AQI
TV9 NETWORK LOGO
Default Image
Sign In

By signing in or creating an account, you agree with Associated Broadcasting Company's Terms & Conditions and Privacy Policy.

Latest Newsதமிழ்நாடுகிரிக்கெட்பொழுதுபோக்குவெப் ஸ்டோரிஸ்லைஃப்ஸ்டைல்வணிகம்டெக்னாலஜிஇந்தியாஆன்மீகம்உலகம்ஹெஃல்த்வைரல்போட்டோ கேலரி

சூரசம்ஹார சர்ச்சை.. திருச்செந்தூர் கோயிலில் தனிமனித துதிப் பாடல்களுக்கு தடை.. கோயில் நிர்வாகம் அதிரடி அறிவிப்பு!

Tiruchendur Temple Bans Individual Praise Songs: திருச்செந்தூர் சுப்பிரமணிய சுவாமி திருக்கோயிலில் இனிவரும் காலங்களில் ஆன்மீகம் சாராத கோஷங்கள் மற்றும் தனிமனித துதிப் பாடல்களுக்குத் தடை விதித்து கோயில் நிர்வாகம் அறிவிப்பு வெளியிட்டுள்ளது. சூரசம்ஹார நிகழ்வின் போது எழுப்பப்பட்ட கோஷங்களால் சர்ச்சை எழுந்த நிலையில், கலைஞர்களுக்கு இந்த அறிவுறுத்தல் வழங்கப்பட்டுள்ளது.

சூரசம்ஹார சர்ச்சை.. திருச்செந்தூர் கோயிலில் தனிமனித துதிப் பாடல்களுக்கு தடை.. கோயில் நிர்வாகம் அதிரடி அறிவிப்பு!
திருச்செந்தூர் கோவில்
Esakkiraja Selvarathinam
Esakkiraja Selvarathinam | Published: 22 Nov 2026 07:57 AM IST

தூத்துக்குடி, நவ.22: அறுபடை வீடுகளில் இரண்டாம் படை வீடான திருச்செந்தூர் சுப்பிரமணிய சுவாமி திருக்கோயிலில் இனிவரும் காலங்களில் ஆன்மீகம் சாராத கோஷங்கள் மற்றும் தனிமனித துதிப் பாடல்களுக்குத் தடை விதித்து கோயில் நிர்வாகம் அறிவிப்பு வெளியிட்டுள்ளது. சமீபத்தில் திருச்செந்தூர் கோயிலில் நடைபெற்ற கந்த சஷ்டி சூரசம்ஹார நிகழ்வின் போது, பங்கேற்ற கலைக்குழுவினர் மற்றும் பாடகர்கள் தமிழ்நாடு முதலமைச்சர் மற்றும் இந்து சமய அறநிலையத்துறை அமைச்சருக்கு ‘அரோகரா’ என முழக்கமிட்டது பக்தர்கள் மற்றும் பொதுமக்கள் மத்தியில் பெரும் சர்ச்சையை ஏற்படுத்தியிருந்தது. இறைவனுக்கு அர்ப்பணிக்கப்படும் ஆன்மீக முழக்கங்களைத் தனிமனிதப் புகழுக்காகப் பயன்படுத்தியதாக எழுந்த விமர்சனங்களும், பல்வேறு தரப்பிலிருந்து வந்த எதிர்ப்புகளும் இந்த விவகாரத்தைக் தீவிரப்படுத்தின. இந்தச் சூழலில், திருக்கோயில் நிகழ்வுகளின் புனிதத்தையும் ஆன்மீகத் தன்மையையும் பாதுகாக்கும் வகையில் கோயில் நிர்வாகம் தரப்பில் இந்த முக்கிய உத்தரவு பிறப்பிக்கப்பட்டுள்ளது.

இதையும் படிக்க: “முதலமைச்சருக்கு அரோகரா முழக்கம்!”.. திருச்செந்தூர் விழா விவகாரத்தில் மதுரை உயர் நீதிமன்றத்தில் வழக்கு!

