7 Hours to Go, The Final Exit மற்றும் Ghost உள்ளிட்ட படங்களில் நடித்த நடிகை அனன்யா ராஜ், தனது 27வது வயதில் ஜூலை 15ஆம் தேதி உயிரிழந்தார். அவரது குடும்பத்தினர் சுமார் ஒரு மாதத்திற்குப் பிறகு, அதிகாரப்பூர்வ இன்ஸ்டாகிராம் பக்கத்தில் வெளியிட்ட அறிக்கை மூலம் இந்தத் தகவலை உறுதிப்படுத்தினர். கடந்த ஓராண்டுக்கும் மேலாக அனன்யா உடல் மற்றும் மனரீதியான பாதிப்புகளை எதிர்கொண்டு வந்ததாகவும், அவற்றிலிருந்து மீள அவர் போராடி வந்ததாகவும் குடும்பத்தினர் தெரிவித்துள்ளனர். ஜூலை 15ஆம் தேதி அதிகாலை தூக்கத்திலேயே அவர் அமைதியாக உயிரிழந்ததாகவும் கூறியுள்ளனர். “அனன்யா வலிமையான மன உறுதி கொண்டவர். ராணியைப் போல வாழ்ந்தவர். அவரது இழப்பு மிகுந்த வேதனையை ஏற்படுத்தியுள்ளது. அவரது ஆன்மா சாந்தியடைய பிரார்த்திக்குமாறு கேட்டுக்கொள்கிறோம். இந்த கடினமான நேரத்தில் எங்களது தனிப்பட்ட இடத்தையும் அமைதியையும் மதிக்க வேண்டும்” என குடும்பத்தினர் தெரிவித்துள்ளனர். மும்பையில் வளர்ந்த அனன்யா, திரைப்படங்கள் மற்றும் இசை வீடியோக்கள் மூலம் திரையுலகில் அறிமுகமானார். 2016ஆம் ஆண்டு 7 Hours to Go படத்தின் மூலம் பாலிவுட்டில் அறிமுகமானார். தொடர்ந்து The Final Exit, Ghost உள்ளிட்ட படங்களில் நடித்தார். தெலுங்கில் Thaggede Le, மும்மொழிப் படமான Madrasi Gang ஆகியவற்றிலும் நடித்துள்ளார்.
