’ அந்தஸ்தைத் தக்கவைக்க முடியும். அதேசமயம் தவெகவுக்கு பாதகம் என்றால், சிறிய கட்சிகள் முக்கியமான அமைச்சரவை பதவிகளைக் கோரலாம். இது விஜய்யின் “முடிவு சார்ந்த” நலத்திட்ட மாடலுக்குச் சவாலாக அமையலாம்.

நிலையான மாபெரும் கூட்டணி:

மாநிலத்தின் இரண்டாவது பெரிய சக்தியாக அதிமுக விளங்குவதால், தவெக-அதிமுக கூட்டணி அமைந்தால் 180க்கும் மேற்பட்ட இடங்களுடன் அசைக்க முடியாத பெரும்பான்மை கிடைக்கும். எடப்பாடி பழனிசாமியின் நிர்வாக அனுபவம் விஜய்யின் முதல் அரசுக்கு நிலைத்தன்மையைத் தரும். இதற்கு நிபந்தனையாக, அதிமுக பாஜகவுடனான உறவைத் துண்டிக்க வேண்டும் என விஜய் கோர வாய்ப்புள்ளது. ஏனெனில், “மதச்சார்பற்ற சமூக நீதி” என்ற கொள்கையில் உருவான தவெக, நீட் (NEET) மற்றும் ஹிந்தி திணிப்பு போன்ற உணர்வுப்பூர்வமான விவகாரங்களில் தனது தளத்தை இழக்க விரும்பாது என்று நம்பப்படுகிறது.

“இந்தியா” கூட்டணித் திருப்புமுனை:

விஜய் திமுகவை தனது “முதல் அரசியல் எதிரி” என்று அறிவித்திருந்தாலும், காங்கிரஸ் ஒரு சமரசத் தூதராகச் செயல்பட வாய்ப்புள்ளது. தேசிய நிலைத்தன்மைக்காக விஜய்யை ‘இந்தியா’ கூட்டணியில் இணைய காங்கிரஸ் சம்மதிக்க வைத்தால் ஒரு “மதச்சார்பற்ற முன்னணி” உருவாகலாம். இதில் சவால் என்னவென்றால், திமுகவின் “வாரிசு அரசியல் மற்றும் ஊழலை” எதிர்ப்பதே விஜய்யின் பிராண்டாக இருப்பதால், ஸ்டாலினுடன் கைகோர்ப்பது வாக்காளர்களுக்குச் செய்யும் துரோகமாகக் கருதப்படலாம்.

இதையும் படிக்க: சரிந்தது திமுக கோட்டை: வெறிச்சோடிய அறிவாலயம்..பின்வாசல் வழியாக வெளியேறிய திமுக புள்ளிகள்!

இந்திய அரசியலில் “எதுவும் நடக்கலாம்” என்பதே ஒரே விதி. முன்பு வாஜ்பாய் தலைமையிலான பாஜக அரசில் அமைச்சராக இருந்த மம்தா பானர்ஜி, இன்று அதே பாஜகவை மிகத் தீவிரமாக எதிர்ப்பதை இதற்கு உதாரணமாகக் கொள்ளலாம். தமிழகத்தின் அடுத்த முதலமைச்சராகப் பதவியேற்கப் போவது யார்? என்பது குறித்து இன்று மாலைக்குள் முழுமையான விடை கிடைத்துவிடும்.