“அதிமுகவின் இந்த நிலைக்கு காரணமே அவர் தான்!”.. இபிஎஸ்-க்கு எஸ்.பி.வேலுமணி காட்டமான பதிலடி!!
SP Velumani Edappadi Palaniswami AIADMK row: அதிமுகவிலிருந்து பிரிந்து சென்றவர்களை மீண்டும் இணைப்பது தொடர்பாக எழுந்த விவகாரத்தில், எடப்பாடி பழனிசாமியால்தான் கட்சி இந்த நிலையில் இருப்பதாக முன்னாள் அமைச்சர் எஸ்.பி. வேலுமணி பதிலடி கொடுத்துள்ளார். தொண்டர்களின் கருத்தைத் தலைமை கேட்க வேண்டும் என்றும், தொண்டன் முடிவெடுத்தால் என்ன வேண்டுமானாலும் நடக்கலாம் என்றும் அவர் பதிவிட்டுள்ளார்.
கோவை, நவ.22: அதிமுகவில் பிரிந்து சென்றவர்களை மீண்டும் சேர்க்க வேண்டும் என்ற கருத்து தொடர்பாக எழும் விவாதங்களுக்கு இடையே, எடப்பாடி பழனிசாமியால்தான் அதிமுக இந்த நிலையில் இருப்பதாக முன்னாள் அமைச்சர் எஸ்.பி. வேலுமணி காட்டமாகப் பதிலடி கொடுத்துள்ளார். கோவையில் செய்தியாளர்களிடம் பேசிய எடப்பாடி பழனிசாமி, அதிமுகவின் இரண்டு கோடி உறுப்பினர்களில் ஒருவர்தான் எஸ்.பி. வேலுமணி என்றும், அவர் குறித்துக் கேட்க வேண்டாம் என்றும் கூறியிருந்தார். இந்தக் கருத்தைச் சுட்டிக்காட்டி சமூக வலைதளமான ‘எக்ஸ்’ தளத்தில் பதிவிட்டுள்ள எஸ்.பி. வேலுமணி, தொண்டன் முடிவெடுத்து விட்டால் என்ன வேண்டுமானாலும் நடக்கலாம் என்பதைத் தலைமை உணர வேண்டும் எனச் சூசகமாகத் தெரிவித்துள்ளார்.
இதையும் படிக்க: “முதலமைச்சருக்கு அரோகரா முழக்கம்!”.. திருச்செந்தூர் விழா விவகாரத்தில் மதுரை உயர் நீதிமன்றத்தில் வழக்கு!
கோவையில் பழனிசாமி அளித்த பதிலின் பின்னணி:
அதிமுகவிலிருந்து பிரிந்து சென்றவர்களை மீண்டும் கட்சிக்குள் சேர்க்க வேண்டும் என எஸ்.பி. வேலுமணி முன்வைத்த கருத்து தொடர்பாகக் கோவையில் செய்தியாளர்கள் கேள்வி எழுப்பினர். அதற்குப் பதிலளித்த எடப்பாடி பழனிசாமி, கட்சியில் இரண்டு கோடி உறுப்பினர்கள் உள்ள நிலையில் அதில் ஒருவர்தான் வேலுமணி என்றும், அவர் தனிப்பட்ட முறையில் எதையும் கூற முடியாது என்பது போல் குறிப்பிட்டு அவர் குறித்துக் கேட்க வேண்டாம் எனக் கூறினார். இந்தப் பதில் கட்சிக்குள் நிலவும் கருத்து வேறுபாடுகளை வெளிச்சத்திற்குக் கொண்டு வந்துள்ளது.
பிரிந்து சென்றவர்கள் குறித்த விமர்சனம்:
“2 கோடி தொண்டரின் ஒருவர் தான் வேலுமணி”
என்னை உதாசீனப் படுத்துவதாக எண்ணி அவர் சொல்லி இருந்தாலும், இதை விட எனக்கு வேறென்ன பெருமை இருக்கப் போகிறது ?
அனைத்திந்திய அண்ணா திராவிட முன்னேற்றக் கழகத்தின் தொண்டன் என்பது தான் என்னுடைய முதல் அடையாளம். இந்த இயக்கத்தின் கொடிபிடிக்கும் தொண்டன் என்பதை விட வேறு எந்தப் பதவியும் எனக்கு பெரிதல்ல.
என்னைத் #தொண்டரில்_ஒருவன் என்று சொன்ன கழகப் பொதுச் செயலாளர் அவர்களுக்கு நன்றி.
இந்த 2 கோடித் தொண்டர்களால் கொண்டுவரப்பட்டு தான் தாங்கள் இன்றைக்கு பொதுச் செயலாளர் பொறுப்பில் உள்ளீர்கள்.
கொடிபிடிக்கும் அந்த தொண்டன் தான் இந்த இயக்கத்தின் ஆணிவேர். அவன் ஆடினால் இந்த இயக்கம் ஆடும். அந்த தொண்டன் ஒரு முடிவை எடுத்துவிட்டால்….. என்ன வேண்டுமானாலும் நடக்கலாம். அதை ஒரு நல்ல தலைமை உணர வேண்டும்.
ஒவ்வொரு தொண்டனின் குரலையும் கேட்பது தான் ஒரு தலைமைக்கு அழகு.
