இன்று நள்ளிரவு முதல் தனியார் பேருந்துகள் இயங்காது.. வேலைநிறுத்த போராட்டத்தை அறிவித்தது உரிமையாளர்கள் சங்கம்!!

செப்டம்பர், 29: தமிழ்நாட்டில் அரசு பேருந்துகளில் மகளிருக்கான இலவசப் பேருந்து பயணத் திட்டத்தை அரசு மேலும் விரிவுபடுத்தவுள்ள நிலையில், இதற்கு எதிர்ப்புத் தெரிவித்தும் தங்களின் வாழ்வாதாரத்தைப் பாதுகாக்க வலியுறுத்தியும் தனியார் பேருந்து உரிமையாளர்கள் அதிரடி முடிவை எடுத்துள்ளனர். இன்று நள்ளிரவு 12 மணி முதல் நாளை நள்ளிரவு 12 மணி வரை மாநிலம் தழுவிய அளவில் ஒரு நாள் அடையாள வேலைநிறுத்தப் போராட்டத்தில் ஈடுபட உள்ளதாகவும், இதனால் தனியார் பேருந்துகள் எதுவுமே இயங்காது என்றும் தமிழ்நாடு தனியார் பேருந்து உரிமையாளர்கள் சங்கம் கூட்டாக அறிவித்துள்ளது. இந்தத் திடீர் வேலைநிறுத்த அறிவிப்பு தினசரி பயணிகளிடையே பெரும் அதிர்ச்சியையும் கவலையையும் ஏற்படுத்தியுள்ளது.

இதையும் படிக்க: Chennai power cut today: சென்னையில் இன்று (செப்டம்பர் 29) எந்தெந்தப் பகுதிகளில் மின் விநியோகம் நிறுத்தம்? முழு விவரம்!!

போராட்டத்திற்கான முதன்மை கோரிக்கை:

தமிழ்நாடு அரசு வரும் அக்டோபர் 2-ஆம் தேதி முதல் மகளிருக்கான இலவசப் பேருந்து பயணத் திட்டத்தை மேலும் விரிவுபடுத்த உள்ளது. இதன்படி மாநகரம் மற்றும் நகர்ப்புறங்களில் இயங்கும் எக்ஸ்பிரஸ், எல்.எஸ்.எஸ், டீலக்ஸ் மற்றும் புறநகர் சாதாரண அரசு பேருந்துகளிலும், மாவட்டங்களுக்கு இடையே இயங்கும் சாதாரண அரசு பேருந்துகளிலும் பெண்கள் இலவசமாகப் பயணிக்கலாம் என அறிவிக்கப்பட்டுள்ளது. அரசின் இந்த முடிவால் அரசு பேருந்துகளுக்கு மட்டுமே பயணிகள் அதிகளவில் செல்வார்கள் என்றும், தனியார் பேருந்துகளை நம்பி இருக்கும் தங்களின் வாழ்வாதாரம் கடுமையாகப் பாதிக்கப்படும் என்றும் உரிமையாளர்கள் சுட்டிக்காட்டுகின்றனர். எனவே, அரசு பேருந்துகளைப் போலத் தனியார் பேருந்துகளிலும் மகளிருக்கு இலவசப் பயணத் திட்டத்தை நடைமுறைப்படுத்தி, அதற்காகத் தனியார் பேருந்துகளுக்கு அரசு தகுந்த மானியம் வழங்க வேண்டும் என்ற பிரதான கோரிக்கையை அவர்கள் முன்வைத்துள்ளனர்.

நெருக்கடியில் தனியார் பேருந்துத் துறை:

தமிழ்நாட்டில் சென்னை, மதுரை, நாகர்கோவில், ஊட்டி ஆகிய பகுதிகளைத் தவிர்த்து பிற மாவட்டங்களில் சுமார் 7,000-க்கும் மேற்பட்ட தனியார் பேருந்துகள் இயங்கி வருகின்றன. கடந்த 104 ஆண்டுகளாகப் பொதுமக்களுக்குச் சிறப்பான சேவை வழங்கி வரும் நிலையிலும், கடந்த 2018-ஆம் ஆண்டுக்குப் பிறகு தனியார் பேருந்து கட்டணங்கள் உயர்த்தப்படவில்லை என உரிமையாளர்கள் சுட்டிக்காட்டுகின்றனர். இதனிடையே டீசல் விலை உயர்வு, உதிரி பாகங்களின் விலை ஏற்றம் எனப் பல பொருளாதார நெருக்கடிகளைச் சந்தித்து வரும் சூழலில், அரசின் இப்புதிய விரிவாக்க அறிவிப்புத் தங்களை மேலும் முடக்கும் என்பதால் வேறு வழியின்றி இப்போராட்டத்தைக் கையில் எடுத்துள்ளதாக அவர்கள் தெரிவிக்கின்றனர்.

இதையும் படிக்க: அதிமுக எம்எல்ஏ-க்களை பிச்சையெடுத்து கட்சி நடத்த வேண்டுமா? எடப்பாடி பழனிசாமி கடும் தாக்கு!

முடங்கும் போக்குவரத்து-பொதுமக்கள் அவதி:

இன்று நள்ளிரவு 12 மணி முதல் தொடங்கும் இந்த ஒரு நாள் வேலைநிறுத்தப் போராட்டத்தால், மாவட்டங்களுக்குள் மற்றும் மாவட்டங்களுக்கு இடையே இயங்கும் 7,000 தனியார் பேருந்துகளின் சேவை முற்றிலுமாகத் தடைபடும் அபாயம் உருவாகியுள்ளது. இதன் காரணமாக கிராமப்புற மற்றும் புறநகர்ப் பகுதி மக்கள், பணிக்குச் செல்வோர் மற்றும் மாணவர்கள் கடும் அவதிக்குள்ளாகும் நிலை ஏற்பட்டுள்ளது. நிலைமையைக் கட்டுக்குள் கொண்டுவர அரசு உடனடி பேச்சுவார்த்தை நடத்த வேண்டும் என்றும், மாற்று அரசு பேருந்து வசதிகளைப் பெருக்க வேண்டும் என்றும் பொதுமக்கள் கோரிக்கை விடுத்துள்ளனர்.