பாஜகவில் இருந்து விலகி தவெகவில் இணைந்த விஜயதரணி.. அதிரடி முடிவுக்கு காரணம் என்ன?..

சென்னை, ஜுன் 13: தமிழக அரசியல் களத்தில் முக்கியத் திருப்பமாக, விளவங்கோடு தொகுதி முன்னாள் சட்டமன்ற உறுப்பினரான விஜயதரணி, பாரதிய ஜனதா கட்சியிலிருந்து விலகி, நடிகர் விஜய் தலைமையிலான ‘தமிழக வெற்றிக் கழகத்தில்’ இணைந்தார். விஜயதரணி நீண்ட காலம் காங்கிரஸ் கட்சியில் பயணித்தவர் ஆவார். காங்கிரஸ் கட்சியில் பெண்களுக்குப் போதிய முக்கியத்துவம் மற்றும் அங்கீகாரம் வழங்கப்படவில்லை என்றும், ஒரு குறிப்பிட்ட சிலர் மட்டுமே முன்னிலைப்படுத்தப்படுகிறார்கள் என்றும் குற்றம் சாட்டி, கடந்த 2024-ஆம் ஆண்டு பிப்ரவரி மாதம் தனது விளவங்கோடு சட்டமன்ற உறுப்பினர் பதவியை ராஜினாமா செய்துவிட்டு பாஜகவில் இணைந்தார்.

இதையும் படிக்க: அண்ணாமலை வெளியேறிய பின் அமித்ஷா நடத்திய ஆலோசனை.. தமிழக பாஜக தலைவர்களிடம் சொன்ன ‘பாசிட்டிவ்’ வார்த்தை..

பிரதமர் நரேந்திர மோடியின் தலைமையின் மீது ஈர்க்கப்பட்டு பாஜக-வில் இணைந்த அவருக்கு, கடந்த இரண்டு ஆண்டுகளாகக் கட்சியில் குறிப்பிடத்தக்க அளவிலான முக்கியப் பொறுப்புகள் எதுவும் வழங்கப்படவில்லை எனக் கூறப்படுகிறது.

2026 தேர்தல் தோல்வியும் முடிவும்:

அண்மையில் நடந்து முடிந்த 2026 தமிழக சட்டமன்றத் தேர்தலில், அதிமுக தலைமையிலான தேசிய ஜனநாயகக் கூட்டணியில் பாஜக போட்டியிட்ட 27 தொகுதிகளில், விளவங்கோடு தொகுதியின் வேட்பாளராக விஜயதரணி களம் இறக்கப்பட்டார். இந்தத் தேர்தலில் அவர் சுமார் 45,600-க்கும் மேற்பட்ட வாக்குகளைப் பெற்ற போதிலும், இறுதியில் தோல்வியைத் தழுவினார். இந்தத் தேர்தல் தோல்வியின் எதிரொலியாகவும், கட்சியில் முக்கியத்துவம் இல்லாததாலும் பாஜக-விலிருந்து விலக அவர் முடிவு செய்ததாகத் தெரிகிறது.

தவெக-வில் இணைந்த விஜயதரணி:

பாஜகவில் இருந்து விலகி @TVKPartyHQ -வில் இணைந்தார் விஜய் தரணி ! 🙏 https://t.co/owoqVeG1uG pic.twitter.com/ilr4yu99i0

— Prakash Vijay (@PrakazVijay_Of) June 13, 2026

பாஜக-விலிருந்து வெளியேறிய விஜயதரணி, இன்று சென்னை பனையூரில் உள்ள தமிழக வெற்றிக் கழகத்தின் தலைமை அலுவலகத்திற்கு தனது ஆதரவாளர்களுடன் சென்றார். அங்கு தவெக-வின் மாநில நிர்வாகிகள் ஆனந்த், ஆதவ் அர்ஜுனா முன்னிலையில் அவர் தன்னை முறைப்படி அக்கட்சியில் இணைத்துக் கொண்டார்.

கட்சியில் இணைந்ததைத் தொடர்ந்து, பாஜக-விலிருந்து விலகியதற்கான காரணங்கள் மற்றும் தமிழக வெற்றிக் கழகத்தில் இணைந்தது குறித்தான தனது அடுத்தகட்ட அரசியல் நகர்வுகள் குறித்து விஜயதரணி செய்தியாளர்களைச் சந்தித்து விரிவான பேட்டி அளிக்க உள்ளதாகவும் தகவல்கள் தெரிவிக்கின்றன.

இதையும் படிக்க: கர்நாடகா சென்ற முதல்வர் விஜய்.. கறுப்புக்கொடி காட்ட முயன்ற கன்னட அமைப்பினர்.. காரணம் தெரியுமா?..

காங்கிரஸ், பாஜக ஆகிய தேசியக் கட்சிகளைத் தொடர்ந்து, தற்போது தமிழகத்தின் வளர்ந்து வரும் மாநிலக் கட்சியான தவெக-வில் விஜயதரணி இணைந்துள்ளது அரசியல் வட்டாரத்தில் பெரும் விவாதத்தைக் கிளப்பியுள்ளது.