பெண்கள் மட்டுமே பங்கேற்கும் ஆடி செவ்வாய் அவ்வையார் விரதம் பற்றி தெரியுமா?

ஆன்மீக சிறப்புகள் நிறைந்த ஆடி மாதத்தில் பெண்கள் கடைபிடிக்க வேண்டிய மிக முக்கியமான வழிபாடுகளில் அவ்வையார் விரதம் முதன்மையானதாக கருதப்படுகிறது. இதற்கு ‘செவ்வாய் பிள்ளையார் விரதம்’ மற்றும் ‘பாட்டி வழிபாடு’ என்ற வேறு பெயர்களும் உண்டு. குறிப்பாக, கன்னிப் பெண்களுக்குத் திருமணத்தடை நீங்கவும், சுமங்கலிப் பெண்களுக்கு மாங்கல்ய பலம் நிலைக்கவும், குடும்பத்தில் செல்வச் செழிப்பு மற்றும் புத்திர பாக்கியம் உண்டாகவும் இந்த அரிய விரதம் மேற்கொள்ளப்படுகிறது. ஜாதக ரீதியாக செவ்வாய் தோஷம், நாக தோஷம் மற்றும் ராகு-கேது தோஷங்களால் பாதிக்கப்பட்டுள்ள பெண்கள் இந்த நாளில் அம்பாளை வழிபடுவதன் மூலம் அந்த தோஷங்களின் வீரியம் குறைந்து நற்பலன்களைப் பெறலாம் என்பது அசைக்க முடியாத நம்பிக்கையாகும். அன்றைய தினம் பெண்கள் முழு உபவாசமிருந்து இரு குத்துவிளக்குகளை ஏற்றி, அம்பாள் மந்திரங்களை துதித்து வழிபடுவதால் குடும்பத்தில் கடன்கள் தீர்ந்து ஆரோக்கியமும் அஷ்ட ஐஸ்வர்யங்களும் பெருகும்.

பூஜை முறைகளும் ஆண்களுக்கு விதிக்கப்படும் கட்டுப்பாடுகளும்

இந்த வழிபாட்டின் மிக முக்கிய விதியாக, ஆண்கள் இதில் பங்கேற்க முற்றிலும் தடை விதிக்கப்பட்டுள்ளது. ஆடி செவ்வாய்க்கிழமை நள்ளிரவு 10.30 மணிக்கு மேல், வீட்டில் உள்ள ஆண்கள் அனைவரும் உறங்கிய பிறகே பெண்கள் ஒரு இடத்தில் கூடி இந்த பூஜையைத் தொடங்குவார்கள். மூத்த சுமங்கலிப் பெண்களின் வழிகாட்டுதலின்படி, பச்சரிசி மாவு மற்றும் வெல்லம் கலந்து ஒரு பிரத்யேக வடிவிலான கொழுக்கட்டை தயாரிக்கப்படுகிறது. இது ‘அவ்வையார் கொழுக்கட்டை’ என்று அழைக்கப்படுகிறது. இந்த வழிபாட்டிற்கான நிவேதனங்களில் உப்பு சேர்க்கப்பட மாட்டாது என்பதுடன், பூஜைக்குப் பின் வழங்கப்படும் பிரசாதக் கொழுக்கட்டைகளும் ஆண்களுக்கு வழங்கப்படுவதில்லை என்பது குறிப்பிடத்தக்கது.

Also Read: ஆடி ஞாயிறு வழிபாடு: அம்மன் அருளைப் பெற இதை செய்யுங்கள் போதும்!

தோஷ நிவர்த்தி தரும் விளக்கு வழிபாடும் அம்மன் அருளும்

விரதம் இருக்கும் பெண்கள் அன்றைய தினம் முழுவதும் உணவேதும் உண்ணாமல் குலதெய்வத்தை மனதார வேண்டிக் கொள்ள வேண்டும். பூஜையறையில் இரண்டு குத்துவிளக்குகளை ஏற்றி, பஞ்ச தீப எண்ணெய் அல்லது விளக்கெண்ணெய் ஊற்றி தீபமிடுவது அவசியமாகும். வீடு முழுவதும் சாம்பிராணி புகை பரவச் செய்து, அம்பாளுக்குரிய போற்றிகள் மற்றும் மந்திரங்களை உச்சரித்து வழிபட வேண்டும். பின்னர் அருகில் உள்ள அம்மன் கோவிலுக்குச் சென்று தரிசனம் செய்வதன் மூலம் தீராத கடன்கள் தீரும், உடல் ஆரோக்கியம் மேம்படும். எல்லோரையும் காக்கும் தாயான அம்மனின் அருள் முழுமையாகக் கிடைத்து இல்லத்தில் மகிழ்ச்சி பொங்கும் என்று ஆன்மீக பெரியோர்கள் குறிப்பிடுகின்றனர்.

பொறுப்புத்துறப்பு: இந்தக்கட்டுரை ஆன்மிக நம்பிக்கையின்படி எழுதப்பட்டது. இது அறிவியல் பூர்வமாக நிரூபணம் ஆனது அல்ல.