பெண்களின் பாதுகாப்பை உறுதி செய்யும் சிங்கப்பெண் சிறப்பு அதிரடி படை.. நாளை தொடங்கி வைக்கும் முதல்வர் விஜய்..

ஜூன் 8, 2026: தமிழகத்தில் பெண்களின் பாதுகாப்பை உறுதி செய்யவும், குற்றச் செயல்களை முறியடிக்கவும் தமிழக அரசு முன்னெடுத்துள்ள முக்கிய திட்டமான ‘சிங்கப்பெண் சிறப்பு அதிரடிப்படை’ நாளை (ஜூன் 9) மாலை சென்னையில் அதிகாரப்பூர்வமாக தொடங்கப்பட உள்ளது. கடந்த மே 10ஆம் தேதி தமிழக முதல்வராக பொறுப்பேற்ற விஜய், தனது முதல் கையெழுத்தாக பெண்களின் பாதுகாப்பிற்காக இந்த அதிரடிப்படையை உருவாக்கும் கோப்பில் கையெழுத்திட்டிருந்தார். தற்போது, இந்தத் திட்டத்தை நடைமுறைப்படுத்துவதற்கான அனைத்து ஏற்பாடுகளும் முழுவீச்சில் நிறைவடைந்துள்ளன.

சிங்கப்பெண் சிறப்பு அதிரடி படை – நாளை தொடக்கம்:

நாளை மாலை 5 மணிக்கு சென்னை எழும்பூரில் உள்ள ராஜரத்தினம் விளையாட்டு மைதானத்தில் நடைபெறவுள்ள பிரம்மாண்ட விழாவில், முதல்வர் விஜய் இந்தச் சிறப்பு அதிரடிப்படையை தொடங்கி வைக்கிறார். இந்தத் திட்டத்தின் முக்கியத்துவத்தை கருத்தில் கொண்டு, மைதானத்தில் விழா ஏற்பாடுகள் தீவிரமாக மேற்கொள்ளப்பட்டு வருகின்றன.

மேலும் படிக்க: ராஜ்யசபா இடைத்தேர்தல்… போட்டியின்றி தேர்வாகிறார் பிரவீன் சக்கரவர்த்தி!

இந்த அதிரடிப்படைக்காகப் பிரத்தியேகமான சீருடை வடிவமைக்கப்பட்டுள்ளது. நீல நிறச் சட்டை, காக்கி நிற பேன்ட், கருப்புத் தொப்பி மற்றும் கருப்பு ஷூ என பெண் காவலர்கள் மிடுக்கான தோற்றத்துடன் காட்சியளிக்கும் வகையில் இந்த உடை வடிவமைக்கப்பட்டுள்ளது.

சிறப்புகள் என்ன?

இந்த அதிரடிப்படைக்கு ஐ.ஜி. பவானீஸ்வரி தலைமை தாங்குகிறார். இவருடன் ஒரு காவல் கண்காணிப்பாளர், இரண்டு துணை காவல் கண்காணிப்பாளர்கள், நான்கு ஆய்வாளர்கள் மற்றும் 30-க்கும் மேற்பட்ட பெண் காவலர்கள் அடங்கிய குழு நியமிக்கப்பட்டுள்ளது. இந்தப் படையின் முதல் பெண் அதிகாரியாகவும் பவானீஸ்வரி நியமிக்கப்பட்டுள்ளார்.

இந்தத் திட்டத்தில் இடம்பெற்றுள்ள பெண் காவல்துறையினர் மற்றும் பெண் துணை ஆய்வாளர்களுக்கு சிறப்பு சீருடைகளுடன் அதற்கேற்ற தொப்பி மற்றும் காலணிகளும் வழங்கப்பட்டுள்ளன.

விழாவில் பங்கேற்கவுள்ள காவலர்கள் கடந்த சில நாட்களாக தீவிர பயிற்சியில் ஈடுபட்டு வருகின்றனர். அரசின் முக்கிய முன்னெடுப்பாகக் கருதப்படும் இந்தத் திட்டம் தொடர்பாக ஒவ்வொரு அம்சமும் மிகுந்த கவனத்துடன் திட்டமிடப்பட்டு செயல்படுத்தப்பட்டு வருகிறது.

முதல்வர் விஜய் தொடங்கி வைக்க உள்ளார்:

ஏற்கனவே, இந்த அதிரடிப்படையை கடந்த மே 29ஆம் தேதி முதல்வர் விஜய் தொடங்கி வைக்க திட்டமிடப்பட்டிருந்தது. ஆனால், பல்வேறு காரணங்களால் அன்றைய நிகழ்ச்சி ரத்து செய்யப்பட்டிருந்தது. இந்த சூழலில், தற்போது நாளை மாலை நடைபெறும் விழாவில் ‘சிங்கப்பெண் சிறப்பு அதிரடிப்படை’ அதிகாரப்பூர்வமாக செயல்பாட்டுக்கு வர உள்ளது.

மேலும், ஒவ்வொரு மாவட்டத்திலும் சிங்கப்பெண் சிறப்பு அதிரடிப்படை காவல்துறையினர் நாளை முதல் தங்களது பணியை தொடங்க உள்ளனர் என்பது குறிப்பிடத்தக்கது.