புது வீடோ, கடையோ கட்டுவோர் கவனத்திற்கு.. தனியார் இன்ஜினியர்கள் மூலம் திட்ட அனுமதி பெறலாம்.. தமிழக அரசு அதிரடி உத்தரவு!!

சென்னை, நவ.15: தமிழகத்தில் சொந்தமாக வீடு, சிறிய கடைகள் மற்றும் வணிகக் கட்டிடங்களைக் கட்டத் திட்டமிடும் பொதுமக்களுக்கு உதவும் வகையில், திட்ட அனுமதி பெறும் நடைமுறையை மிகவும் எளிமைப்படுத்தித் தமிழக அரசு புதிய அரசாணையை வெளியிட்டுள்ளது. இதுவரை அரசு அலுவலகங்களை நாடி நீண்ட காலம் காத்திருக்க வேண்டியிருந்த சூழல் மாறி, தற்போது ‘மூன்றாம் தரப்பு சான்றுதல் முறை’ அறிமுகப்படுத்தப்பட்டுள்ளது. இதன் மூலம் பொதுமக்கள் தாங்கள் கட்ட விரும்பும் கட்டிடங்களுக்கான அனுமதியைத் தங்களது பகுதியில் உள்ள பதிவுபெற்ற கட்டிடக் கலைஞர்கள் அல்லது முதுநிலை இன்ஜினியர்கள் மூலமாகவே எளிதில் பெற்றுக்கொள்ள வழிவகை செய்யப்பட்டுள்ளது.

இதையும் படிக்க: ரேஷன் கடைகளில் காலிப் பணியிடங்கள்.. சுய உதவிக்குழு பெண்களை தற்காலிகமாக நியமிக்க தமிழக அரசு அதிரடி உத்தரவு!

விண்ணப்பிக்கும் முறையும் அனுமதிக்கப்பட்ட அளவும்:

புதிய நடைமுறையின்படி, கட்டிட உரிமையாளர்கள் தங்களின் நிலத்தின் புகைப்படம், பட்டா, விற்பனைப் பத்திரம் மற்றும் வரைபடம் போன்ற ஆவணங்களுடன் பதிவுபெற்ற பிரைவேட் இன்ஜினியரை அணுக வேண்டும். அந்த இன்ஜினியர் கட்டிடம் கட்டப்பட உள்ள இடத்தில் நேரில் ஆய்வு செய்து, சாலை வசதி, நிலத்தின் அளவு, உரிமை மற்றும் சட்ட விதிமுறைகளைச் சரிபார்த்துச் சான்றிதழ் அளிப்பார். பின்னர், விண்ணப்பதாரரும் அந்த இன்ஜினியரும் இணைந்து தமிழக அரசின் ஒற்றைச்சாளர முறை இணையதளத்தில் ஆவணங்களைப் பதிவேற்றம் செய்ய வேண்டும். அனைத்து ஆவணங்களும் சரியாக இருக்கும் பட்சத்தில், அங்கீகரிக்கப்பட்ட திட்ட அனுமதிக்கான ஆவணங்கள் கியூஆர் கோடு மூலமாக இணையத்திலேயே உடனடியாக வழங்கப்பட உள்ளன.

எந்த வகையான கட்டடங்களுக்கு அனுமதி பொருந்தும்?

இந்தத் புதிய தளர்வு முறை அனைத்துக் கட்டிடங்களுக்கும் பொருந்தாது மாறாகச் சில குறிப்பிட்ட அளவுகளுக்கு உட்பட்ட கட்டிடங்களுக்கு மட்டுமே அனுமதிக்கப்பட்டுள்ளது. அதன்படி, 750 சதுர மீட்டர் வரை பரப்பளவு கொண்ட மனைகளில் அதிகபட்சம் 14 மீட்டர் உயரம் மற்றும் 8 குடியிருப்புகள் வரையிலான குடியிருப்புச் கட்டிடங்களுக்கு இந்த முறை பொருந்தும். அதேபோன்று, 300 சதுர மீட்டர் பரப்பளவு கொண்ட மனைகளில் அதிகபட்சம் 14 மீட்டர் உயரம் கொண்ட வணிகக் கட்டிடங்களுக்கும் அனுமதி வழங்கப்பட்டுள்ளது. மேலும், சிப்காட், சிட்கோ, எல்காட் மற்றும் பிற அங்கீகரிக்கப்பட்ட தொழில் பேட்டைகளில் அமைக்கப்படும் தொழிற்சாலைக் கட்டிடங்களுக்கு 2,500 சதுர மீட்டர் பரப்பளவு மற்றும் 18 மீட்டர் உயரம் வரை இம்முறை பொருந்தும் எனத் தெரிவிக்கப்பட்டுள்ளது. இருப்பினும், கடலோர ஒழுங்குமுறை மண்டலம், மலைப்பகுதிகள், விவசாய நிலங்கள் மற்றும் அபாயகரமான பயன்பாட்டு நிலங்களுக்கு இந்த விதி பொருந்தாது.

இதையும் படிக்க: ஜெம் வீரமணி வீட்டில் சிறுமி சடலம் புதைப்பு.. கற்பழித்து கொலையா? ஜேசிபி மூலம் தோண்டும் பணி தீவிரம்!

கடுமையான எச்சரிக்கையும், விதிமீறல் நடவடிக்கையும்:

பொதுமக்களின் வசதிக்காக அரசு இந்தச் எளிமையான முறையை அறிமுகப்படுத்தியிருந்தாலும், இதில் முறைகேடுகள் நடைபெறாமல் இருக்கக் கடுமையான கட்டுப்பாடுகளும் விதிக்கப்பட்டுள்ளன. மூன்றாம் தரப்பு இன்ஜினியர்கள் வழங்கும் சான்றிதழ்கள் தவறானவை எனத் கண்டறியப்பட்டால், உடனடியாக அந்தத் திட்ட அனுமதி ரத்து செய்யப்படுவதுடன் கடுமையான சட்ட நடவடிக்கை எடுக்கப்படும் என எச்சரிக்கப்பட்டுள்ளது. மேலும், தவறிழைக்கும் இன்ஜினியர்களின் உரிமம் உடனடியாக ரத்து செய்யப்பட்டு அவர்கள் கறுப்புப் பட்டியலில் (Blacklist) வைக்கப்படுவார்கள். இதன் மூலம் பொதுமக்கள் தாங்கள் கட்டும் புதிய கட்டிடங்களுக்கு எளிய முறையில் தாமதமின்றி அனுமதி பெற்றுப் பயனடையலாம் என எதிர்பார்க்கப்படுகிறது.