ஃபிரிட்ஜில் உணவுப் பொருளை சேமிக்கிறீர்களா ? காத்திருக்கும் ஆபத்து!
Fridge Storage Tips : சமீபகாலமாக அடிக்கடி ஏற்படும் காலநிலை மாற்றங்கள் மனிதர்களுக்கு பல்வேறு சிக்கல்களை ஏற்படுத்துகின்றன. குறிப்பாக கோடைகாலத்தில் பெரும்பாலான இடங்களில் மழை பெய்தது. இந்த சூழ்நிலையில் சமைத்த உணவுகளை ஃபிரிட்ஜில் வைப்பது ஆபத்தானது என நிபுணர்கள் எச்சரிக்கின்றனர். அதுகுறித்து இந்த கட்டுரையில் விரிவாக பார்க்கலாம்.
சமீபகாலமாக அடிக்கடி ஏற்படும் வானிலை மாற்றங்கள் உடலுக்கு ஆபத்தை ஏற்படுத்துகின்றன. கோடைகாலங்களில் (Summer) பல இடங்களில் மழை பெய்தது. இதனால் காலநிலை மாற்றத்தை எதிர்கொள்ள முடியாமல் மக்கள் திணறுகின்றனர். குறிப்பாக மழை காலங்களில் சமைத்த பொருட்கள் சீக்கிரமே கெட்டு விடுகின்றன. இதனால்தான் பலர் ஃபிரிட்ஜில் (Fridge) உணவை சேமித்து வைக்கிறார்கள். சமைத்த உணவை ஃபிரிட்ஜில் வைப்பது பாதுகாப்பானதாக இருக்காது என நிபுணர்கள் எச்சரிக்கின்றனர். ஈரப்பதம் அதிகமாக இருக்கும்போது உணவை எவ்வாறு பாதுகாப்பாக சேமிப்பது என்பது குறித்து நிபுணர்கள் முக்கிய பரிந்துரைகளை வழங்கியுள்ளனர். அதுகுறித்து இந்த கட்டுரையில் விரிவாக பார்க்கலாம். பெரும்பாலான பிரிட்ஜ்கள் காற்றை மட்டும் தான் குளிர்விக்கின்றன, ஆனால் அவை அதிலிருந்து ஈரப்பதத்தை அகற்றுவதில்லை. அதிக ஈரப்பதம் உள்ள பகுதிகளில், இது உணவுப் பாத்திரங்களில் நீராவி உருவாக வழிவகுக்கும். இது சில வகையான பாக்டீரியாக்கள் மற்றும் பூஞ்சைகளுக்கு சாதகமான சூழலை உருவாக்குகிறது.
முறையாக சேமிக்கப்படாவிட்டால், குளிர்ச்சியான, ஈரப்பதமான சூழல் கிருமிகளுக்கு சிறந்த இனப்பெருக்கம் செய்யும் இடமாக மாறும். மழைக்காலத்தில், சில நாட்கள் குளிர்சாதன பெட்டியில் வைக்கப்பட்ட உணவு கெட்டுப்போவதைப் பார்க்கிறோம், இது பின்னர் உணவு விஷமாக மாறக்கூடிய சூழலை ஏற்படுத்துகிறது.
ஃப்ரிட்ஜில் வைப்பது மட்டும் பாதுகாப்பானதா?
உணவை ஃபிரிட்ஜில் வைத்திருப்பது அதன் பாதுகாப்பிற்கு உத்தரவாதம் அளிக்காது. உணவு எவ்வளவு சிறப்பாக சேமிக்கப்படுகிறது என்பதைப் பல காரணிகள் பாதிக்கின்றன. தயாரிப்பு, சேமிப்பு முறைகள், பயன்படுத்தப்படும் கொள்கலன், குளிர்சாதன பெட்டியில் வைக்கப்படும் கால அளவு அளவைப் பொறுத்து அதன் தரம் அமையும். மேலும் அது ஒரு முறை அல்லது பல முறை மீண்டும் சூடுபடுத்தப்பட்டதா என்பதும் முக்கியத்துவம் வாய்ந்தது. குளிர்சாதனப் பெட்டி பாக்டீரியாக்களின் வளர்ச்சியைக் குறைக்க மட்டுமே செய்கிறது, முழுமையாக நிறுத்தாது என்பதை நினைவில் கொள்வது அவசியம். அதனால்தான் சரியான சேமிப்பு, பாதுகாப்பாக கையாளுதல் மற்றும் கவனமாக கவனிப்பது மிகவும் முக்கியம்.
ஃபிரிட்ஜில் உணவை பாதுகாப்பது எப்படி?
சூடான உணவை நேரடியாக குளிர்சாதன பெட்டியில் வைக்க கூடாது, அதை அறை வெப்பநிலையில் சில நிமிடங்கள் குளிர்விக்க விடுங்கள். பிளாஸ்டிக்கை விட துருப்பிடிக்காத எஃகு அல்லது கண்ணாடி பாத்திரங்களைத் தேர்வுசெய்வது அவசியம். ஒவ்வொரு பொருளையும் சேமித்து வைத்த தேதியுடன் லேபிளிடுங்கள். முன்கூட்டியே நறுக்கிய காய்கறிகள் மற்றும் பழங்களை சேமித்து வைப்பதைத் தவிர்க்கவும். காய்கறிகள் மற்றும் சமைத்த உணவுகளை தனித்தனியாக வைத்திருப்பதன் மூலம் கெட்டுப்போவதைத் தவிர்க்க முடியும்.
யார் கவனமாக இருக்க வேண்டும்?
நோய்வாய்ப்பட்டவர்கள், சிறு குழந்தைகள் அல்லது வயதானவர்கள் குறிப்பாக கவனமாக இருக்க வேண்டும். ஒன்று அல்லது இரண்டு நாட்களுக்கு மேல் குளிர்சாதன பெட்டியில் வைக்கப்பட்ட உணவை உட்கொள்வது, குறிப்பாக மீண்டும் மீண்டும் சூடுபடுத்தி சாப்பிடுவது, செரிமான பிரச்னைகள் ஏற்படும் அபாயத்தை அதிகரிக்கிறது. சுருக்கமாகச் சொன்னால், ஃபிரிட்ஜினால் நமக்கு பல நன்மைகள் இருக்கின்றன. ஆனால் அதனை எவ்வளவு கவனமாகப் பயன்படுத்துகிறோம் என்பதைப் பொறுத்து அதன் நன்மை அமையும்.
