இன்று தொடங்கும் நாடாளுமன்ற குளிர்காலக் கூட்டத்தொடர்.. புயலை கிளப்புமா SIR?

நாடாளுமன்ற குளிர்காலக் கூட்டத்தொடர்  தொடர்பாக நேற்று, ஞாயிற்றுக்கிழமை பெரும்பாலான எதிர்க்கட்சிகள் SIR குறித்து விவாதிக்க வேண்டும் என்று ஒருமனதாக கோரியதால், இன்று அது தொடர்பான விவாதங்கள் கடுமையாக இருக்கும் என எதிர்பார்க்கப்படுகிறது. இருப்பினும், நாடாளுமன்றம் சுமூகமாக செயல்பட வேண்டும் என்றும், முட்டுக்கட்டை ஏற்படுவதைத் தவிர்க்க எதிர்க்கட்சிகளுடன் தொடர்ந்து விவாதங்கள் நடத்தப்படும் என்றும் அரசு தரப்பில் கூறியுள்ளது. அனைத்துக் கட்சிக் கூட்டத்திற்குப் பிறகு, நாடாளுமன்ற விவகார அமைச்சர் கிரண் ரிஜிஜுவும் இது குளிர்காலக் கூட்டத்தொடர் என்றும், அனைவரும் நிதானமாகச் செயல்பட வேண்டும் என்றும் நகைச்சுவையாகக் குறிப்பிட்டார்.

 எதிர்க்கட்சிகள் ஒத்துழைக்க வேண்டும்

பீகார் சட்டமன்றத் தேர்தலில் தேசிய ஜனநாயகக் கூட்டணி பெற்ற மகத்தான வெற்றியால் உற்சாகமடைந்த மத்திய அரசு, இந்த கூட்டத்தொடரில் பல முக்கியமான மசோதாக்களை அறிமுகப்படுத்தும் என்று எதிர்பார்க்கப்படுகிறது. கூட்டத்தொடருக்கு முந்தைய அனைத்துக் கட்சிக் கூட்டத்தை நேர்மறையானதாக விவரித்த கிரண் ரிஜிஜு, அங்கு முன்வைக்கப்படும் எந்தவொரு ஆலோசனைகளும் பரிசீலிக்கப்பட்டு அலுவல் ஆலோசனைக் குழுவின் (பிஏசி) முன் வைக்கப்படும் . நாடாளுமன்றத்தின் குளிர்காலக் கூட்டத்தொடர் சுமூகமாக நடைபெறுவதை உறுதி செய்வதற்காக எதிர்க்கட்சிகளுடன் நாங்கள் தொடர்ந்து ஈடுபடுவோம் என்று அரசாங்கத்தின் சார்பாக நான் உங்களுக்கு உறுதியளிக்கிறேன். நாடாளுமன்றம் சுமூகமாக செயல்படுவதை உறுதி செய்வதில் எதிர்க்கட்சித் தலைவர்கள் ஒத்துழைக்குமாறு கேட்டுக் கொள்ளப்படுகிறார்கள் என்றார்.

Also Read : ஐயப்ப பக்தர்களே… விமானங்களில் இருமுடி எடுத்துச் செல்ல அனுமதி: மத்திய அரசு அறிவிப்பு

மேலும், “ஒரு ஜனநாயகத்தில், குறிப்பாக நாடாளுமன்ற ஜனநாயகத்தில், முறையற்ற விவாதங்களால் முட்டுக்கட்டை ஏற்படுகிறது, அரசியல் கட்சிகளுக்கு இடையே வேறுபாடுகள் உள்ளன. இதுபோன்ற போதிலும், நாம் அனைவரும் சபையில் முட்டுக்கட்டையை உருவாக்காமல், நமது கருத்துக்களை வெளிப்படுத்தி, நமது எதிர்ப்பைப் பதிவு செய்ய முடிவு செய்தால், சபை செயல்படும்” என்றார்.

SIR பிரச்னை பெரிதாகுமா?

SIR பிரச்சினை குறித்து கேட்டபோது, ​​எதிர்க்கட்சிகளில் நாடாளுமன்றத்தை தொடர்ந்து நடத்தி பிரச்சினைகளை எழுப்ப விரும்பும் பல தலைவர்கள் இருப்பதாக அவர் கூறினார். எனவே, SIR பிரச்சினையை எழுப்புவதன் மூலம் அனைத்து எதிர்க்கட்சிகளும் நாடாளுமன்றத்தை சீர்குலைக்க விரும்புவதாகக் கூறுவது நியாயமில்லை. எதிர்க்கட்சிகள் பல பிரச்சினைகளை எழுப்பியுள்ளன, அவற்றில் SIR ஒன்றாகும். SIR பற்றி விவாதிக்கப்படாவிட்டால் நாடாளுமன்றத்தை செயல்பட விடமாட்டோம் என்று அனைத்து அரசியல் கட்சிகளும் கூறவில்லை. அவைக்கு வெளியே செய்யப்படும் அறிக்கையை கூட்டு அறிக்கையாகக் கருதக்கூடாது என்றார்

என்னென்ன பிரச்சினைகள் விவாதிக்கப்பட வாய்ப்பு

காங்கிரஸ், சமாஜ்வாடி கட்சி, திரிணாமுல் காங்கிரஸ் மற்றும் பல எதிர்க்கட்சிகள், அமர்வுக்கு ஒரு நாள் முன்பு கூட்டப்பட்ட அனைத்துக் கட்சிக் கூட்டத்தில், டெல்லி குண்டுவெடிப்பைத் தொடர்ந்து SIR மற்றும் தேசிய பாதுகாப்பு குறித்து கலந்து ஆலோசித்துள்ளன மேலும் டெல்லி காற்று மாசுபாடு, வெளியுறவுக் கொள்கை, விவசாயிகளின் அவலநிலை, பணவீக்கம், வேலையின்மை மற்றும் பல தலைப்புகள் குறித்தும் அவர்கள் விவாதங்களை எழுப்ப ஆலோசனை நடைபெற்றுள்ளது

Also Read : புதிய தொழிலாளர் குறியீடுகள் சொல்வது என்ன? இதில் ஒருவரின் அடிப்படை சம்பளம் பாதிக்குமா?

 ஆலோசனை கூட்டம்

இந்த கூட்டத்தில் அரசு சார்பில் பாதுகாப்பு அமைச்சர் ராஜ்நாத் சிங், சுகாதார அமைச்சர் ஜே.பி. நட்டா, நாடாளுமன்ற விவகார அமைச்சர் கிரண் ரிஜிஜு, நாடாளுமன்ற விவகாரத் துறை இணையமைச்சர் அர்ஜுன் ராம் மேக்வால் ஆகியோர் கலந்து கொண்டனர். காங்கிரஸ் தலைவர்கள் பிரமோத் திவாரி மற்றும் கொடிகுன்னில் சுரேஷ், திரிணாமுல் காங்கிரஸ் தலைவர் டெரெக் ஓ’பிரையன், சமாஜ்வாதி கட்சித் தலைவர் ராம் கோபால் யாதவ், திமுகவின் திருச்சி சிவா மற்றும் பல தலைவர்களும் கலந்து கொண்டனர்.