அன்று விமர்சனம்.. இன்று உலகின் கவனம்! BRICS-ல் இந்தியாவின் புதிய பலம்
2012ஆம் ஆண்டில் இந்தியாவின் பொருளாதார வளர்ச்சி மந்தமடைந்திருந்தது. பணவீக்கம் அதிகரித்ததுடன், ரூபாய் மதிப்பு சரிவு மற்றும் பொருளாதார செயல்பாடுகள் குறித்த கவலைகளும் நிலவின. BRIC என்ற கருத்தாக்கத்தை உருவாக்கிய கோல்ட்மேன் சாக்ஸ் நிறுவனத்தின் ஜிம் ஓ’நீல், மதிப்பீட்டு அடிப்படையில் இந்தியாவை “குறைந்த கவர்ச்சிகரமான” BRIC பொருளாதாரம் என குறிப்பிட்டிருந்தார்.
செப்டம்பர் 11, 2026: இந்தியா 2026ஆம் ஆண்டுக்கான BRICS உச்சி மாநாட்டை நடத்தத் தயாராகி வரும் நிலையில், கடந்த 2012ஆம் ஆண்டிலும் இந்தியா BRICS கூட்டமைப்பின் உச்சி மாநாட்டை நடத்தியதை நினைவுகூர வேண்டியுள்ளது. ஆனால், அப்போது BRICS-ல் இந்தியாவின் நிலை மற்றும் உலகப் பொருளாதாரத்தில் இந்தியாவின் பங்களிப்பு குறித்த பார்வை, தற்போதைய சூழலில் இருந்து முற்றிலும் மாறுபட்டதாக இருந்தது.
இந்தியா மீது எழுந்த சந்தேகம்:
அப்போது இந்தியா BRICS கூட்டமைப்பை வழிநடத்துமா என்ற கேள்வி எழவில்லை. மாறாக, அந்த அமைப்பில் இந்தியா இடம்பெறுவதற்கே தகுதியானதா என்ற கேள்விகள் முன்வைக்கப்பட்டன. “இந்தியா உண்மையில் BRICS அமைப்பில் இடம்பெற தகுதியானதா?”, “BRIC-ல் ‘I’ என்பதற்கு பதிலாக இந்தோனேசியாவை சேர்க்க வேண்டுமா?”, “BRICS கூட்டமைப்பின் பலவீனமான நாடாக இந்தியா உள்ளதா?” போன்ற விவாதங்கள் அப்போது பரவலாக எழுந்தன.
2012ஆம் ஆண்டில் இந்தியாவின் பொருளாதார வளர்ச்சி மந்தமடைந்திருந்தது. பணவீக்கம் அதிகரித்ததுடன், ரூபாய் மதிப்பு சரிவு மற்றும் பொருளாதார செயல்பாடுகள் குறித்த கவலைகளும் நிலவின. BRIC என்ற கருத்தாக்கத்தை உருவாக்கிய கோல்ட்மேன் சாக்ஸ் நிறுவனத்தின் ஜிம் ஓ’நீல், மதிப்பீட்டு அடிப்படையில் இந்தியாவை “குறைந்த கவர்ச்சிகரமான” BRIC பொருளாதாரம் என குறிப்பிட்டிருந்தார்.
கடுமையாக சரிந்த இந்தியா பொருளாதாரம்:
அதே ஆண்டில், இந்தியா முதலீட்டுக்கு ஏற்ற இறையாண்மை கடன் மதிப்பீட்டை இழக்கும் முதல் BRIC நாடாக மாறக்கூடும் என Standard & Poor’s எச்சரித்தது. 2012-13ஆம் ஆண்டில் இந்தியாவின் பொருளாதார வளர்ச்சி 5 சதவீதத்துக்கும் கீழ் சரிந்ததுடன், இரட்டை இலக்க பணவீக்கமும் காணப்பட்டது.
ஆனால், 2026ஆம் ஆண்டில் நிலைமை முற்றிலும் மாறியுள்ளது. உலகின் வேகமாக வளர்ந்து வரும் முக்கிய பொருளாதாரங்களில் ஒன்றாக இந்தியா பார்க்கப்படுகிறது. 2026-27 நிதியாண்டின் முதல் காலாண்டில் இந்தியா 7.8 சதவீத உண்மையான மொத்த உள்நாட்டு உற்பத்தி வளர்ச்சியை பதிவு செய்துள்ளது.
மேலும் படிக்க: BRICS 2026 மாநாட்டுக்கு இந்தியா தயார் – பிரதமர் மோடி வெளியிட்ட வீடியோ
மேலும், இந்தியாவின் இறையாண்மை கடன் மதிப்பீடு தொடர்பான பார்வையும் மாறியுள்ளது. 2026 செப்டம்பரில் Japan Credit Rating Agency, இந்தியாவின் இறையாண்மை மதிப்பீட்டை BBB+ இலிருந்து A- ஆக உயர்த்தியது. வலுவான பொருளாதார வளர்ச்சி, மேம்பட்ட நிதிநிலை, வலுவான நிதித்துறை மற்றும் சிறப்பான வெளிப்புற பொருளாதார நிலை ஆகியவற்றை காரணங்களாக குறிப்பிட்டது.
பொருளாதார வளர்ச்சி மற்றும் – புவிசார் அரசியலில் இந்தியாவின் முக்கியத்துவம்:
பொருளாதார வளர்ச்சியுடன் இந்தியாவின் புவிசார் அரசியல் முக்கியத்துவமும் அதிகரித்துள்ளது. அமெரிக்கா-சீனா போட்டி மற்றும் உலகளாவிய புவிசார் அரசியல் பிளவுகள் அதிகரித்து வரும் நிலையில், இந்தியாவின் மூலோபாய சுயாட்சி மற்றும் நடுத்தர சக்தி நாடுகளுக்கான ராஜதந்திர அணுகுமுறை முக்கியத்துவம் பெற்றுள்ளது.
மேலும் படிக்க: 18வது பிரிக்ஸ் மாநாடு.. டெல்லி வரும் உலக தலைவர்கள்.. விவாதிக்கப்படும் முக்கிய விஷயங்கள் என்ன?
ரஷ்ய அதிபர் விளாடிமிர் புதின், சீன அதிபர் ஷி ஜின்பிங், ஈரான் அதிபர் மசூத் பெசெஷ்கியான் உள்ளிட்ட முக்கிய உலகத் தலைவர்கள் 2026 BRICS உச்சி மாநாட்டிற்காக புதுடெல்லியில் ஒன்று கூடுவது, இந்தியாவின் அதிகரித்து வரும் ராஜதந்திர செல்வாக்கையும், உலக நாடுகளை ஒருங்கிணைக்கும் திறனையும் வெளிப்படுத்துவதாக பார்க்கப்படுகிறது.
இதனால், 2012ஆம் ஆண்டில் BRICS-ன் பலவீனமான இணைப்பாக விமர்சிக்கப்பட்ட இந்தியா, 2026ஆம் ஆண்டில் வலுவான பொருளாதார வளர்ச்சி, உற்பத்தித் துறை விரிவாக்கம், டிஜிட்டல் பொது உள்கட்டமைப்பு, முன்னணி தொழில்நுட்பத் துறைகளில் வளர்ந்து வரும் பங்களிப்பு மற்றும் அதிகரித்துள்ள புவிசார் அரசியல் செல்வாக்குடன் BRICS கூட்டமைப்பில் முக்கிய சக்தியாக உருவெடுத்துள்ளது.
