Team India: ஒருநாள் போட்டியில் கில், பும்ராவுக்கு ஓய்வா..? சீக்ரெட்டை உடைத்த கம்பீர்!
New Zealand Test Tour: இந்திய அணியின் நியூசிலாந்து சுற்றுப்பயணத்திற்கு முன், வெஸ்ட் இண்டீஸ் ஒருநாள் தொடரில் சில முக்கிய வீரர்களுக்கு ஓய்வளிக்கப்படலாம். 50 ஓவர் போட்டிகளிலிருந்து டெஸ்ட் வடிவத்திற்கு மாறுவதற்குத் தேவையான தயாரிப்பு நேரத்தை உறுதி செய்ய, கில், ராகுல் போன்றோருக்கு ஓய்வு வழங்க தலைமைப் பயிற்சியாளர் கம்பீர் பரிந்துரைத்துள்ளார். 2027 உலகக் கோப்பை திட்டங்களுக்காக பும்ரா, ஹர்திக் பாண்டியாவின் பணிச்சுமை மேலாண்மையும் இதில் அடங்கும்.
டெஸ்ட் கிரிக்கெட்டுக்கு வீரர்களை நன்கு தயார்படுத்தும் நோக்கில், வரவிருக்கும் இந்திய அணியின் (Indian Cricket Team) நியூசிலாந்து சுற்றுப்பயணத்தின் போது வெஸ்ட் இண்டீஸ் அணிக்கு எதிரான ஒருநாள் தொடரில் இருந்து சில முக்கிய பேட்ஸ்மேன்களுக்கு ஓய்வளிக்கப்படலாம். 50 ஓவர் கிரிக்கெட்டில் இருந்து 5 நாள் டெஸ்ட் போட்டிகளுக்கு குறுகிய காலத்தில் மாறுவது எளிதல்ல என்றும், வீரர்களுக்குப் போதுமான தயாரிப்பு நேரத்தை வழங்குவது முக்கியம் என்றும் தலைமைப் பயிற்சியாளர் கவுதம் கம்பீர் (Gautam Gambir) கூறினார்.
ALSO READ: வெஸ்ட் இண்டீஸ் எதிரான ஒருநாள் தொடர்.. திருவனந்தபுரம் வந்த கிங் கோலி!
இந்தியாவின் நியூசிலாந்து சுற்றுப்பயணம், 3 வடிவங்களிலும் 12 போட்டிகளைக் கொண்ட ஒரு நீண்ட சுற்றுப்பயணமாக அமையவுள்ளது. அட்டவணையின்படி, 5வது மற்றும் கடைசி ஒருநாள் போட்டி வருகின்ற 2026 நவம்பர் 16ம் தேதியும், முதல் டெஸ்ட் போட்டி 2026 நவம்பர் 19ம் தேதி வெலிங்டனில் தொடங்கும். இதன் பொருள், ஒருநாள் போட்டிகள் முடிந்த 3 நாட்களுக்குப் பிறகே டெஸ்ட் போட்டிகள் தொடங்கும் என்பதாகும். இதன் விளைவாக, டெஸ்ட் தொடருக்கு முன்பு வீரர்கள் பயிற்சி செய்வதற்கு 2 நாட்கள் மட்டுமே அவகாசம் கிடைக்கும்.
யார் யாருக்கு ஓய்வு கொடுக்க வாய்ப்பு..?
ஜியோ ஸ்டாருக்கு அளித்த பேட்டியில் கம்பீர் கூறுகையில், ”டி20 போட்டிகளிலிருந்து ஒருநாள் போட்டிகளுக்கு மாறுவது ஒப்பீட்டளவில் எளிதானது என்றாலும், டெஸ்ட் போட்டிகளுக்குத் தயாராவதற்காக பேட்ஸ்மேன்களுக்கு டி20 மற்றும் ஒருநாள் கிரிக்கெட்டிலிருந்து ஓய்வு அளிக்க வேண்டியது அவசியமாகலாம். இந்த நிலையில், கேப்டன் சுப்மன் கில், கே.எல். ராகுல், யஷஸ்வி ஜெய்ஸ்வால் போன்ற முக்கிய பேட்ஸ்மேன்களும், ஜஸ்பிரித் பும்ரா, முகமது சிராஜ், ரவீந்திர ஜடேஜா, நிதிஷ் ரெட்டி ஆகியோரும் சில ஒருநாள் போட்டிகளில் இருந்து நீக்கப்படலாம்.
ALSO READ: ஆசியன் கேம் டார்க்கெட்.. இந்திய அணியின் அடுத்த போட்டி எப்போது?
பும்ராவும் ஹர்திக்கும் உலகக் கோப்பை திட்டங்களின் முக்கிய அங்கங்கள் ஆவர். 2027 ஒருநாள் உலகக் கோப்பைக்கான ஆயத்தப் பணிகள், வெஸ்ட் இண்டீஸ் எதிரான சொந்த மண்ணில் நடைபெறும் ஒருநாள் தொடருடன் தொடங்கும். ஆசிய விளையாட்டுப் போட்டிகள் காரணமாக ஜஸ்பிரித் பும்ரா பங்கேற்க மாட்டார். அதே சமயம், ஹர்திக் பாண்டியா ஒருநாள் போட்டியில் முழு 10 ஓவர்கள் பந்துவீசும் அளவிற்கு இன்னும் உடற்தகுதியுடன் இல்லை. உலகக் கோப்பைத் திட்டங்களில் இவர்கள் இருவரும் முக்கியப் பங்கு வகிக்கின்றனர். ஐபிஎல் தொடருக்குப் பிறகு ஹர்திக் பாண்ட்யா அதிகம் கிரிக்கெட் விளையாடாததால், அவருக்குப் போதுமான போட்டிப் பயிற்சி மிகவும் அவசியம். உலகக் கோப்பைக்கு முன்பு போதுமான போட்டிகளில் விளையாடி, உத்வேகத்தைப் பெறுவது முக்கியமானதாக இருக்கும்” குறிப்பிட்டார்.
