Ajinkya Rahane: 278வது கேப்.. ஓய்வு பெற்றது ஏன்..? காரணத்தை விளக்கும்போது கண்கலங்கிய ரஹானே!
Ajinkya Rahane Retirement: அஜிங்க்யா ரஹானே 2007-ல் மும்பை அணிக்காக உள்ளூர் போட்டிகளில் அறிமுகமானார். ரஹானே இதுவரை 205 முதல் தரப் போட்டிகளில் 42 சதங்கள் உட்பட 14,209 ரன்கள் எடுத்தார். மேலும், 192 லிஸ்ட் ஏ போட்டிகளில் 6,853 ரன்களும், 308 டி20 போட்டிகளில் 7,968 ரன்களும் எடுத்தார்.
இந்திய பேட்ஸ்மேனும் முன்னாள் கேப்டனுமான அஜிங்க்யா ரஹானே (Ajinkya Rahane) அனைத்து விதமான கிரிக்கெட்டிலிருந்து தனது ஓய்வை அறிவித்துள்ளார். சமூக வலைதளங்களில் காணொளி மூலம் ரஹானே தனது ரசிகர்களுக்கு இந்தத் தகவலைத் தெரிவித்தார். 38 வயதான ரஹானே நீண்ட காலமாக இந்திய அணிக்காக (Indian Cricket Team) விளையாடவில்லை. அவர் தனது கடைசி சர்வதேசப் போட்டியை 2023ம் ஆண்டு வெஸ்ட் இண்டீஸ் அணிக்கு எதிராக விளையாடினார். மும்பை அணிக்காக உள்ளூர் போட்டிகளில் விளையாடி வரும் ரஹானே, 2011-ஆம் ஆண்டு இந்திய அணியில் அறிமுகமானார். கடந்த 3 ஆண்டுகளாக இந்திய அணிக்குத் திரும்புவார் என எதிர்பார்த்தார். ஆனால் இறுதியில் எதுவும் நடக்காததால், ரஹானே தனது ஓய்வை அறிவித்தார்.
தனது ஓய்வு குறித்து அஜிங்க்யா ரஹானே, இன்ஸ்டாகிராமில் ஒரு வீடியோவைப் பதிவிட்டு, “கேப் 278 இப்போது விடைபெறுகிறார். இத்தனை ஆண்டுகளாக நான் பெற்ற அன்புக்கும் ஆதரவுக்கும் நன்றி. நான் எப்போதும் நன்றியுடன் இருப்பேன். வாழ்க்கையின் உண்மை என்னவென்றால், எல்லாவற்றிற்கும் ஒரு தொடக்கமும் முடிவும் உண்டு. சரியான நேரம் வரும்போது, நாம் அதை மதித்து முன்னோக்கிச் செல்ல வேண்டும். நான் எப்போதும் எனது பேட்டிங்கில் டைமிங்கை நம்பியிருந்தேன், அதன் முக்கியத்துவத்தையும் அறிவேன். சர்வதேச கிரிக்கெட்டிலிருந்தும், அனைத்து வகையான கிரிக்கெட்டிலிருந்தும் எனது ஓய்வை அறிவிக்க இதுவே சரியான நேரம் என்று இன்று நான் உணர்கிறேன்” என்று எழுதியுள்ளார்.
ALSO READ: உலகக் கோப்பையுடன் வரும் ஆசியக் கோப்பை.. அடுத்த ஆண்டு எங்கு எப்போது நடைபெறுகிறது?
தனது ஆரம்பகாலம் குறித்துப் பேசிய ரஹானே , “சிறுவயதில் பயிற்சிக்காக டோம்பிவ்லிக்குச் சென்று வந்த காலத்திலிருந்தே, இந்த விளையாட்டுக்காக எனது முழு உழைப்பையும் கொடுத்துள்ளேன். ஒவ்வொரு நாளும், ஒவ்வொரு இன்னிங்ஸிலும், ஒவ்வொரு பேட்டிங் வாய்ப்பிலும், இந்திய அணியின் தொப்பியை அணிய வேண்டும் என்பதே எனது ஒரே கனவாக இருந்தது. நான் எப்போதும் ஒரு விதியைப் பின்பற்றி வந்துள்ளேன். எப்போதும் என்னை விட என் நாட்டிற்கும் என் அணிக்கும் முன்னுரிமை கொடுப்பேன். நான் இந்த விளையாட்டை முழு நேர்மையுடன் விளையாடியுள்ளேன். உங்கள் நோக்கங்கள் தூய்மையாக இருந்தால், இந்த விளையாட்டு உங்களை எப்போதும் கவனித்துக் கொள்ளும் என்று நான் எப்போதும் நம்புகிறேன்” என்றார்.
