அஞ்ச வேண்டாம்! மழைக்கால நோய்களை வெல்லும் எளிய அற்புத வழிகள்

மழைக்காலத்தில் மிக முக்கியப் பிரச்சினையாக உருவெடுப்பது கொசுக்களின் பெருக்கம் ஆகும். ஆங்காங்கே தேங்கும் தூய்மையான மழைநீரில் ஏடிஸ் (Aedes) கொசுக்கள் முட்டையிட்டுப் பெருகுவதால் டெங்கு மற்றும் சிக்குன்குனியா போன்ற தீவிர காய்ச்சல்கள் பரவுகின்றன. அதேபோல், சாக்கடை மற்றும் அசுத்தமான நீர் நிலைகளில் வளரும் அனாபிலிஸ் கொசுக்கள் மூலம் மலேரியா காய்ச்சல் பரவுகிறது. இந்த நோய்கள் கடுமையான உடல் வலி, அதிக காய்ச்சல் மற்றும் ரத்த தட்டணுக்கள் குறைவு போன்ற பாதிப்புகளை ஏற்படுத்துகின்றன. வீட்டைச் சுற்றிலும், மொட்டை மாடிகளிலும் தண்ணீர் தேங்காமல் பார்த்துக் கொள்வதே இதற்கான முதற்படித் தீர்வாகும்.

அசுத்தமான நீர் மற்றும் உணவினால் ஏற்படும் பாதிப்புகள்

மழைக்காலத்தில் பொது நீர் விநியோகக் குழாய்களில் கழிவுநீர் கலப்பதற்கான வாய்ப்புகள் அதிகம். இதனால் டைபாய்டு, காமாலை (ஹெபடைடிஸ் ஏ) மற்றும் காலரா போன்ற ஆபத்தான நோய்த்தொற்றுகள் ஏற்படுகின்றன. மேலும், ஈக்கள் மொய்த்த தெருவோர உணவுகள் மற்றும் அசுத்தமான நீரில் கழுவப்பட்ட காய்கறிகள் மூலமாக வயிற்றுப்போக்கு, வயிற்றுக் கடுப்பு போன்ற செரிமான மண்டலப் பாதிப்புகள் வேகமாகப் பரவுகின்றன. இதனால் உடல் வறட்சி ஏற்பட்டு குழந்தைகள் மற்றும் முதியவர்கள் எளிதில் பாதிக்கப்படுகிறார்கள்.

காற்றின் மூலம் பரவும் சுவாசப் பாதை தொற்றுகள்

குளிர்ந்த காற்று மற்றும் காற்றில் உள்ள அதிகப்படியான ஈரப்பதம் காரணமாக வைரஸ் கிருமிகள் காற்றில் நீண்ட நேரம் உயிர்வாழ்கின்றன. இதன் விளைவாக, சாதாரண சளி, இருமல், இன்ஃபுளூயன்சா காய்ச்சல் மற்றும் தொண்டை அழற்சி போன்ற சுவாசப் பை நோய்கள் ஒருவரிடமிருந்து மற்றவருக்குத் தும்மல் மற்றும் இருமல் மூலம் மிக வேகமாகப் பரவுகின்றன. குறிப்பாக ஆஸ்துமா மற்றும் சைனஸ் குறைபாடு உள்ளவர்களுக்கு இந்த பருவநிலை கூடுதல் அசௌகரியத்தை ஏற்படுத்துகிறது. பொது இடங்களுக்குச் செல்லும்போது முகக்கவசம் அணிவது நலம் பயக்கும்.

Also Read: கழிவறைக்குள் செல்போன் பயன்படுத்துகிறீர்களா? காத்திருக்கும் பேராபத்து

நோய்களிலிருந்து பாதுகாத்துக் கொள்ளும் முன்னெச்சரிக்கை

மழைக்கால நோய்களிலிருந்து நம்மைப் பாதுகாத்துக் கொள்ள சில எளிய வாழ்வியல் மாற்றங்களைச் பின்பற்ற வேண்டும். எப்போதும் தண்ணீரை நன்றாகக் கொதிக்க வைத்து ஆறவிட்டுக் குடிக்க வேண்டும். வெளியில் சமைக்கப்படும் உணவுகளைத் தவிர்த்து, வீட்டில் சூடாகச் சமைத்த உணவுகளை மட்டுமே உட்கொள்ள வேண்டும். வீட்டைச் சுற்றி தேங்காய் ஓடுகள், உடைந்த பிளாஸ்டிக் பொருட்கள் அல்லது டயர்களில் தண்ணீர் தேங்க விடாமல் உடனடியாக அகற்ற வேண்டும். கொசுக்கடிக்கு ஆளாகாமல் இருக்க உடலை முழுமையாக மூடும் ஆடைகளை அணியலாம்.

கைகளை அடிக்கடி சோப்பு கொண்டு சுத்தமாகக் கழுவுவது கிருமித் தொற்றிலிருந்து நம்மை அரணாகக் காக்கும். ஏதேனும் காய்ச்சல் அறிகுறிகள் தென்பட்டால் சுய மருத்துவம் செய்யாமல் உடனடியாக மருத்துவரை அணுகுவது பாதுகாப்பானது.