சூரசம்ஹார நிகழ்வில் எழுந்த சர்ச்சை:

திருச்செந்தூர் திருக்கோயிலில் ஆண்டுதோறும் நடைபெறும் கந்த சஷ்டி விழா மற்றும் சூரசம்ஹார நிகழ்வைக் காண ஏராளமான பக்தர்கள் கூடுவது வழக்கம். அண்மையில் நடைபெற்ற சூரசம்ஹார நிகழ்வின் போது எழுப்பப்பட்ட கோஷங்கள் தொடர்பான காணொளிகள் சமூக வலைதளங்களில் பரவி, பக்தர்களிடையே மனவேதனையையும் விவாதத்தையும் கிளப்பின. ஆன்மீக வழிபாட்டுத் தலத்தில் நடைபெறும் நிகழ்வுகளில் அரசியல் அல்லது தனிமனிதப் புகழ்பாடும் வகையில் முழக்கங்கள் எழுப்பப்பட்டதாக அரசியல் கட்சிகளும் அமைப்புகளும் கண்டனம் தெரிவித்த நிலையில், இது தொடர்பாக விளக்கம் கோரும் சூழலும் உருவானது. இத்தகைய சர்ச்சைகளுக்கு முற்றுப்புள்ளி வைக்கும் விதமாகவே கோயில் நிர்வாகம் கட்டுப்பாடுகளைக் கடுமையாக்கியுள்ளது.

கலைஞர்களுக்கு கோயில் நிர்வாகம் அறிவுறுத்தல்:

இனிவரும் காலங்களில் திருச்செந்தூர் கோயில் நிர்வாகத்தால் ஏற்பாடு செய்யப்படும் அனைத்து ஆன்மீக நிகழ்ச்சிகள் மற்றும் பக்தி இன்னிசை நிகழ்ச்சிகளில் பங்கேற்கும் கலைஞர்கள், இறைபக்தி தொடர்பான வசனங்கள் மற்றும் பாடல்களை மட்டுமே பாட வேண்டும் எனக் கோயில் நிர்வாகம் தெளிவாக அறிவுறுத்தியுள்ளது. பக்தி நிகழ்ச்சிகளின் அடிப்படை நோக்கம் இறைவழிபாடும் ஆன்மீக அனுபவமும் என்பதால், நிகழ்ச்சிகளில் பங்கேற்கும் பாடகர்கள் மற்றும் கலைக்குழுவினர் மரபான பக்திப் பாடல்களுக்கும் இறைவணக்கத்திற்கும் முன்னுரிமை அளிக்க வேண்டும் எனத் தெரிவிக்கப்பட்டுள்ளது.

இதையும் படிக்க: ராணிப்பேட்டை பெண் கொலை வழக்கில் திடுக் திருப்பம்.. நகைக்காக பெற்ற தாயை மகளே கொன்றது அம்பலம்!!

ஆன்மீகம் சாராதவற்றை தவிர்க்க உத்தரவு:

நிகழ்ச்சிகளில் பங்கேற்கும் கலைஞர்கள் ஆன்மீகத்துடன் எவ்விதத் தொடர்பும் இல்லாத கோஷங்களையும், தனிமனிதத் துதிப் பாடல்களையும் கட்டாயம் தவிர்க்க வேண்டும் எனக் கோயில் நிர்வாகம் திட்டவட்டமாக உத்தரவிட்டுள்ளது. சூரசம்ஹார நிகழ்வில் ஏற்பட்ட சர்ச்சையைத் தொடர்ந்து வெளியிடப்பட்டுள்ள இந்த அறிவிப்பு, எதிர்காலத்தில் கோயில் வளாகத்தில் நடைபெறும் நிகழ்ச்சிகளில் பின்பற்றப்பட வேண்டிய விதிமுறைகளைத் தெளிவுபடுத்துவதுடன், பக்தர்களின் ஆன்மீக உணர்வுகளைப் பாதுகாக்கும் நடவடிக்கையாகவும் பார்க்கப்படுகிறது.

Follow Us