கரூர் சம்பவம் ஓராண்டு நினைவு: 41 பேரின் நினைவாக நினைவுச்சின்னம் – செப்.27ல் அடிக்கல் நாட்டுகிறார் முதல்வர் விஜய்

செப்டம்பர் 21, 2026: கரூர் கூட்ட நெரிசல் சம்பவம் நடைபெற்று ஓராண்டு நிறைவடைய உள்ள நிலையில், உயிரிழந்த 41 பேரின் நினைவாக அமைக்கப்பட உள்ள நினைவுச்சின்னத்துக்கு செப்டம்பர் 27-ம் தேதி முதலமைச்சர் விஜய் அடிக்கல் நாட்டி, உயிரிழந்தவர்களுக்கு அஞ்சலி செலுத்த உள்ளதாக தகவல் வெளியாகியுள்ளது. இதற்கான ஏற்பாடுகள் குறித்து தமிழக வெற்றிக் கழகத்தினர் ஆலோசனை மேற்கொண்டு வருவதாக கூறப்படுகிறது.

கரூர் கூட்ட நெரிசல் – உயிரிழந்த 41 பேர்:

கடந்த 2025-ம் ஆண்டு செப்டம்பர் 27-ம் தேதி கரூர் மாவட்டம் வேலுசாமிபுரத்தில் தமிழக வெற்றிக் கழகம் சார்பில் நடைபெற்ற பொதுக்கூட்டத்தில் அக்கட்சியின் தலைவரான விஜய் பங்கேற்று பேசினார். நிகழ்ச்சியின்போது ஏற்பட்ட கடுமையான கூட்ட நெரிசலில் சிக்கி 41 பேர் உயிரிழந்தனர். மேலும் 100-க்கும் மேற்பட்டோர் காயமடைந்தனர். இந்த சம்பவம் தொடர்பாக வழக்குப்பதிவு செய்யப்பட்டு விசாரணைகள் நடைபெற்றன.

மேலும் படிக்க: மதுராந்தகத்தில் ஆட்டோ ஓட்டி, டீ போட்டுக் கொடுத்து வாக்கு சேகரித்த தவெக வேட்பாளர்!

இந்த துயர சம்பவம் நடைபெற்று செப்டம்பர் 27-ம் தேதியுடன் ஓராண்டு நிறைவடைகிறது. இதையொட்டி, உயிரிழந்த 41 பேரின் நினைவாக வேலுசாமிபுரத்தில் நினைவுச்சின்னம் அமைக்கப்படும் என முதலமைச்சர் விஜய், கடந்த ஜூலை மாதம் கரூர் சென்றபோது அறிவித்திருந்ததாக தகவல்கள் தெரிவிக்கின்றன.

31 பேருக்கு அரசு வேலை:

முதலமைச்சராக பதவியேற்ற பின்னர் கடந்த ஜூலை 10-ம் தேதி விஜய் கரூருக்கு சென்றிருந்தார். அப்போது கரூர் கூட்ட நெரிசல் சம்பவத்தில் உயிரிழந்தவர்களின் குடும்பங்களைச் சேர்ந்த 31 பேருக்கு அரசு வேலை வழங்குவதற்கான பணி ஆணைகளை அவர் வழங்கினார். இந்த நடவடிக்கை தொடர்பாக அரசியல் கட்சிகளிடையே கருத்து மற்றும் எதிர்ப்புகள் தெரிவிக்கப்பட்டு வருகின்றன.

மேலும் படிக்க: “விஜய் ஆட்சிக்கு எதிரான முதல் அடி” – மதுராந்தகம் களத்தில் உதயநிதி ஸ்டாலின்..

இடைத்தேர்தல் பிரசாரத்துக்கு பிறகு கரூர் பயணம்:

இதனிடையே, செப்டம்பர் 26-ம் தேதி தாராபுரத்தில் நடைபெற உள்ள இடைத்தேர்தல் பிரசாரத்தில் தமிழக வெற்றிக் கழக வேட்பாளரை ஆதரித்து முதலமைச்சர் விஜய் பிரசாரம் செய்ய உள்ளதாக தகவல்கள் வெளியாகியுள்ளன. இதனைத் தொடர்ந்து, செப்டம்பர் 27-ம் தேதி கரூருக்கு சென்று ஓராண்டு நினைவு நாளையொட்டி நடைபெறும் நிகழ்ச்சிகளில் பங்கேற்க அவர் திட்டமிட்டுள்ளதாக கூறப்படுகிறது.

நினைவுசின்னம் – அடிக்கல் நாட்டும் முதல்வர் விஜய்:

கரூரில் 41 பேருக்கு அஞ்சலி செலுத்தும் நிகழ்ச்சியும், அவர்களின் நினைவாக அமைக்கப்பட உள்ள நினைவுச்சின்னத்துக்கு அடிக்கல் நாட்டும் நிகழ்ச்சியும் ஒரே இடத்தில் நடத்த திட்டமிடப்பட்டுள்ளதாக தகவல்கள் தெரிவிக்கின்றன. இதற்கான இடத்தை தேர்வு செய்யும் பணிகள் கட்சி சார்பில் நடைபெற்று வருவதாகவும் கூறப்படுகிறது.

முதலமைச்சராக ஜோசப் விஜய் பதவியேற்ற பிறகு, அவர் கரூருக்கு 2-வது முறையாக செல்ல உள்ளதாக தகவல்கள் வெளியாகியுள்ளன.