ஆட்சி அமைப்பது தொடர்பாக கட்சி நிர்வாகிகளுடன் விஜய் முக்கிய ஆலோசனை..

சென்னை, மே 4, 2026: தமிழக சட்டப்பேரவைத் தேர்தலின் வாக்கு எண்ணிக்கை இன்று காலை 8 மணிக்கு தொடங்கி நடைபெற்று வருகிறது. இதில் தற்போது வரை தமிழக வெற்றிக்கழகம் முன்னிலை வகித்து வருகிறது. தமிழக வெற்றிக்கழகம் சுமார் 16 தொகுதிகளில் முன்னிலையில் உள்ளது. அதேபோல், இரண்டாவது இடத்தில் அதிமுகவும், மூன்றாவது இடத்தில் திமுகவும் உள்ளன.

கட்சி நிர்வாகிகளுடன் முக்கிய ஆலோசனை:

இந்த சூழலில், தமிழக வெற்றிக்கழகம் ஆட்சி அமைப்பது தொடர்பாக அரசியல் ஆலோசகர் ஜான் ஆரோக்யசாமியிடம் முன்னதாக ஆலோசனை மேற்கொண்டார். அதனைத் தொடர்ந்து, தற்போது பணையூரில் உள்ள தமிழக வெற்றிக்கழக அலுவலகத்தில் கட்சி நிர்வாகிகளுடன் முக்கிய ஆலோசனையில் ஈடுபட்டு வருகிறார். தமிழகத்தில் ஆட்சி அமைப்பது தொடர்பாகவும், தேர்தல் முடிவுகள் தொடர்பாகவும் இந்த ஆலோசனை நடைபெற்று வருகிறது. இதில் வேட்பாளர்களுக்கு பல்வேறு முக்கிய அறிவுறுத்தல்கள் வழங்கப்படும் என தெரிவிக்கப்பட்டுள்ளது.

2026 சட்டமன்றத் தேர்தலுக்கான வாக்குப்பதிவு ஏப்ரல் 23ஆம் தேதி ஒரே கட்டமாக நடைபெற்ற நிலையில், இன்று காலை 8 மணி முதல் வாக்கு எண்ணிக்கை விறுவிறுப்பாக நடைபெற்று வருகிறது. தபால் வாக்குகளின் எண்ணிக்கையுடன் தொடங்கி, தற்போது வரை தமிழக வெற்றிக்கழகம் முன்னிலை வகித்து வருகிறது. இந்த நிலையில், தமிழகத்தில் அடுத்த ஆட்சி அமைக்கப் போவது யார்? அடுத்த முதல்வர் யார்? என்ற கேள்வி மக்கள் மத்தியில் தொடர்ந்து எழுந்து வருகிறது.