ஆபத்தில் ஓடியவர்கள், “தவெக குறித்து மக்கள் முடிவெடுப்பார்கள்”.. சபாநாயர் அப்பாவு தாக்கு!!
2026ல் திமுக மீண்டும் ஆட்சிக்கு வரும் என நம்பிக்கை தெரிவித்த சபாநாயகர் அப்பாவு, அதிமுக எம்எல்ஏக்களின் ராஜினாமா அவர்களது தனிப்பட்ட விருப்பம் என்றும் கூறினார். மேலும், பாஜக–ஆர்.எஸ்.எஸ். அரசியல் நுணுக்கங்களில் திறமைசாலிகள்; அவர்கள் எந்த நேரத்தில் என்ன முடிவு எடுப்பார்கள் என்பது தெரியாது என்றும் அவர் பேசியுள்ளார்.
நாகர்கோவில், நவம்பர் 30: 2026 சட்டமன்றத் தேர்தலுக்கு முன்பு, சட்டமன்றம் கூடும் வாய்ப்பு இருப்பதாக சபாநாயகர் அப்பாவு கூறியுள்ளார். அதோடு, செங்கோட்டையன் மற்றும் மனோஜ் பாண்டியன் ஆகியோரின் ராஜினாமா அதிகாரப்பூர்வமாக ஏற்கப்பட்டுள்ளதால், அவர்கள் இனி எம்எல்ஏக்கள் கிடையாது என்றும் அவர் தெரிவித்துள்ளார். தமிழகத்தில் சட்டமன்ற தேர்தல் நெருங்கி வருகிறது. இன்னும் ஓரிரு மாதங்களில் தேர்தலுக்கான அதிகாரப்பூர்வ அறிவிப்பு வெளியாகிவிடும். இந்த சூழலில் தமிழக அரசியல் களமும் பரபரப்பாக காணப்படுகிறது. குறிப்பாக தவெக வருகையால், இந்த தேர்தல்களம் முற்றிலும் புதுமையானதாக இருக்கும் எனத் தெரிகிறது. அந்தவகையில், அதிமுக மூத்த தலைவரான செங்கோட்டையன், தற்போது தவெகவில் இணைந்துள்ளார். அதோடு, மேலும் மூத்த தலைவர்கள் பலர் அதிமுகவில் இருந்து அடுத்தடுத்து வெளியேறுவார்கள் என்றும் அவர் கூறி பரபரப்பை ஏற்படுத்தியுள்ளார். இதன் மூலம் அதிமுக இத்தேர்தலை எதிர்கொள்வது சவாலானதாக இருக்கும் என்றும் அரசியல் விமர்சகர்கள் கூறுகின்றனர்.
மேலும் படிக்க: சென்னைக்கு மிக கனமழை எச்சரிக்கை… 47 விமானங்கள் ரத்து – பயணிகளுக்கு முக்கிய அறிவிப்பு
தவெக குறித்து மக்கள் முடிவெடுப்பார்கள்:
இந்தசூழலில் நாகர்கோவிலில் செய்தியாளர்களை சந்தித்த சபாநாயகர் அப்பாவு, தற்போதைய அரசியல் சூழலில், தவெக குறித்த முடிவை மக்கள் எடுப்பார்கள். கரூர் கூட்டநெரிசல் சம்பவத்தில் பல உயிரிழப்புகள் நடந்தபோது, சிலர் அங்கிருந்து விலகி சென்ற நிலையில், முதலமைச்சர் ஸ்டாலின் நேரில் சென்று, காயமடைந்தவர்களுக்கு தேவையான மருத்துவ உதவிகளை உடனடியாக உறுதிசெய்தார். உயிரிழந்தவர்களின் குடும்பத்துக்கு அரசு சார்பில் ரூ.10 லட்சம் நிவாரண உதவியும் அறிவிக்கப்பட்டது.
2026 தேர்தலில் மீண்டும் திமுக வெற்றி பெறும்:
இதன் மூலம் எழும் கேள்வி என்னவென்றால், மக்களுக்கு சிரமம் ஏற்பட்டால் யார் நழுவிச் செல்வார்கள், யார் நின்று துணைபுரிவார்கள்? என்றதே என்றார். மக்களே இதை கவனித்து மதிப்பீடு செய்து வருகிறார்கள். இதனை கருத்தில் கொண்டால், 2026 சட்டமன்றத் தேர்தலில் திமுக பெரும் வெற்றியைப் பெறும் என்ற நம்பிக்கை வலுவாக இருக்கிறது. மீண்டும் மு.க. ஸ்டாலின் முதல்வர் பதவியேற்பார் என்பதில் திமுக உறுதியாக உள்ளது என்றும் கூறினார்.
அதே நேரத்தில், அதிமுக எம்எல்ஏக்கள் ராஜினாமா செய்வது முழுமையாக அவர்களது தனிப்பட்ட முடிவாகும். செங்கோட்டையன் சமீபத்தில் அமித் ஷாவை இரண்டு முறை சந்தித்ததோடு, நிதியமைச்சர் நிர்மலா சீதாராமனையும் சந்தித்திருந்தார். இதனால், செங்கோட்டையன் பாஜக உயர்நிலைத் தலைவர்களின் அறிவுறுத்தலின் படி செயல்படுவதாக ஊடகங்களில் கூறப்படுகிறது.
மேலும் படிக்க: கோவையில் 3 மணி நேரத்தில் 13 வீடுகளில் கொள்ளை – என்ன நடந்தது?
ஸ்லீப்பர் செல் எனக் கூறுவது சரியல்ல:
செங்கோட்டையன் நீண்டகாலம் சட்டமன்றத்தில் மதிப்புக்குரிய உறுப்பினராக இருந்தவர். ஆனால் அவர் புதிய கட்சியில் இணைந்தவுடன் சில ஊடகங்கள் அவரை “ஸ்லீப்பர் செல்” என குறிப்பிடுவது சரியல்ல. பாஜக மற்றும் ஆர்எஸ்எஸ் அரசியல் நுணுக்கங்களில் திறமைசாலிகள்; அவர்கள் எந்த நேரத்தில் என்ன முடிவு எடுப்பார்கள் என்பதில் தெரியாது. ஆனால், உண்மை என்னவென்றால் கரூர் உயிரிழப்பு சம்பவத்தில் 41 பேரின் உயிர் பலியாகிய நேரத்தில் அங்கிருந்து விலகிச் சென்றவர்களையே, செங்கோட்டையன் இன்று அணுகியிருக்கிறார் என்பதே என்றும் அவர் வருத்தம் தெரிவித்தார்.
