இந்தியாவின் முதல் தனியார் ராக்கெட்.. ஸ்ரீஹரிக்கோட்டாவில் இருந்து விண்ணில் சீறிப்பாய்ந்த விக்ரம் 1..
சுமார் 350 கிலோ எடையுள்ள செயற்கைக்கோள்களை பூமியில் இருந்து 450 கிலோமீட்டர் உயரத்தில் உள்ள சுற்றுப்பாதையில் நிலைநிறுத்தும் வகையில் விக்ரம்-1 வடிவமைக்கப்பட்டுள்ளது. நான்கு நிலைகளைக் கொண்ட இந்த ஏவுவாகனத்தின் முதல் மூன்று நிலைகளில் திட எரிபொருள் இயந்திரங்களும், நான்காவது நிலையில் திரவ எரிபொருள் இயந்திரமும் பயன்படுத்தப்படுகின்றன.
ஜூலை 18, 2026: இந்தியாவின் விண்வெளித் துறையின் வளர்ச்சிக்கு மேலும் வலுசேர்க்கும் வகையில், நாட்டின் முதல் தனியார் முறையில் உருவாக்கப்பட்ட சுற்றுப்பாதை ராக்கெட்டான ‘விக்ரம்-1’ வெற்றிகரமாக விண்ணில் ஏவப்பட்டது. ‘மிஷன் ஆகமன்’ எனப் பெயரிடப்பட்ட இந்தத் திட்டத்தை, ஹைதராபாத்தைத் தலைமையிடமாகக் கொண்டு செயல்படும் ஸ்பேஸ்-டெக் ஸ்டார்ட்அப் நிறுவனமான ஸ்கைரூட் ஏரோஸ்பேஸ் உருவாக்கியுள்ளது. ஆந்திரப் பிரதேசம் ஸ்ரீஹரிகோட்டாவில் உள்ள இஸ்ரோவின் சதீஷ் தவான் விண்வெளி மையத்தின் முதல் ஏவுதளத்தில் இருந்து ராக்கெட் விண்ணில் செலுத்தப்பட்டது.
விண்ணில் சீறிப்பாய்ந்த விக்ரம் 1:
ORBIT ACHIEVED. 🚀
Vikram-1 Test Flight-1 has reached orbit. India’s first privately developed orbital rocket has completed its final burn and injected its payloads into a ~450 km orbit, making India the third country in the world with private orbital launch capability.…
— Skyroot Aerospace (@SkyrootA) July 18, 2026
முதலில் காலை 11.30 மணிக்கு ஏவுதல் திட்டமிடப்பட்டிருந்த நிலையில், தொழில்நுட்ப காரணங்களால் ஏவுதல் நேரம் 12.05.30 மணிக்கு மாற்றியமைக்கப்பட்டது. இந்த வரலாற்றுச் சிறப்புமிக்க ஏவுதலைக் காண இஸ்ரோவின் முன்னாள் தலைவர்கள் உள்ளிட்ட விண்வெளித் துறையின் பல முக்கிய பிரமுகர்கள் நேரில் வந்திருந்தனர்.
விக்ரம்-1 ராக்கெட்டின் சிறப்பம்சங்கள்:
சுமார் 350 கிலோ எடையுள்ள செயற்கைக்கோள்களை பூமியில் இருந்து 450 கிலோமீட்டர் உயரத்தில் உள்ள சுற்றுப்பாதையில் நிலைநிறுத்தும் வகையில் விக்ரம்-1 வடிவமைக்கப்பட்டுள்ளது. நான்கு நிலைகளைக் கொண்ட இந்த ஏவுவாகனத்தின் முதல் மூன்று நிலைகளில் திட எரிபொருள் இயந்திரங்களும், நான்காவது நிலையில் திரவ எரிபொருள் இயந்திரமும் பயன்படுத்தப்படுகின்றன.
முதல் மூன்று நிலைகளில் பயன்படுத்தப்படும் ‘கலாம்’ சீரிஸ் திட எரிபொருள் இயந்திரங்கள், இந்தியாவின் ‘மிசைல் மேன்’ டாக்டர் ஏ.பி.ஜே. அப்துல் கலாமின் பெயரால் அழைக்கப்படுகின்றன.
முதல் நிலையான ‘கலாம் 1000’ ராக்கெட்டை பூமியிலிருந்து உயர்த்துவதற்குத் தேவையான அதிகபட்ச உந்துவிசையை வழங்குகிறது. இது சுமார் 1,000 கிலோநியூட்டன் உந்துவிசையை உருவாக்கும்.
இரண்டாவது நிலையான ‘கலாம் 250’, வளிமண்டலத்தின் அடர்த்தியான பகுதிகளைக் கடந்து ராக்கெட்டை விண்வெளியின் வெற்றிடப் பகுதிக்கு எடுத்துச் செல்கிறது. மூன்றாவது நிலையான ‘கலாம் 100’, செயற்கைக்கோளை அதன் துல்லியமான சுற்றுப்பாதையில் நிலைநிறுத்துவதற்கு முன் தேவையான வேகத்தை வழங்குகிறது.
3D பிரிண்ட் செய்யப்பட்ட ‘ராமன்’ இயந்திரம்:
விக்ரம்-1 ராக்கெட்டின் நான்காவது நிலையில் ‘ராமன்’ எனப் பெயரிடப்பட்ட திரவ எரிபொருள் இயந்திரம் பயன்படுத்தப்பட்டுள்ளது. நோபல் பரிசு பெற்ற இந்திய விஞ்ஞானி சி.வி. ராமனின் நினைவாக இந்த இயந்திரத்துக்கு பெயரிடப்பட்டுள்ளது.
முழுமையாக 3D பிரிண்டிங் தொழில்நுட்பத்தில் உருவாக்கப்பட்ட இந்த இயந்திரம் குறைந்த எடை மற்றும் அதிக செயல்திறன் கொண்டதாகும். நான்கு ‘ராமன்-1’ இயந்திரங்கள் இணைக்கப்பட்ட கிளஸ்டர் அமைப்பு இதில் பயன்படுத்தப்பட்டுள்ளது.
மேலும், குறைந்த செலவில், மிக விரைவாக—சுமார் 24 மணி நேரத்திற்குள்—ஏவுதலுக்குத் தயாராகும் வகையில் விக்ரம்-1 வடிவமைக்கப்பட்டுள்ளது. முழுமையாக இந்திய தனியார் நிறுவனத்தால் வடிவமைக்கப்பட்டு உருவாக்கப்பட்டுள்ள இந்த ராக்கெட், நாட்டின் தனியார் விண்வெளித் துறையில் முக்கியமான மைல்கல்லாக அமைந்துள்ளது.
