உங்கள் வயதுக்கு ஏற்ற எடை எவ்வளவு? தூக்கும் முன் இதை தெரிஞ்சுக்கோங்க!

வயதுக்கு ஏற்ப எடை தூக்கும் திறன் ஒவ்வொருவருக்கும் மாறுபடும். உடல் எடை, பயிற்சி அனுபவம், உடல்நிலை மற்றும் தசை வலிமை போன்றவை இதில் முக்கிய பங்கு வகிக்கின்றன. இளம் வயதில் சரியான உடற்பயிற்சி நுட்பத்தை கற்றுக்கொள்வது அவசியம். 30 மற்றும் 40 வயதுகளில் தொடர்ந்து வலிமைப் பயிற்சி செய்வது தசை வலிமையை பாதுகாக்க உதவும். 50 வயதுக்கு மேல் தசை மற்றும் எலும்பு ஆரோக்கியத்தை கருத்தில் கொண்டு பயிற்சியை மேற்கொள்ள வேண்டும். 60 வயதுக்கு மேல் அன்றாட செயல்களை எளிதாக செய்யும் திறனும் முக்கியமான வலிமை அளவுகோலாகும். எந்த வயதிலும் குறைந்த எடையில் தொடங்கி, படிப்படியாக பயிற்சியை அதிகரிப்பது பாதுகாப்பான அணுகுமுறையாகும்.

வயதுக்கு ஏற்ற உடற்பயிற்சி

வயது அதிகரிக்கும்போது உடல் வலிமையை பராமரிப்பதில் எடை தூக்கும் பயிற்சிகள் முக்கிய பங்கு வகிக்கின்றன, ஆனால் அனைவருக்கும் ஒரே அளவு எடையை தூக்க வேண்டும் என்ற பொதுவான விதி கிடையாது. ஒருவர் எவ்வளவு எடையை தூக்க முடியும் என்பதை வயது அல்லது உடல் எடை மட்டும் தீர்மானிப்பதில்லை; பயிற்சி அனுபவம், உடல்நிலை, தசை வலிமை, காயங்களின் வரலாறு, உடல் இயக்கத்திறன், தூக்கம் மற்றும் மீட்பு போன்ற பல காரணிகள் இதில் தாக்கம் செலுத்துகின்றன.

20 வயதில் கவனம்

20 வயதுகளில் இருப்பவர்கள் முதலில் squat, hinge, push, pull, lunge போன்ற அடிப்படை இயக்கங்களை சரியான முறையில் கற்றுக்கொண்டு, படிப்படியாக பயிற்சியின் சிரமத்தை அதிகரிப்பது சிறந்த அணுகுமுறையாகும். இந்த வயதில் எடையை அதிகரிப்பதைவிட சரியான நுட்பத்துடன் தொடர்ந்து பயிற்சி செய்வது முக்கியம்.

30 வயதில் தொடர்ச்சி

30 வயதுகளில் வேலை, குடும்பம் உள்ளிட்ட பொறுப்புகள் அதிகரித்தாலும் உடற்பயிற்சியை முற்றிலும் கைவிடாமல், compound exercises போன்ற பயிற்சிகளை தொடர்ந்து செய்வது தசை வலிமையை பாதுகாக்க உதவும். இந்த காலகட்டத்தில் உடல் இயக்கத்திறன் மற்றும் ஏற்கனவே உள்ள வலிகளை கவனிப்பதும் அவசியம்.

40 மற்றும் 50 வயதில் முக்கியத்துவம்

40 மற்றும் 50 வயதுகளில் தசை வலிமையை பாதுகாப்பது மிகவும் முக்கியமாகிறது, குறிப்பாக பெண்களுக்கு ஹார்மோன் மாற்றங்கள் தசை, எலும்பு ஆரோக்கியம் மற்றும் உடல் மீட்பு ஆகியவற்றில் தாக்கத்தை ஏற்படுத்தக்கூடும் என்பதால் வாரத்திற்கு இரண்டு முதல் மூன்று நாட்கள் வலிமைப் பயிற்சியை மேற்கொள்வது பயனுள்ளதாக இருக்கும்.

60 வயதுக்கு மேல்

60 வயதுக்கு மேல் எவ்வளவு கிலோ எடையை தூக்குகிறோம் என்பதைக் காட்டிலும், நாற்காலியில் இருந்து உதவியின்றி எழுதல், படிக்கட்டுகளில் ஏறுதல், பொருட்களை எடுத்துச் செல்லுதல், தரையில் அமர்ந்து மீண்டும் எழுதல் மற்றும் சமநிலையை பராமரித்தல் போன்ற அன்றாட செயல்களை சுலபமாக செய்யும் திறனே முக்கியமான வலிமை அளவுகோலாக பார்க்கப்படுகிறது.

Also Read: கோடை பழக்கங்களை அப்படியே தொடராதீங்க… மழைக்காலத்தில் இதை மாற்றுங்க!

சரியான எடையை தேர்வு செய்வது எப்படி?

புதியதாக எடைப் பயிற்சியை தொடங்குபவர்கள் குறைந்த எடையில் 8 முதல் 12 முறை செய்யக்கூடிய அளவில் தொடங்கி, கடைசி சில repetitions சிரமமாக இருந்தாலும் உடற்பயிற்சியின் நுட்பம் மாறாமல் இருக்கிறதா என்பதை கவனிக்க வேண்டும். வலி ஏற்படுதல், உடலை அசைத்து எடையை தூக்குதல் அல்லது சரியான இயக்க வரம்பை பின்பற்ற முடியாத நிலை ஏற்பட்டால் எடை அதிகமாக இருக்கலாம்.

வயது தடையல்ல

எந்த வயதிலும் வலிமைப் பயிற்சியை தொடங்க முடியும் என்றும், வயது அதிகரித்துவிட்டதால் எடைப் பயிற்சியை தவிர்ப்பது அவசியமில்லை என்றும் நிபுணர்கள் தெரிவிக்கின்றனர்; சரியான நுட்பம், படிப்படியான முன்னேற்றம் மற்றும் போதுமான ஓய்வுடன் பயிற்சி மேற்கொண்டால் உடல் வலிமையையும் அன்றாட செயல்திறனையும் மேம்படுத்த முடியும்.

பொறுப்புத் துறப்பு: இத்தளத்தில் உள்ள லைப்ஸ்டைல், ஆரோக்கியம் மற்றும் உணவு சார்ந்த தகவல்கள் பொதுவான விழிப்புணர்விற்காக மட்டுமே; இவை மருத்துவ ஆலோசனையல்ல. இதில் உள்ள குறிப்புகளைப் பின்பற்றும் முன் தகுந்த நிபுணர் அல்லது மருத்துவரின் ஆலோசனையைப் பெறுவது அவசியமாகும்.