Menstrual Hygiene Day: மாதவிடாய் கொள்கை சீர்திருத்தங்களை கோரும் இந்தியப் பெண்கள்

ஒவ்வொரு ஆண்டும் மே 28 அன்று உலக மாதவிடாய் சுகாதார தினம் அனுசரிக்கப்படுகிறது. இந்த தினம் இந்தியா முழுவதும் உள்ள கோடிக்கணக்கான பெண்கள் மற்றும் சிறுமிகளுக்கு, மாதவிடாயை பாதுகாப்பாகவும், கண்ணியத்துடனும் கையாள்வது ஒரு அன்றாட சவாலாகவே உள்ளது என்பதை நினைவூட்டுகிறது. செயல்படாத கழிப்பறைகள் உள்ள பள்ளிகள் முதல் மாதவிடாய் விடுமுறையை ஏற்றுக்கொள்ள மறுக்கும் பணியிடங்கள் வரை, இந்தத் தடைகள் கட்டமைப்பு ரீதியானவை, கலாச்சார ரீதியானவை மற்றும் ஆழமாக வேரூன்றியவையாக பார்க்கப்படுகிறது.

இந்த தினத்தைக் குறிக்கும் வகையில், நியூஸ்9 தொலைக்காட்சி தி ஷீகானமி அஜெண்டா, பீரியட் பவர் என்ற நிகழ்ச்சியை நடத்தியது. இதில் மருத்துவர்கள், கொள்கை வகுப்பாளர்கள், சட்ட வல்லுநர்கள் மற்றும் விளையாட்டு வீரர்கள் ஒன்றிணைந்து, முக்கிய கொள்கை உரையாடல்களில் அரிதாகவே இடம்பெறும் பிரச்சினைகளை பற்றி பேசினர்.

இந்திய பணியிடங்களில் தவிர்க்கப்படும் உரையாடல்

பெரும்பாலான இந்தியப் பணியிடங்களில் பெண்கள் மாதவிடாயை கையாள்வதற்கு முறையான கொள்கை எதுவும் இல்லை. இந்தப் பிரச்னை விடுப்பு பற்றியது மட்டுமல்ல, சுத்தமான கழிப்பறைகள், பிரத்யேக குப்பை தொட்டிகள், சிறிய பிரேக் ஆகியவை குறித்து இந்த உரையாடல் நடைபெற்றது.

இதுகுறித்து பேசிய சுலப் சர்வதேச சமூக சேவை அமைப்பின் தேசிய இயக்குநர் நிர்ஜா பட்நாகர், நமது பணி கலாச்சாரம் பெரும்பாலும் ஆண்களை மையமாகக் கொண்டதாகவே உள்ளது. பணியிடங்கள் பாலின சமத்துவத்துடன், நெகிழ்வான பணி ஏற்பாடுகளுடன் இருக்க வேண்டும், மேலும் மாதவிடாய் விடுப்பு போன்ற கொள்கைகளைத் தீவிரமாகக் கருத்தில் கொள்ள வேண்டும்,” என்று தெரிவித்தார்.

அவரைத் தொடர்ந்து பேசிய உச்ச நீதிமன்ற மூத்த வழக்கறிஞர் கீதா லூத்ரா, “சுத்தமான மற்றும் எளிதில் அணுகக்கூடிய கழிப்பறைகள் முதல் தேவையாகும். பணியிடங்கள் மற்ற வகை விடுப்புகளை வழங்குவதைப் போலவே, மாதவிடாய் விடுப்புக்கும் ஏற்பாடு இருக்க வேண்டும்,” என்று தெரிவித்தார்.

மேக்ஸ் ஹெல்த்கேரின் IVF துறைத் தலைவர் டாக்டர் சர்வீன் குமான் சிந்து, மாதவிடாயைச் சுற்றியுள்ள ஆழமான பிரச்னைகளை சுட்டிக்காட்டினார். அப்போது பேசிய அவர், மாதவிடாய் விடுப்பு போன்ற நடவடிக்கைகள் மூலம் முறையான அங்கீகாரம் கிடைக்கும் வரை, மக்கள் மாதவிடாய் பற்றி வெளிப்படையாகப் பேசத் தயங்குகிறார்கள். மாதவிடாய் என்பது வாழ்க்கையின் ஒரு இயற்கையான பகுதி என்பதை நாம் ஏற்றுக்கொண்டு, இந்தப் பிரச்னையை பாரபட்சமின்றி அணுக வேண்டும்,” என்று அவர் கூறினார்.

கொள்கையின் நோக்கம் மற்றும் செயலாக்கம்

நிதி ஆயோக்கின் முன்னாள் இயக்குநர் உர்வசி பிரசாத் பேசியதாவது, அதிகரித்து வரும் விழிப்புணர்வு இருந்தபோதிலும், கொள்கை ரீதியான நடவடிக்கைகள் குறைவாகவே உள்ளன. பல கொள்கைகள் செயலாக மாறுவதில் தோல்வியடைகின்றன. பெண்களுக்காக அறிமுகப்படுத்தப்படும் நடவடிக்கைகள் தவறாகப் பயன்படுத்தப்படக்கூடியவை என்று பெரும்பாலும் பார்க்கப்படும் ஒரு மனநிலைப் பிரச்சினை இன்னும் உள்ளது. இந்தக் கொள்கைகள் திறம்பட செயல்படுத்தப்படுவதை உறுதிசெய்ய, மனநிலையில் ஒரு மாற்றம் தேவை என்று கூறினார்.

தி ஹியூமன் கேப்பிட்டல் கோ நிறுவனத்தின் ஆலோசகரான டாக்டர் கிரண்பிரீத் கவுர் மேலும் கூறுகையில், “மாதவிடாய் சுகாதாரம் மற்றும் அது தொடர்பான பிரச்னைகள் குறித்து மக்களிடையே அதிக விழிப்புணர்வை ஏற்படுத்த வேண்டிய அவசியம் உள்ளது” என்றார்.

அப்போது பேசிய எவரெஸ்ட் சிகரத்தை அடைந்த சுனிதா சிங் சோகன், “எவரெஸ்ட் சிகரம் ஏறும் போது எனக்கு மாதவிடாய் ஏற்பட்டிருந்தது, மேலும் அந்தப் பயணத்தின் போது பல சிரமங்களை எதிர்கொண்டேன். குறைந்த அளவு ஆக்ஸிஜன் மற்றும் உடல்ரீதியான சவால்கள் இருந்தபோதிலும், சிகரத்தை அடைய என்னை நானே உந்தித் தள்ளிக்கொண்டேன்,” என்று அவர் கூறினார். இதன் மூலம், பெண்கள் பெரும்பாலும் போதுமான ஆதரவோ அல்லது அங்கீகாரமோ இன்றி, மாதவிடாயைச் சமாளிக்கும்போதே அசாதாரணமான சாதனைகளை நிகழ்த்துகிறார்கள் என்ற உண்மையை அவர் எடுத்துக்காட்டினார்.