டாப் 5 பட்டியலில் இடம்பிடித்த தமிழக முதல்வர் விஜய்.. உலகளவில் கவனம் ஈர்த்து புதிய சாதனை..

தமிழக அரசியலில் ஒரு புதிய அத்தியாயம் தொடங்கியுள்ளது. தமிழகத்தின் 9வது முதல்வராகப் பொறுப்பேற்றுள்ள நடிகர் விஜய், நிர்வாக ரீதியிலான நடவடிக்கைகளுக்கு முன்பாகவே டிஜிட்டல் தளத்தில் உலகையே திரும்பிப் பார்க்க வைக்கும் ஒரு சாதனையைப் படைத்துள்ளார். அவர் பதவியேற்ற 24 மணி நேரத்திற்குள்ளேயே, தமிழக முதல்வர் அலுவலகத்தின் (CMO Tamil Nadu) அதிகாரப்பூர்வ இன்ஸ்டாகிராம் பக்கம் அடைந்துள்ள வளர்ச்சி, அரசியல் வரலாற்றில் முன்னெப்போதும் இல்லாத ஒன்றாகப் பார்க்கப்படுகிறது. ஒரு மாநிலத்தின் முதல்வர் பதவியேற்றவுடன், அந்த அலுவலகத்தின் அதிகாரப்பூர்வ பக்கங்களுக்குப் பின்தொடர்பவர்கள் அதிகரிப்பது இயல்பானது. ஆனால், முதல்வர் விஜய் பதவியேற்ற ஒரே நாளில் மட்டும் சுமார் 20 லட்சம் புதிய பின்தொடர்பாளர்கள் இந்தப் பக்கத்தில் இணைந்துள்ளனர். இதன் மூலம் அந்தப் பக்கம் தற்போது மிகக்குறுகிய காலத்தில் உலகளாவிய கவனத்தைப் பெற்றுள்ளது. திரையுலகில் அவருக்கு இருந்த ரசிகர் பட்டாளம், தற்போது அரசியல் ரீதியாகவும் பெரும் ஆதரவாக மாறியிருப்பதை இது காட்டுகிறது.

இதையும் படிக்க: அரசியல் ரீதியாக பதிவிடும் எக்ஸ் கணக்குகள் முடக்கம் – தமிழக அரசின் உத்தரவுக்கு நீதிமன்றம் தடை

டாப் 5ல் இடம்பிடித்த தமிழக முதல்வர்:

இந்திய அளவில் சமூக வலைதளங்களில் செல்வாக்கு மிக்க முதல்வர்களின் பட்டியல் தற்போது மாற்றமடைந்துள்ளது. தேசிய அரசியலில் செல்வாக்கு பெற்ற பாஜக முதல்வர்களின் ஆதிக்கத்திற்கு மத்தியில், தென்னிந்தியாவிலிருந்து முதல்வர் விஜய் ஒரு முக்கிய இடத்தைப் பிடித்துள்ளார். தற்போதைய நிலவரப்படி முதல் 5 இடங்கள். முதலிடம் – யோகி ஆதித்யநாத்: உத்தர பிரதேச முதல்வர் 2.52 கோடி பின்தொடர்பாளர்களுடன் அசைக்க முடியாத முதலிடத்தில் நீடிக்கிறார். இரண்டாம் இடம் – பஜன்லால் சர்மா: ராஜஸ்தான் முதல்வர் இரண்டாம் இடத்தில் உள்ளார். மூன்றாம் இடம் – தேவேந்திர பட்னவிஸ்: மகாராஷ்டிர முதல்வர் மூன்றாம் இடத்தைப் பிடித்துள்ளார். நான்காம் இடம் – விஜய்: தமிழக முதல்வர் விஜய், குறுகிய காலத்திலேயே 45.12 லட்சம் பின்தொடர்பாளர்களுடன் நான்காவது இடத்திற்கு முன்னேறி ஆச்சரியத்தை ஏற்படுத்தியுள்ளார். ஐந்தாம் இடம் – மோகன் சரண் மாஜி: ஒடிசா முதல்வர் ஐந்தாவது இடத்தில் உள்ளார்.

தேசிய அரசியலில் ஒரு டிஜிட்டல் மாற்றம்:

வழக்கமாக, வட இந்திய மாநில முதல்வர்களே டிஜிட்டல் தளங்களில் அதிக ஆதிக்கம் செலுத்தி வந்தனர். ஆனால், தற்போது தமிழக முதல்வர் அலுவலகத்தின் டிஜிட்டல் பக்கம் மின்னல் வேகத்தில் வளர்ந்து வருவது தேசிய அளவில் ஒரு புதிய விவாதத்தை ஏற்படுத்தியுள்ளது. குறிப்பாக, பாஜக அல்லாத ஒரு மாநில முதல்வர், அதுவும் பதவியேற்ற ஒரு சில நாட்களிலேயே இவ்வளவு பெரிய எண்ணிக்கையைப் பெறுவது ஒரு முக்கிய அரசியல் நகர்வாகக் கருதப்படுகிறது.

இளைஞர்களின் எழுச்சியும் அரசியல் செல்வாக்கும்:

இந்த அசுர வேக வளர்ச்சிக்கு முக்கிய காரணமாகப் பார்க்கப்படுவது தமிழக இளைஞர்களின் ஆதரவுதான். விஜய்யின் திரைப்பயணத்தில் அவருக்கு முதுகெலும்பாக இருந்த இளைஞர்கள் மற்றும் தொழில்நுட்பத்தைப் பயன்படுத்தும் புதிய தலைமுறை வாக்காளர்கள், தற்போது அவரது அரசியல் பயணத்தையும் டிஜிட்டல் ரீதியாகக் கொண்டாடி வருகின்றனர். அரசியல் நோக்கர்களின் கருத்துப்படி, “இது வெறும் எண்கள் மட்டுமல்ல; விஜய்க்கு மக்கள் மத்தியில், குறிப்பாக இளைஞர்கள் மத்தியில் இருக்கும் அசாத்தியமான செல்வாக்கை இது பிரதிபலிக்கிறது. வரும் காலங்களில் அரசின் திட்டங்களை மக்களிடம் நேரடியாகக் கொண்டு சேர்க்க இந்த டிஜிட்டல் பலம் அவருக்குப் பெரிதும் உதவும்” எனத் தெரிவிக்கின்றனர்.

இதையும் படிக்க: தமிழகத் தேர்தலில் வெளிநாட்டுக் குடியுரிமை பெற்றவர்கள் வாக்களிப்பு.. சென்னை விமான நிலையத்தில் சிக்கிய 3 பேர் கைது!!

நிர்வாகமும் டிஜிட்டல் யுகமும்:

தமிழக முதல்வர் அலுவலகம் இனிவரும் காலங்களில் வெளிப்படைத்தன்மையுடன் செயல்படவும், மக்களின் குறைகளை விரைவாகக் கேட்டறியவும் இத்தகைய டிஜிட்டல் தளங்களை ஒரு பாலமாகப் பயன்படுத்தத் திட்டமிட்டுள்ளது. முதல்வரின் ஒவ்வொரு நகர்வும், அறிவிப்பும் உடனுக்குடன் லட்சக்கணக்கானோரைச் சென்றடைவது, நவீன கால அரசியலில் அவருக்கு ஒரு கூடுதல் பலமாக அமையும் என்பதில் சந்தேகமில்லை.