முதல் தர கிரிக்கெட்டை நினைவு கூர்ந்த ரஹானே:
View this post on Instagram
தனது முதல் தர கிரிக்கெட் அறிமுகத்தை நினைவு கூர்ந்த அஜ்ஜு, “நான் ஒரு முதல் தர கிரிக்கெட் வீரராக அறிமுகமானதிலிருந்து இந்திய கிரிக்கெட் நீண்ட தூரம் பயணித்துள்ளது. கடந்த 20 ஆண்டுகளாக அதன் ஒரு பகுதியாக இருந்ததில் நான் மிகவும் பெருமைப்படுகிறேன். ஒரு இந்திய கிரிக்கெட் வீரராக இந்த அத்தியாயம் முடிவுக்கு வந்தாலும், இந்த விளையாட்டுடனான எனது பயணம் இன்னும் முடிவடையவில்லை. அடுத்த தலைமுறைக்கு உதவவும், இந்த விளையாட்டிலிருந்து நான் கற்றுக்கொண்ட விஷயங்களை அவர்களுடன் பகிர்ந்து கொள்ளவும், எனக்கு எல்லாவற்றையும் கொடுத்த இந்த விளையாட்டுக்கு ஏதாவது திருப்பிக் கொடுக்கவும் நான் ஆவலுடன் காத்திருக்கிறேன்.
மும்பையில் எனது குழந்தைப் பருவத்திலிருந்து இந்தியாவுக்காக விளையாடுவது வரையிலான இந்தப் பயணம் எனக்கு ஒரு பெரும் கௌரவமாகும். இந்தப் பயணத்தில் பல வெற்றிகளும் தோல்விகளும் இருந்தன, ஆனால் கிரிக்கெட் விளையாடுவதில் உள்ள மகிழ்ச்சி, வெவ்வேறு அணிகளில் ஒரு பகுதியாக இருப்பது மற்றும் வாழ்நாள் முழுவதும் நினைவில் இருக்கும் தருணங்களை உருவாக்குவது ஆகியவை எனது வாழ்க்கையில் மிகப்பெரிய திருப்தியாகும்.
பிசிசிஐ, எம்சிஏ, என் சக வீரர்கள், பயிற்சியாளர்கள், ஒவ்வொரு ஐபிஎல் ஃபிரான்சைஸ், ராதிகா, என் முழு குடும்பத்தினர், நண்பர்கள் மற்றும் எனக்கு ஆதரவளித்த அனைவருக்கும் நன்றி. மேலும், என் வாழ்வின் ஏற்ற தாழ்வுகள் அனைத்திலும் எனக்கு ஆதரவளித்த அனைத்து கிரிக்கெட் ரசிகர்களுக்கும் என் மனமார்ந்த நன்றிகள்.” என்றார்.
ALSO READ: கிரிக்கெட்டிலிருந்து ஓய்வு பெற்ற ரஹானே.. உணர்ச்சிப்பூர்வமான பதிவு!
அஜிங்க்யா ரஹானே 2007-ல் மும்பை அணிக்காக உள்ளூர் போட்டிகளில் அறிமுகமானார். ரஹானே இதுவரை 205 முதல் தரப் போட்டிகளில் 42 சதங்கள் உட்பட 14,209 ரன்கள் எடுத்தார். மேலும், 192 லிஸ்ட் ஏ போட்டிகளில் 6,853 ரன்களும், 308 டி20 போட்டிகளில் 7,968 ரன்களும் எடுத்தார். ஐபிஎல்-ல், ரஹானே கொல்கத்தா நைட் ரைடர்ஸ், மும்பை இந்தியன்ஸ், சென்னை சூப்பர் கிங்ஸ், ராஜஸ்தான் ராயல்ஸ் மற்றும் ரைசிங் புனே சூப்பர்ஜெயண்ட்ஸ் அணிகளுக்காக விளையாடியுள்ளார்.
