தீபாவளிக்குப் பிறகும் தொடரும் இருமல்… வெறும் பட்டாசுப் புகை பாதிப்பா?

தீபாவளி கொண்டாட்டங்கள் முடிந்த பிறகும் சிலருக்கு இருமல், தொண்டை எரிச்சல், மூச்சுவிடுவதில் சிரமம் போன்ற பாதிப்புகள் (Impact on Lung Health) தொடர்ந்து காணப்படுகின்றன. இதற்கு முக்கியக் காரணமாக பட்டாசுகளில் இருந்து வெளியேறும் புகை மற்றும் காற்று மாசுபாடு இருக்கலாம். பட்டாசுகளை வெடிக்கும்போது வெளியாகும் நுண்துகள்கள், சல்பர் டை ஆக்சைடு, நைட்ரஜன் டை ஆக்சைடு உள்ளிட்ட மாசுக்கள் சுவாசப் பாதையைப் பாதிக்கின்றன. இதனால் தொண்டையில் அரிப்பு, வறட்டு இருமல், கண்களில் நீர் வடிதல் போன்ற அறிகுறிகள் ஏற்படலாம். ஒரு வாரத்திற்குள் குறையாத இருமல் அல்லது அதிகரிக்கும் சுவாசப் பிரச்சினைகளை அலட்சியப்படுத்தாமல் நுரையீரல் நிபுணரிடம் பரிசோதனை செய்துகொள்வது அவசியம்.

Also Read: கருவாட்டின் மருத்துவ குணங்கள் மற்றும் பக்கவிளைவுகள் என்ன?

இருமல் எத்தனை நாட்கள் நீடித்தால் கவனம் தேவை?

பட்டாசுப் புகையால் ஏற்படும் லேசான பாதிப்புகள் பொதுவாக ஒன்று அல்லது இரண்டு நாட்களில் அதிகரித்து, பின்னர் படிப்படியாகக் குறையத் தொடங்கும். பெரும்பாலானோருக்கு சில நாட்கள் முதல் ஒரு வாரத்திற்குள் இந்தப் பிரச்சினை சரியாகிவிடும். ஆனால் ஒரு வாரத்திற்குப் பிறகும் இருமல் குறையாமல் அதிகரித்தால் அதை சாதாரண பாதிப்பாகக் கருதக் கூடாது. ஒன்று முதல் மூன்று வாரங்கள் வரை இருமல் நீடிப்பது சுவாசக் குழாயில் அழற்சி அல்லது தொற்று போன்ற பிரச்சினைகளின் அறிகுறியாக இருக்கலாம்.

ஆஸ்துமா நோயாளிகள் கூடுதல் கவனம் செலுத்த வேண்டும்!

ஏற்கனவே ஆஸ்துமா, நாள்பட்ட நுரையீரல் அடைப்பு நோய் (COPD), மூச்சுக்குழாய் அழற்சி போன்ற பாதிப்புகள் உள்ளவர்கள் பட்டாசுப் புகையால் அதிகம் பாதிக்கப்பட வாய்ப்புள்ளது. புகையில் உள்ள நச்சுப் பொருட்கள் சுவாசக் குழாய்களைச் சுருக்கி, மூச்சுத்திணறல் மற்றும் வீசிங் எனப்படும் சத்தத்துடன் கூடிய சுவாசத்தை ஏற்படுத்தலாம். மேலும் சளி அதிகரிப்பதுடன், சிலருக்கு இரண்டாம் நிலை பாக்டீரியா அல்லது வைரஸ் தொற்றுகளும் ஏற்படலாம்.

புறக்கணிக்கக் கூடாத முக்கிய அறிகுறிகள்!

இருமலுடன் மூச்சுத்திணறல், நெஞ்சு இறுக்கம், நெஞ்சுவலி, அதிக காய்ச்சல், சளியில் ரத்தம் போன்ற அறிகுறிகள் தென்பட்டால் உடனடியாக மருத்துவ ஆலோசனை பெற வேண்டும். உதடுகள் நீல நிறமாக மாறுவது அல்லது வழக்கமான செயல்பாடுகளைக்கூடச் செய்ய முடியாத அளவுக்கு மூச்சுத்திணறல் ஏற்படுவது அவசர மருத்துவக் கவனம் தேவைப்படும் அறிகுறிகளாகும். குறிப்பாக ஏற்கனவே நுரையீரல் பாதிப்பு உள்ளவர்கள் அறிகுறிகள் தீவிரமடையும் வரை காத்திருக்கக் கூடாது.

Also Read: கருவாட்டின் மருத்துவ குணங்கள் மற்றும் பக்கவிளைவுகள் என்ன?

தீபாவளிக்குப் பிறகு நுரையீரலைப் பாதுகாப்பது எப்படி?

பட்டாசுப் புகை அதிகமாக இருக்கும் பகுதிகளுக்குச் செல்வதைத் தவிர்க்க வேண்டும். வெளியே செல்ல வேண்டிய கட்டாயம் ஏற்பட்டால் நுண்துகள்களைக் குறைக்க உதவும் N95 முகக்கவசத்தை அணியலாம். ஏற்கனவே மருத்துவர்கள் பரிந்துரைத்த இன்ஹேலர் பயன்படுத்துபவர்கள் அதைத் தொடர்ந்து மருத்துவர் அறிவுறுத்தியபடி பயன்படுத்த வேண்டும். மேலும், ஒரு வாரத்திற்குள் குறையாத இருமல் அல்லது அதிகரிக்கும் சுவாசப் பிரச்சினைகளை அலட்சியப்படுத்தாமல் நுரையீரல் நிபுணரிடம் பரிசோதனை செய்துகொள்வது அவசியம்.