அளவுக்கு மிஞ்சினால் காரமும் நஞ்சே: தினமும் உண்பதால் ஏற்படும் பக்கவிளைவு என்ன?

இந்திய உணவுகளில் மிளகாய் முக்கிய இடத்தைப் பிடித்திருந்தாலும், அதைத் தினமும் அளவுக்கு அதிகமாக உட்கொள்வது உடலுக்குப் பல உபாதைகளை ஏற்படுத்துகிறது. மிளகாயில் உள்ள கேப்சைசின் என்ற வேதிப்பொருள் செரிமான மண்டலத்தில் கடுமையான எரிச்சலையும் அசிடிட்டியையும் தூண்டுகிறது. அதிக காரம் உண்பதால் நெஞ்செரிச்சல், புளித்த ஏப்பம் மற்றும் GERD போன்ற வயிற்றுப் பிரச்சனைகள் தீவிரமடைகின்றன. இது குடல் இயக்கத்தைப் பாதித்து திடீர் வயிற்றுப்போக்கு, கடுமையான வயிற்று வலி மற்றும் IBS கோளாறுகளை ஊக்குவிக்கிறது. மேலும், வாய், நாக்கு மற்றும் தொண்டைப் பகுதியில் தொடர்ச்சியான தற்காலிக எரிச்சல் உணர்வை உண்டாக்குகிறது. எனவே, மிளகாய்த்தூளுக்குப் பதிலாகச் சீரகம், தனியா, மஞ்சள் போன்ற ஆரோக்கியமான மசாலாப் பொருட்களைப் பயன்படுத்துவது சிறந்தது.

காரமான உணவுகளை உண்பதால் ஏற்படும் பக்கவிளைவு

இந்திய உணவு முறைகளில் மிளகாய் மற்றும் மசாலாப் பொருட்களுக்கு முக்கிய பங்கு உண்டு. மிளகாயில் உள்ள கேப்சைசின் (Capsaicin) என்ற வேதிப்பொருள் சில நன்மைகளை வழங்கினாலும், தினமும் அளவுக்கு அதிகமான காரத்தை உட்கொள்வது ஆரோக்கியத்திற்குப் பல்வேறு தீங்குகளை விளைவிக்கும் என மருத்துவ வல்லுநர்கள் எச்சரிக்கின்றனர்.

வயிற்று எரிச்சல் மற்றும் அமிலத்தன்மை பிரச்சனைகள்

காரமான உணவுகள் உட்கொள்ளும்போது மிளகாயில் உள்ள கேப்சைசின் நரம்புகளைத் தூண்டி உடலில் வெப்பத்தை அதிகரிக்கிறது. இதனால் செரிமானப் பாதையில் நெஞ்செரிச்சல், அசிடிட்டி மற்றும் புளித்த ஏப்பம் போன்றவை ஏற்படுகின்றன. மேலும் GERD எனப்படும் நெஞ்செரிச்சல் நோயால் பாதிக்கப்பட்டவர்களுக்கு கார உணவுகள் இந்த உபாதைகளை மேலும் தீவிரமாக்குகின்றன.

செரிமானப் பாதை பிரச்சனைகள்

அதிகளவு காரம் சாப்பிடுவது வயிற்றுப்போக்கு, கடுமையான வயிற்று வலி மற்றும் செரிமானக் கோளாறுகளுக்கு வழிவகுக்கிறது. குறிப்பாக, ஐ.பி.எஸ் (IBS) எனப்படும் குடல் சார்ந்த கோளாறுகள் உள்ளவர்கள் கார உணவுகளைத் தவிர்க்க வேண்டும். தொடர்ந்து செரிமானக் கோளாறு ஏற்படுபவர்கள் உணவில் காரத்தைக் குறைப்பது நலம் தரும்.

வாய், நாக்கு மற்றும் தொண்டையில் எரிச்சல்

மிளகாயில் உள்ள வேதிப்பொருள் சூட்டையும் வலியையும் உணர்த்தும் நரம்புகளைத் தூண்டுவதால் வாய், நாக்கு மற்றும் தொண்டைப் பகுதியில் கடுமையான எரிச்சல் உணர்வு உண்டாகிறது. இது தற்காலிகமானது என்றாலும், தொடர்ந்து அதிக காரம் உண்பது செரிமான மண்டலத்தின் உறுப்புகளைப் பாதிக்கும்.

Also Read: மருதாணி வைத்தால் சளி பிடிக்குமா? சட்டுனு தடுக்கும் சூப்பர் டிப்ஸ்!

உணவில் எவ்வளவு காரம் இருந்தால் அது சரியான அளவு?

காரத்தைத் தாங்கும் திறன் மனிதனுக்கு மனிதன் மாறுபடும் என்பதால், இதற்கென தனி அளவீடு எதுவுமில்லை. இருப்பினும், உணவு உண்ட பிறகு வயிற்று அசௌகரியம் அல்லது அமிலத்தன்மை தோன்றினால் உடனே காரத்தின் அளவைக் குறைக்க வேண்டியது அவசியமாகும்.

காரமான உணவுகளை அதிகம் விரும்புபவர்களுக்கு சில டிப்ஸ்

அதிக மிளகாய்த்தூளுக்குப் பதிலாகச் சீரகம், மஞ்சள் மற்றும் தனியா போன்ற ஆரோக்கியமான மசாலாப் பொருட்களைப் பயன்படுத்தலாம். நார்ச்சத்து நிறைந்த பழங்கள், காய்கறிகளைச் சேர்ப்பதும், போதிய அளவு நீர் அருந்துவதும் செரிமானத்தைச் சீராக்கும். இருப்பினும், காரத்தைக் குறைத்தும் தொடர்ந்து கடுமையான வயிற்று வலி, மலத்தில் ரத்தம் அல்லது தொடர் எடை இழப்பு இருந்தால் உடனடியாக மருத்துவரை அணுக வேண்டும்.