கடைக்கோடி தொண்டன் பத்திரிகை வைத்தால், அந்த கல்யாணத்தில் புரட்சித் தலைவர் எம்ஜிஆர் இருப்பார். கடைக்கோடி தொண்டனின் குரலுக்கு மாண்புமிகு அம்மா அவர்களின் கான்வாயே நிற்கும். பொறுப்பில் இருப்பவர்களை விட, இயக்கத்தை உயிராய் நேசித்த அந்த அடிப்படைத் தொண்டனைத் தான் நம் தலைவர்கள் அதிகம் நேசித்தார்கள்; மதித்தார்கள்!
“இந்த இயக்கத்தை நேசிக்கும் எல்லோரும் எந்த பிரிவினையும் இல்லாமல் ஒற்றுமையாக செயல்பட வேண்டும்” என்று சொல்வது வேலுமணி என்கிற ஒரு தொண்டன் மட்டுமா? இல்லையே- 2 கோடி தொண்டரில் யாரைக் கேட்டாலும் இதைத் தான் சொல்வார்கள்.
திருமதி. வி.கே. சசிகலா, திரு. டிடிவி தினகரன் ஆகியோர் தனி இயக்கம் ஆரம்பிக்கும் முன் பலமுறை நம் கழகத்தில் இணைந்து பணியாற்ற முன்வந்தார்கள்.
முன்னாள் முதல்வர் திரு. ஓ. பன்னீர்செல்வம், முன்னாள் அமைச்சர் திரு. R. வைத்திலிங்கம் ஆகியோர் திமுக-வுக்கு செல்லும் முடிவை எளிதாக எடுக்கவில்லை. அதற்கு முன் பலமுறை தங்களை ஆளாக்கிய இந்த இயக்கத்தில் பயணிக்க வேண்டும் என்று பல முயற்சிகளை எடுத்தார்கள்.
அதேபோல், இன்றைக்கு மாண்புமிகு அமைச்சராக இருக்கும் திரு. கே.ஏ. செங்கோட்டையன் அவர்கள், மாண்புமிகு பேரவைத் தலைவராக உள்ள திரு. ஜே.சி.டி. பிரபாகர் அவர்கள் உள்ளிட்ட பலர் கழகத்தில் இணைந்து பயணிக்க பலமுறை முயற்சி எடுத்தும், நீங்கள் ஒரே ஒருவர் ஒப்புக்கொள்ளாமல் விடாப்பிடியாக இருந்ததால் தான் அவர்கள் எல்லாம் தமிழக வெற்றிக் கழகத்துக்கு சென்றார்கள்.
இப்படி, தங்களுக்கு அடையாளம் கொடுத்த இயக்கத்தை விட்டுக்கொடுக்காமல் வந்தவர்களை, எப்போதும் போல உதாசீனப் படுத்தி அனுப்பிவைத்து தான் இன்றைக்கு இந்த நிலைமையில் இருக்கிறோம் என்பதை ஒருகணம் உணர வேண்டும்.
பொதுச் செயலாளர் அவர்களிடம் எப்போதும் நான் கேட்பது என்று தான்- வேலுமணி உள்ளிட்ட அந்த 2 கோடி தொண்டர்கள் என்ன சொல்ல வருகிறார்கள் என்று ஒருமுறை காது கொடுத்துக் கேளுங்கள்.
“தாய்வழி வந்த
தங்கங்கள் எல்லாம்
ஓர்வழி நின்று
நேர்வழி சென்றால்
நாளை நமதே!”— S.P. Velumani (@SPVelumanicbe) November 21, 2026
எடப்பாடி பழனிசாமியின் கருத்துக்குப் பதிலளித்து வெளியிட்டுள்ள பதிவில், சசிகலா, டி.டி.வி. தினகரன், ஓ. பன்னீர்செல்வம் மற்றும் செங்கோட்டையன் உள்ளிட்டோர் அதிமுகவில் மீண்டும் இணையப் பலமுறை முயற்சி செய்ததாக எஸ்.பி. வேலுமணி சுட்டிக்காட்டியுள்ளார். ஆனால், எடப்பாடி பழனிசாமி மட்டுமே அதற்கு ஒப்புக்கொள்ளாமல் விடாப்பிடியாக இருந்ததாகவும், அவர்களை உதாசீனப்படுத்தி அனுப்பி வைத்ததால்தான் இன்றைக்குக் கட்சி இந்த நிலையில் உள்ளது என்பதைப் பழனிசாமி உணர வேண்டும் எனவும் அவர் தெரிவித்துள்ளார்.
இதையும் படிக்க: ராணிப்பேட்டை பெண் கொலை வழக்கில் திடுக் திருப்பம்.. நகைக்காக பெற்ற தாயை மகளே கொன்றது அம்பலம்!!
தொண்டர்களின் கருத்துக்கு முக்கியத்துவம்:
கட்சியின் தற்போதைய நிலைக்குக் காரணங்களை அலசி ஆராய்ந்து, தொண்டர்கள் கூற வரும் கருத்துகளை எடப்பாடி பழனிசாமி ஒருமுறையாவது காது கொடுத்துக் கேட்க வேண்டும் என எஸ்.பி. வேலுமணி கேட்டுக்கொண்டுள்ளார். தொண்டர்களின் மனநிலையைப் புரிந்து கொண்டு தலைமை செயல்பட வேண்டியதன் அவசியத்தையும், தொண்டர்கள் முடிவெடுக்கும் பட்சத்தில் ஏற்படக்கூடிய விளைவுகளையும் தலைமை உணர வேண்டும் என்ற தொனியிலும் அவரது பதிவு அமைந்துள்ளது.