ஆந்திரா அருகே கார் விபத்து: ஒரே குடும்பத்தைச் சேர்ந்த 5 பேர் பரிதாபமாக உயிரிழப்பு!!
அதிகாலை 4 மணியளவில் பெங்களூரு நோக்கிச் சென்ற அந்த கார், எதிரே வந்த மற்றொரு காருடன் நேருக்கு நேர் மோதியதில் இந்த விபத்து நிகழ்ந்துள்ளது. அதிகாலையில் ஏற்பட்ட கடும் மூடுபனியால், சாலைகள் தெளிவாக தெரியாததாலும், மலைகளுக்கு இடையே உள்ள கூர்மையான வளைவு காரணமாகவும், இரு வாகனங்களும் மோதியதாக கூறப்படுகிறது.
ஆந்திரா, நவம்பர் 29: ஆந்திர மாநிலம் கர்னூர் அருகே கோடேகல் கிராமத்தில் எதிரே வந்த கார் மோதி ஏற்பட்ட விபத்தில் கர்நாடகாவை சேர்ந்த 5 பக்தர்கள் பரிதாபமாக உயிரிழந்துள்ளனர். மேலும், இருவர் உயிருக்கு ஆபத்தான நிலையில் மருத்துவமனையில் சிகிச்சை பெற்று வருகின்றனர். ஆந்திராவில் மந்திராலயம் ராகவேந்திரா கோயிலில் சாமி தரிசனம் செய்துவிட்டு, ஊர் திரும்பிய போது இந்த விபத்து நிகழ்ந்துள்ளது. அதோடு, உயிரிழந்த அனைவரும் ஒரே குடும்பத்தை சேர்ந்தவர்கள் என்பதும், பலியான 5 பேரில் இரண்டு பேர் குழந்தைகள் என்பதும் தெரியவந்துள்ளது. வெளிமாநிலத்தை சேர்ந்தவர்கள் என்பதால், அவர்களது விவரங்களை சேகரிக்கும் முயற்சியில் போலீசார் தீவிர விசாரணை மேற்கொண்டு வருகின்றனர். ஒரே குடும்பத்தைச் சேர்ந்தவர்கள் கோயிலில் தரிசனம் செய்ய வந்து பரிதாபமாக உயிரிழந்த சம்பவம், பெரும் சோகத்தை ஏற்படுத்தியுள்ளது.
இதையும் படிக்க: விமானங்களில் இருமுடி எடுத்துச் செல்ல அனுமதி: மத்திய அரசு அறிவிப்பு
சாமி தரிசனத்திற்கு ஆந்திரா சென்ற குடும்பத்தினர்:
கர்நாடகா மாநிலம் கோலாரைச் சேர்ந்த ஒரு குடும்பத்தினர் ஆந்திராவில் உள்ள மந்திராலயம் ராகவேந்திரா கோயிலில் சாமி தரிசனம் செய்ய வாடகை கார் மூலம் நேற்றைய தினம் சென்றுள்ளனர். தொடர்ந்து, நேற்றிரவு அங்கு சாமி தரிசனத்தை முடித்துவிட்டு தனியார் விடுதியில் அறையில் ஓய்வெடுத்துள்ளனர். பின்னர், அவர்கள் இன்று காலை ஆந்திராவில் இருந்து தங்கள் சொந்த ஊருக்கு புறப்பட்டுள்ளனர்.
5 பேர் பரிதாபமாக பலி:
இந்நிலையில், அந்த குடும்பத்தினர் பயணித்த கார் ஆந்திர மாநிலம் கர்னூர் அருகே சென்று கொண்டிருந்த போது, எதிரே வந்த கார் மீது அதிவேகமாக சென்று மோதியுள்ளது. இதில், காரில் இருந்த இரண்டு குழந்தைகள் உட்பட 5 பேர் சம்பவ இடத்திலேயே உடல் நசுங்கி பரிதாபமாக உயிரிழந்தனர். மேலும், ஒட்டுநரும், மற்றொரு பெண்ணும் உயிருக்கு ஆபத்தான நிலையில் மருத்துவமனையில் அனுமதிக்கப்பட்டு சிகிச்சை பெற்று வருகின்றனர்.
தொடர்ந்து, விபத்தில் சிக்கிய மற்றொரு காரில் இருந்தவர்கள் அனைவருக்கும் அதிர்ஷ்டவசமாக லேசான காயங்களுடன் உயிர்தப்பினர். தொடர்ந்து, அவர்கள் அனைவரும் பத்திரமாக மீட்கப்பட்டு அருகில் உள்ள மருத்துவமனை அனுப்பிவைக்கப்பட்டனர். இதனிடையே, சம்பவ இடத்திற்கு விரைந்து வந்த போலீசார், விபத்தில் சிக்கிய குடும்பத்தினரை மீட்டு பிரேத பரிசோதனை மேற்கொள்ள மருத்துவமனைக்கு அனுப்பி வைத்தனர்.
இதையும் படிக்க: சென்னையை நோக்கி நகரும் ‘தித்வா’ புயல்: அதி கனமழை எச்சரிக்கை!!
கடும் பனியால் நிகழ்ந்த விபத்து:
அதோடு, இந்த விபத்து குறித்து வழக்குப்பதிவு செய்த அவர்கள் விசாரணை மேற்கொண்டு வருகின்றனர். குறிப்பாக இறந்தவர்கள் குறித்த விவரங்களை சேகரிப்பதிலும் அவர்கள் தீவிரம் காட்டி வருகின்றனர். அதிகாலை நேரம் என்பதால் சாலையில் எதிரே வரும் வாகனங்கள் தெரியாத அளவுக்கு கடும் பனி இருந்ததன் காரணமாக விபத்து நடந்ததாகவும், மலைப்பகுதி என்பதால் எதிரே வரும் வாகனங்களை கனிப்பதில் கடினம் ஏற்பட்டிருக்கலாம் என்றும் கூறப்படுகிறது. கோயிலில் தரிசனம் மேற்கொள்ள வந்த ஒரே குடும்பத்தைச் சேர்ந்தவர்கள் விபத்தில் சிக்கி உயிரிழந்தது பெரும் சோகத்தை ஏற்படுத்தியுள்ளது.
