சர்வதேச தரத்தில் சென்னைக்கு 3ஆவது மாஸ்டர் பிளான் திட்டம்.. அதிகாரிகளுக்கு முதல்வர் விஜய் அதிரடி அறிவுறுத்தல்!!

சென்னை, ஜுன் 17: சென்னை பெருநகரத்தின் உட்கட்டமைப்பு மற்றும் பொதுமக்களுக்கான வசதிகளை மேம்படுத்தி தரம் உயர்த்துவதற்காக, சென்னைக்கான ‘மூன்றாவது மாஸ்டர் பிளான்’ திட்டத்தை சர்வதேச தரத்தில் உருவாக்க வேண்டும் என்று தமிழக முதலமைச்சர் விஜய் அதிகாரிகளுக்கு அறிவுறுத்தியுள்ளார். கடந்த ஆட்சிக்காலத்தில் தொடங்கப்பட்ட இத்திட்டத்தை, தற்போதைய முதலமைச்சர் விஜய்யின் அறிவுறுத்தலின்படி, போர்க்கால அடிப்படையில் விரைந்து முடிப்பதற்கான நடவடிக்கைகள் தற்போது முடுக்கிவிடப்பட்டுள்ளன. சென்னை பெருநகர வளர்ச்சிப் பகுதி உலகளாவிய தரத்திற்கு இணையான உட்கட்டமைப்பைப் பெறுவதை உறுதிசெய்யும் நோக்கில் பணிகள் துரிதப்படுத்தப்பட்டுள்ளன.

இதையும் படிக்க: “கோட் சூட், டிபன் பாக்ஸ் செய்திகள் முக்கியமல்ல!”.. ஆட்சியில் நடப்பதை கவனியுங்கள்.. முதல்வர் விஜய்க்கு மு.க.ஸ்டாலின் அறிவுரை!

ஆலோசனை வழங்கிய முதல்வர்:

கடந்த இரண்டு நாட்களுக்கு முன்பாக, முதலமைச்சர் விஜய் தலைமையில் சென்னை பெருநகர வளர்ச்சி மற்றும் உட்கட்டமைப்பு தொடர்பான முக்கிய ஆய்வுக்கூட்டம் ஒன்று நடைபெற்றது. இக்கூட்டத்தில், சென்னை பெருநகரத்தை உலகளாவிய தரத்திற்கு உயர்த்தும் நோக்கில், துறை ரீதியான அதிகாரிகளுக்கு முதல்வர் பல்வேறு ஆலோசனைகளை வழங்கினார்.

உலகின் முன்னணி நவீன நகரங்களைப் போல சென்னையும் ஒரு சர்வதேச நகரமாக மாற வேண்டும் என்றும், இதற்காகப் பல்வேறு சர்வதேச அமைப்புகளுடன் இணைந்து இந்த மூன்றாவது பெருந்திட்டத்தைத் தயாரிக்க வேண்டும் என்றும் தமிழக வெற்றிக் கழக அரசு திட்டமிட்டுள்ளதாகத் தகவல்கள் வெளியாகியுள்ளன. நகரமயமாக்கல், போக்குவரத்து நெரிசல் மேலாண்மை, சுற்றுச்சூழல் பாதுகாப்பு மற்றும் அதிநவீன உட்கட்டமைப்பு வசதிகள் ஆகியவற்றை உள்ளடக்கியதாக இத்திட்டம் அமையவுள்ளது.

2026 – 2046 பெருந்திட்டம்:

சென்னை பெருநகர வளர்ச்சி குழுமம் (CMDA) சென்னை பெருநகரத்திற்கான முழுமையான திட்டத்தை 2026 முதல் 2046 வரையிலான காலகட்டத்தைக் கணக்கில் கொண்டு தயார் செய்யும் பணிகளில் ஈடுபட்டு வருகிறது. சென்னையில் ஏற்கனவே இருமுறை பெருந்திட்டங்கள் செயல்படுத்தப்பட்டுள்ளன. முதல் முழுமைத் திட்டம் 1976 ஆம் ஆண்டு உருவாக்கப்பட்டது. இரண்டாவது முழுமைத் திட்டம் 2006 முதல் 2026 ஆம் ஆண்டு வரை அமலில் உள்ளது. தற்போது 2ஆவது திட்டத்தின் கால அளவு முடிவடையும் நிலையில், புதிய 20 ஆண்டுகால (2026–2046) தேவைகளை எதிர்கொள்ளும் வகையில் இந்த 3ஆவது புதிய மாஸ்டர் பிளான் திட்டம் உருவாக்கப்பட்டு வருகிறது.

விரிவடையும் சென்னை பெருநகரம்:

தற்போது 1,189 சதுர கிலோமீட்டர் பரப்பளவைக் கொண்ட சென்னை பெருநகரப் பகுதிக்கு இந்த மூன்றாவது பெருந்திட்டத்தைத் தயாரிப்பதற்கான முதற்கட்ட பணிகள் கடந்த 2022 ஆம் ஆண்டே (கடந்த ஆட்சியில்) தொடங்கப்பட்டு, கடந்த மூன்று ஆண்டுகளாக நடைபெற்று வந்தன.

இதையும் படிக்க: திமுக கூட்டணியில் இருந்து வெளியேறுகிறதா மதிமுக?.. முதல்வர் விஜய்யை இன்று சந்திக்கிறார் வைகோ!!

இந்நிலையில், பொறுப்பேற்றுள்ள புதிய அரசு, சென்னை வளர்ச்சியை அடுத்த கட்டத்திற்கு எடுத்துச் செல்லும் நோக்கில், இத்திட்டத்தை முழுமையாகச் சர்வதேச தரத்தில் மாற்றி அமைக்க முடிவு செய்துள்ளது. இந்த மூன்றாவது மாஸ்டர் பிளான் தயாரிக்கும் பணிகள் விரைவில் முடிக்கப்பட்டு, பொதுமக்கள் பயன்பாட்டிற்காக அதிகாரப்பூர்வமாக வெளியிடப்படும் என எதிர்பார்க்கப்படுகிறது.