தவெக அமைச்சரவையில் மாற்றமா? அமைச்சர் ராஜ்மோகன் அதிரடி விளக்கம்!

சென்னை, செப்.29: தமிழக வெற்றிக் கழக அரசுப் பொறுப்பேற்றது முதல் ஒவ்வொரு துறையிலும் மக்கள் நல திட்டங்களைச் சிறப்பாகச் செயல்படுத்தி வரும் சூழலில், அமைச்சரவையில் மாற்றம் செய்யப்பட உள்ளதாக சமூக வலைதளங்களில் பல்வேறு செய்திகள் உலா வந்தன. இத்தகைய வதந்திகளுக்கு முற்றுப்புள்ளி வைக்கும் வகையில், சென்னையில் செய்தியாளர்களைச் சந்தித்த பள்ளி கல்வித்துறை அமைச்சர் ராஜ்மோகன், முதலமைச்சர் விஜய் அவர்கள் ஒவ்வொரு துறைக்கும் தகுதியான அமைச்சர்களைத் பார்த்துப் பார்த்துத் தேர்ந்தெடுத்து நியமித்துள்ளார் என்றும், தற்போதைக்கு அமைச்சரவையில் மாற்றம் என்ற பேச்சுக்கே இடமில்லை என்றும் திட்டவட்டமாகத் தெளிவுபடுத்தியுள்ளார்.

இதையும் படிக்க: இன்று நள்ளிரவு முதல் தனியார் பேருந்துகள் இயங்காது.. வேலைநிறுத்த போராட்டத்தை அறிவித்தது உரிமையாளர்கள் சங்கம்!!

SIR நடைமுறைக்குக் கடுமையான எதிர்ப்பு:

தேர்தல் ஆணையத்தின் சிறப்புத் தீவிர திருத்தப் பணி (SIR) குறித்துப் பேசிய அமைச்சர் ராஜ்மோகன், கூட்டணி கட்சிகளின் ஒருமித்த கருத்துப்படி இந்த நடைமுறையை ஆரம்பக் கட்டத்திலிருந்தே தவெக எதிர்த்து வருவதாகத் தெரிவித்தார். வாக்காளர் பட்டியலில் பலரின் பெயர்களை விடுவித்துவிட்டு மேற்கொள்ளப்படும் இந்த SIR நடைமுறை ஒரு மிகப்பெரிய மோசடி என்றும், இத்தகைய குளறுபடிகள் இல்லாதிருந்தால் தவெக இன்னும் கூடுதல் பெரும்பான்மையுடன் சட்டமன்றத் தேர்தலில் வெற்றி பெற்றிருக்கும் என்றும் அவர் சுட்டிக்காட்டினார். மேலும், காங்கிரஸ் தலைவர் மோகன் குமாரமங்கலம் உடனான கருத்து வேறுபாடு குறித்த கேள்விக்கு, தவெக மற்றும் காங்கிரஸ் கட்சிகள் இரட்டைக்குழல் துப்பாகிகளாகச் செயல்பட்டு வருகின்றன என்றும் அவர்களுக்குள் எந்தவித மோதலும் இல்லை என்றும் அவர் விளக்கமளித்தார்.

மதுராந்தகம் இடைத்தேர்தல் களம்:

மதுராந்தகம் தொகுதி இடைத்தேர்தல் பிரச்சார அனுபவங்கள் குறித்துப் பகிர்ந்த அமைச்சர், மக்கள் தவெகவின் விசில் சின்னத்திற்கு அமோக ஆதரவு அளித்து வருவதாகத் தெரிவித்தார். அதிமுகவிலிருந்து விலகி தவெகவில் இணைந்த மரகதம் குமரவேல் போன்ற தொலைநோக்குடைய தலைவர்கள் மக்களின் விருப்பத்திற்கு ஏற்பவே தவெகவிற்கு வந்துள்ளனர். மறைந்த தலைவர்கள் எம்.ஜி.ஆர் மற்றும் ஜெயலலிதா ஆகியோரின் உண்மையான தொண்டர்களும் ஆதரவாளர்களும், திமுகவை எதிர்கொள்ளும் வல்லமை படைத்த ஒரே தலைவராக முதலமைச்சர் விஜய்யை ஏற்றுக்கொண்டுள்ளதால், தவெகவின் வெற்றி உறுதி செய்யப்பட்டுள்ளது என்றும் அவர் நம்பிக்கையுடன் கூறினார்.

இதையும் படிக்க: அதிமுக எம்எல்ஏ-க்களை பிச்சையெடுத்து கட்சி நடத்த வேண்டுமா? எடப்பாடி பழனிசாமி கடும் தாக்கு!

திமுக – அதிமுக ரகசிய உறவு குற்றச்சாட்டு:

அதிமுக மற்றும் திமுக இடையே ரகசியக் கூட்டணி மற்றும் புரிதல் இருப்பதாக எடப்பாடி பழனிசாமி முன்வைக்கும் குற்றச்சாட்டுகளுக்குப் பதிலளித்த அமைச்சர், கொடைக்கானல் பகுதியில் நடைபெற்ற நிகழ்வுகளையே பல ஊடகவியலாளர்கள் சுட்டிக்காட்டியுள்ளதாகக் குறிப்பிட்டார. மேலும், தவெக தலைமையிலான மதச்சார்பற்ற சமூக நீதி கூட்டணி ஒரு ஆழமான நீரோட்டம் போல உறுதியாகவும் ஒற்றுமையாகவும் இயங்கி வருகிறது. காங்கிரஸ், விடுதலை சிறுத்தைகள், முஸ்லிம் லீக் உள்ளிட்ட அனைத்துக் தோழமைக் கட்சிகளும் ஒரே நேர்கோட்டில் நின்று தேர்தல் களத்தில் பணியாற்றி வருவதால், வரவிருக்கும் தேர்தலில் தவெக கூட்டணி மகத்தான வெற்றியைப் பெறும் என அமைச்சர் ராஜ்மோகன் உறுதியளித்தார்.