Anbil Mahesh Poyyamozhi : அதிகாலையில் பரபரப்பு.. அன்பில் மகேஷ் பொய்யாமொழி வீட்டில் குற்ற புலனாய்வு போலீசார் சோதனை!
Crime Branch Police Raid Anbil Mahesh House : திருச்சியில் உள்ள திமுக முன்னாள் அமைச்சர் அன்பில் மகேஷ் பொய்யா மொழி வீட்டில் சென்னை குற்ற புலனாய்வு பிரிவு போலீசார் சோதனை மேற்கொண்டு வருகின்றனர். இதனால், அந்தப் பகுதியில் பரபரப்பு ஏற்பட்டுள்ளது.
தமிழகத்தில் கடந்த திமுக ஆட்சியில் பள்ளிக் கல்வித் துறை அமைச்சராக இருந்தவர் அன்பில் மகேஷ் பொய்யாமொழி. இவர், தனியார் பள்ளிகளுக்கு அங்கீகாரம் வழங்குவதற்காக லஞ்சம் பெற்றதாக புகார் எழுந்தது. இந்த சம்பவத்தில், ஏற்கனவே லஞ்சம் பெற்றதாக தமிழ்நாடு தனியார் பள்ளிகள் சங்கத்தின் தலைவரும் திமுக பிரமுகருமான பி.டி. அரசகுமார் குண்டர் தடுப்பு சட்டத்தின் கீழ் கைது செய்யப்பட்டிருந்தார். இந்த நிலையில், திருச்சி மாவட்டம், தென்னூர் பகுதியில் உள்ள அண்ணா நகரில் அமைந்துள்ள முன்னாள் அமைச்சர் அன்பின் மகேஷ் பொய்யாமொழி வீட்டில் இன்று புதன்கிழமை ( செப்டம்பர் 16- ஆம் தேதி) சென்னை மத்திய குற்ற புலனாய்வு பிரிவு போலீசார் திடீர் சோதனையில் ஈடுபட்டனர். சென்னையில் இருந்து காரில் புறப்பட்டு வந்த அதிகாரிகள், முன்னாள் அமைச்சர் வீட்டில் அதிரடியாக இறங்கி சோதனையை மேற்கொண்டு வருகின்றனர். இதனால், அந்த பகுதியில் பெரும் பரபரப்பான சூழல் நிலவி வருகிறது.
மத்திய குற்ற புலனாய்வு பிரிவு சோதனையின் பின்னணி
கடந்த திமுக ஆட்சியில் பள்ளிகளுக்கு அங்கீகாரம் வழங்குவதில் லஞ்சம் வாங்கியதாக மத்திய குற்றப்புலனாய்வு பிரிவு போலீசார் வழக்கு பதிவு செய்திருந்தனர். இது தொடர்பாக விசாரணையும் நடைபெற்று வருகிறது. அதன் அடிப்படையில், இந்த சோதனை நடைபெற்றுள்ளது. ஏற்கனவே, இந்த வழக்கில் தொடர்புடையதாக கூறப்படும் முத்துக்குமார் என்பவர் தலைமறைவாகியுள்ளார். அவரை குற்ற புலனாய்வு பிரிவு போலீசார் தேடி வருகின்றனர். திருச்சியில் அன்பில் மகேஷ் பொய்யாமொழி வீட்டில் சோதனை நடைபெற்று வரும் அதே வேளையில் சென்னை மாவட்டம், கிரீன்வேஸ் சாலையில் உள்ள அடுக்குமாடி குடியிருப்புகளும் சென்னை மத்திய குற்ற புலனாய்வு பிரிவு போலீசார் சோதனை மேற்கொண்டு வருவதாக தகவல்கள் கூறுகின்றன.
மேலும் படிக்க: ஜனநாயகன் படத்தில் நடித்தால் மட்டும் போதாது.. சீமான் சொன்ன அடுத்த வார்த்தை.. விஜய் சேதுபதி விவகாரத்தில் விமர்சனம்!
தனியார் பள்ளிகளுக்கு அங்கீகாரம் பெற்று தருவதாக…
தமிழ்நாடு தனியார் பள்ளிகள் சங்கத்தின் தலைவரும் திமுக பிரமுகருமான பி. டி. அரசகுமார் என்பவர் சென்னை, சாலிகிராமத்தில் தமிழ்நாடு தனியார் பள்ளிகள் சங்கம் என்ற பெயரில் பதிவு செய்யப்படாத சங்கத்தை நடத்தி வந்தார். இதில், தனக்கு இருந்த அரசியல் மற்றும் அதிகார தொடர்புகளை தவறாக பயன்படுத்தி தனியார் பள்ளிகளுக்கு நிரந்தர அங்கீகாரம் மற்றும் பள்ளிகளின் தரம் உயர்வு, டிடிசிபி, சிஎம்டிஏ அனுமதிகள் மற்றும் பிற சட்ட பூர்வ அனுமதிகளை பெற்று தருவதாக ஏமாற்று விளம்பரம் செய்திருந்தார். இதை நம்பிய தமிழகம் முழுவதும் உள்ள பல்வேறு தனியார் பள்ளிகளின் நிர்வாகிகள் பி. டி. அரசகுமாரை சந்தித்து கோடி கணக்கில் பணத்தை கொடுத்துள்ளனர்.
ரூ.100 கோடிக்கு மேல் முறைகேடு
ஆனால், அவர் கூறியது போல தனியார் பள்ளிகளுக்கான அங்கீகாரம் உள்ளிட்டவற்றை அரசகுமார் பெற்று தரவில்லை. அத்துடன், இந்த விவகாரத்தில் பெறப்பட்ட லஞ்ச பணம் அப்போதைய பள்ளி கல்வித் துறை அமைச்சர் அன்பில் மகேஷ் உள்ளிட்டோருக்கு சென்றதாக கூறப்படுகிறது. இது தொடர்பாக எழுந்த புகாரின் அடிப்படையில் சென்னை மத்திய குற்ற புலனாய்வு பிரிவு போலீசார் அதிரடி விசாரணை மற்றும் சோதனைகளை மேற்கொண்டு வருகின்றனர். தனியார் பள்ளி நிர்வாகிகள் இடமிருந்து ரூ. 100 கோடிக்கு மேல் லஞ்சம் பெறப்பட்டதாக குற்றச்சாட்டு வைக்கப்பட்டுள்ளது குறிப்பிடத்தக்கது.
மேலும் படிக்க: தமிழகத்தில் இடைத்தேர்தல் நடக்குமா? அடுத்தடுத்து தாக்கலாகும் தேர்தல் தடை மனுக்கள்.. பின்னணி என்ன!
