‘இனி RTO அலுவலகம் செல்ல வேண்டாம்’.. தமிழகம் முழுவதும் நாளை முதல் அமலுக்கு வருகிறது!!
இந்த புதிய நடைமுறையால், வாகன உரிமையாளர்கள் மற்றும் டீலர்களின் செலவு, நேர விரயம் ஆகியவை குறைகின்றன. அதேசமயம், வணிக பயன்பாட்டு வாகனங்களுக்கு (பஸ், லாரி, டெம்போ, டாக்சி போன்றவை) மட்டும் RTO அலுவலகத்திற்கு ஆய்வுக்கு கொண்டு செல்லும் நடைமுறை தொடரும் என தெரிவிக்கப்பட்டுள்ளது.
தமிழகத்தில் சொந்த பயன்பாட்டிற்காக வாங்கப்படும் புதிய வாகனங்களை பதிவு செய்யும் செயல்முறை எளிமைப்படுத்தப்பட்டுள்ளது. இனிமேல் இருசக்கர வாகனங்கள், கார்கள் போன்ற பிரத்தியேக பயன்பாட்டு வாகனங்களை ஆர்.டி.ஓ (RTO) அலுவலகத்துக்குக் கொண்டு வர வேண்டிய அவசியம் இல்லை. இந்த புதிய விதி நாளை முதல் மாநிலம் முழுவதும் அமலுக்கு வருகிறது. சொந்த இருசக்கர வாகனங்கள் மற்றும் நான்கு சக்கர வாகனங்கள் வாங்கிய பிறகு, வாகனத்தை பதிவு செய்ய ஆர்.டி.ஓ., அலுவலகங்களுக்கு கொண்டு செல்ல வேண்டிய சூழல் இருக்கிறது. இதனால் பொதுமக்களுக்கு ஒரு நாள் விரயம் ஏற்படுகின்றது. இவற்றைக் கருத்தில் கொண்டு இந்த நடைமுறையை எளிதாக்க வேண்டும் என்ற கோரிக்கை நீண்ட காலமாக இருந்து வருகிறது.
மேலும் படிக்க: ‘தித்வா புயல்’ எதிரொலி: தென் தமிழகத்தில் 100 ஆண்டுகளில் இல்லாத அளவு குளிர்!!
வாகன பதிவு நடைமுறையில் முக்கிய மாற்றம்:
மாநிலத்தில் தற்போது 150 ஆர்.டி.ஓ மற்றும் யூனிட் அலுவலகங்கள் செயல்பட்டு வருகின்றன. தினசரி சுமார் 8,000 புதிய வாகனங்கள் பதிவு செய்யப்படுகின்றன. இதில் 3,000–4,000 வரை வாகனங்கள் தனிப்பட்ட பயன்பாட்டிற்காக வாங்கப்படுபவை ஆகும். அந்தவகையில், இதுநாள் வரை புதிய வாகனங்களை பதிவு செய்யும் போது அவற்றை நேரடியாக ஆர்.டி.ஓ அலுவலகத்துக்கு கொண்டு சென்று ஆய்வு மேற்கொள்ளும் நடைமுறை இருந்தது. இதனால் வாகன உரிமையாளர்களோ அல்லது டீலர்களோ அலுவலகத்துக்கு அவசியம் வர வேண்டியிருந்தது.
மோட்டார் வாகன சட்டத்தில் திருத்தம்:
மோட்டார் வாகன சட்டத்தில் செய்யப்பட்ட திருத்தத்தின் படி, சொந்த பயன்பாட்டு வாகனங்களை பதிவு செய்யும்போது, அவற்றை ஆர்.டி.ஓ அலுவலகத்திற்கு கொண்டு வரத் தேவையில்லை என்று மத்திய அரசு முன்பே சட்டத் திருத்தம் கொண்டு வந்தது. ஆனால், திருத்தப்பட்ட அந்த சட்டம் தமிழகத்தில் நடைமுறையில் அமலாக்கப்படவில்லை. இதனால், வாகனங்களை நேரில் எடுத்துச்செல்லும்போது, அதிகாரிகள் லஞ்சம் பெறுவதாகவும் குற்றச்சாட்டு எழுந்தது.
உயர் நீதிமன்றம் உத்தரவு:
இந்த விவகாரம் குறித்து ஆட்டோமொபைல் டீலர்கள் சங்கம் உயர்நீதிமன்றத்தில் வழக்கு தொடர்ந்தது. இந்த வழக்கை விசாரித்து வந்த நீதிமன்றம், மாநில அரசுக்கு முக்கிய உத்தரவை பிறப்பித்துள்ளது. அதில்,“பிரத்தியேக பயன்பாட்டு வாகனங்களுக்கு வாகனத்தை ஆர்.டி.ஓ அலுவலகத்துக்குக் கொண்டு வருவதிலிருந்து விலக்கு அளிக்க வேண்டும்”என்று உத்தரவிட்டுள்ளது.
மேலும் படிக்க: கோவையில் 3 மணி நேரத்தில் 13 வீடுகளில் கொள்ளை – என்ன நடந்தது?
அதனைத் தொடர்ந்து, போக்குவரத்து துறை ஆணையர் கஜலட்சுமி தமிழகமெங்கும் உள்ள ஆர்.டி.ஓ அலுவலகங்களுக்கு இந்த புதிய விதியை டிசம்பர் 1 (நாளை) முதல் நடைமுறையில் மேற்கொள்ள உத்தரவிட்டுள்ளார்.
