Team India: சிறந்த பார்ம்.. கில் டி20 அணியில் இடம்பெறாதது ஏன்..? கிடைத்த சீக்ரெட் தகவல்!
Shubman Gill: 2025 மே மாதம் ரோஹித் சர்மா டெஸ்ட் போட்டிகளிலிருந்து ஓய்வு பெற்றதிலிருந்து, சுப்மன் கில் டெஸ்ட் அணிக்கும் பின்னர் ஒருநாள் அணிக்கும் தலைமை தாங்கும் பொறுப்பை ஏற்றுள்ளார். ஆனால், டி20 சர்வதேச அணியில் கில்லின் பெயர் எங்கும் இடம்பெறவில்லை.
இந்திய அணியின் (Indian Cricket Team) நட்சத்திர பேட்ஸ்மேனும், டெஸ்ட்-ஒருநாள் போட்டிகளின் கேப்டனுமான சுப்மன் கில் குறித்து முக்கிய செய்தி வெளியாகியுள்ளது. ஐபிஎல் 2026 சீசனில் (IPL 2026) சிறப்பான ஃபார்மில் இருந்து ரன்களைக் குவித்த போதிலும், சுப்மன் கில் டி20 அணியிலிருந்து முற்றிலுமாக நீக்கப்பட்டுள்ளார். இது அவரது ஆட்டத்தின் காரணமாக அல்ல, மாறாக பிசிசிஐ-யின் ஒரு பெரிய வியூகத்தின் ஒரு பகுதியாகும். தற்போதைக்கு டி20 கிரிக்கெட்டை ஒதுக்கி வைத்துவிட்டு, 2027 உலக டெஸ்ட் சாம்பியன்ஷிப் (WTC) இறுதிப் போட்டி மற்றும் 2027 ஒருநாள் உலகக் கோப்பையில் மட்டுமே கவனம் செலுத்த வேண்டும் என்று பிசிசிஐ கில்லுக்கு முக்கிய உத்தரவை பிறப்பித்துள்ளது.
ALSO READ: மும்பையை அன்ஃபாலோ செய்த சூர்யகுமார் யாதவ்.. ஐபிஎல்லில் வேறு அணிக்கு மாற்றமா?
டெஸ்ட் மற்றும் ஒருநாள் போட்டிகளில் கவனம்:
2025 மே மாதம் ரோஹித் சர்மா டெஸ்ட் போட்டிகளிலிருந்து ஓய்வு பெற்றதிலிருந்து, சுப்மன் கில் டெஸ்ட் அணிக்கும் பின்னர் ஒருநாள் அணிக்கும் தலைமை தாங்கும் பொறுப்பை ஏற்றுள்ளார். ஆனால், டி20 சர்வதேச அணியில் கில்லின் பெயர் எங்கும் இடம்பெறவில்லை. சமீபத்தில் நடைபெற்ற ஐபிஎல் 2026 சீசனில் கில் சிறப்பாக பேட்டிங் செய்து 732 ரன்கள் எடுத்தார். இருப்பினும், தேர்வாளர்கள் வேறு பாதையைத் தேர்ந்தெடுத்து, இங்கிலாந்து-அயர்லாந்து தொடர் மற்றும் ஆசிய விளையாட்டுப் போட்டிகளிலிருந்து சுப்மன் கில்லை நீக்கியுள்ளனர். அதற்குப் பதிலாக, அபிஷேக் சர்மா, சஞ்சு சாம்சன், வைபவ் சூர்யவன்ஷி மற்றும் இஷான் கிஷன் போன்ற வீரர்கள் தொடக்க ஆட்டக்காரர்களாகத் தேர்ந்தெடுக்கப்பட்டுள்ளனர்.
பணிச்சுமை மேலாண்மை:
பிடிஐ செய்தி நிறுவனத்தின் அறிக்கையின்படி, கில்லின் பணிச்சுமை குறித்து தேர்வாளர்கள் மிகவும் கவலை கொண்டுள்ளதாக பிசிசிஐ வட்டாரம் தெரிவித்துள்ளது. அடுத்த 18 மாதங்களில் இந்திய அணியின் கிரிக்கெட் அட்டவணை மிகவும் பரபரப்பாக இருப்பதால், எந்தவொரு வீரரும் 3 வடிவங்களிலும் (டெஸ்ட், ஒருநாள் மற்றும் டி20) தொடர்ந்து விளையாடி 100% உடற்தகுதியுடன் இருப்பது கிட்டத்தட்ட சாத்தியமற்றது. இந்தக் காரணத்திற்காக, கில் டெஸ்ட் மற்றும் ஒருநாள் போட்டிகளில் மட்டுமே கவனம் செலுத்த வேண்டும் என்று பிசிசிஐ தெரிவித்துள்ளது.
ALSO READ: இரவு 11 மணிக்கு இந்தியா – இங்கிலாந்து டி20 தொடரா..? முக்கிய முடிவை எடுத்த கிரிக்கெட் வாரியம்!
கில் மீண்டும் டி20 அணிக்குத் திரும்ப மாட்டாரா?
தற்போதைக்கு டி20 கிரிக்கெட்டில் கில்லின் எதிர்காலம் குறித்து உறுதியாக எதையும் கூறுவது மிகவும் கடினம். முன்னதாக, மோசமான ஃபார்ம் காரணமாக, 2026 டி20 உலகக் கோப்பைக்கான தனது இடத்தையும் சுப்மன் கில் இழந்திருந்தார். பிசிசிஐ வட்டாரங்களின்படி, 2028-ல் டி20 உலகக் கோப்பை மற்றும் 2028 ஒலிம்பிக் என இரண்டு பெரிய விளையாட்டு போட்டிகள் வரவிருக்கின்றன. ஆனால், இன்னும் இரண்டு ஆண்டுகள் மீதமுள்ளன. இன்னும் 2 ஆண்டுகளுக்குப் பிறகு எந்த வீரர் எந்த ஃபார்மில் இருப்பார், யாருடைய உடற்தகுதி எப்படி இருக்கும் என்பதை பிசிசிஐ தேர்வுக்குழு முடிவு செய்யும்.
