ஸ்பெயினுடன் இனி எந்த வர்த்தகமும் கிடையாது – நேட்டோ உச்சி மாநாட்டில் டிரம்பின் அதிரடி அறிவிப்பு..

ஜூலை 8, 2026: நேட்டோ கூட்டணி நாடான ஸ்பெயினுடன் நடைபெறும் அனைத்து வர்த்தக நடவடிக்கைகளையும் உடனடியாக நிறுத்துமாறு அமெரிக்க அதிபர் டொனால்டு டிரம்ப் உத்தரவிட்டுள்ளார். பாதுகாப்புச் செலவு மற்றும் ஈரான் போர் தொடர்பான கருத்து வேறுபாடுகளால் இந்த நடவடிக்கை எடுக்கப்பட்டுள்ளதாக கூறப்படுகிறது. துருக்கியின் அங்காராவில் நடைபெற்ற நேட்டோ உச்சி மாநாட்டில் பேசிய டிரம்ப், பாதுகாப்புச் செலவை மொத்த உள்நாட்டு உற்பத்தியில் 5 சதவீதமாக உயர்த்த வேண்டும் என்ற நேட்டோவின் புதிய இலக்கை ஏற்க ஸ்பெயின் மறுத்ததை கடுமையாக விமர்சித்தார்.

ஸ்பெயினுடன் வர்த்தகம் வேண்டாம் – அதிபர் டிரம்ப்: 

நேட்டோ பொதுச் செயலாளர் மார்க் ரூட்டே முன்னிலையில் பேசிய டிரம்ப், “ஸ்பெயின் எதற்கும் ஒத்துழைக்கவில்லை. அவர்களுடன் இனி வர்த்தகம் செய்ய விரும்பவில்லை” என்று தெரிவித்தார். அதனைத் தொடர்ந்து, அமெரிக்க கருவூலத் துறை செயலாளர் ஸ்காட் பெசன்ட்-ஐ நோக்கி, “உடனடியாக நடவடிக்கை எடுங்கள். அவர்களுடன் பேச்சுவார்த்தை கூட நடத்த வேண்டாம்” என்று உத்தரவிட்டார்.

டிரம்ப் இதுபோன்ற உத்தரவை மார்ச் மாதத்திலும் பிறப்பித்திருந்தாலும், அதன் பின்னரும் இரு நாடுகளுக்கிடையேயான வர்த்தகம் வழக்கம்போல தொடர்ந்தது குறிப்பிடத்தக்கது.

அதிபர் டிரம்பிற்கு பதிலடி கொடுத்த ஸ்பெயின் பிரதமர்: 

இதுகுறித்து ஸ்பெயின் பிரதமர் பெட்ரோ சாஞ்சஸ் அலுவலகம் வெளியிட்ட அறிக்கையில், டிரம்பின் கருத்துகளை வழக்கமான அரசியல் பேச்சாகவே கருதுவதாகவும், அமெரிக்காவுடனான சிறப்பான உறவில் எந்த மாற்றமும் ஏற்படாது என்றும் தெரிவித்துள்ளது.

மேலும், அமெரிக்காவுடன் ஸ்பெயினுக்கு வர்த்தக பற்றாக்குறை (Trade Deficit) இருப்பதாகவும், ஐரோப்பிய ஒன்றியத்தின் சுங்க மற்றும் வர்த்தக அமைப்பில் உறுப்பினராக உள்ளதால், தனிப்பட்ட ஒரு உறுப்பினர் நாட்டை மட்டும் குறிவைத்து வர்த்தக நடவடிக்கை எடுக்க முடியாது என்றும் அந்த அறிக்கையில் குறிப்பிடப்பட்டுள்ளது.

மேலும் படிக்க: மத்திய கிழக்கில் மீண்டும் பதற்றம்.. ஈரான் போர் நிறுத்த ஒப்பந்தம் முடிவுக்கு வந்ததாக அதிபர் டிரம்ப் அறிவிப்பு

ஈரான் தொடர்பான போர் நடவடிக்கைகளில், அமெரிக்கா தனது வான்வெளி மற்றும் ராணுவத் தளங்களை பயன்படுத்த ஸ்பெயின் அனுமதி வழங்க மறுத்ததாலும் டிரம்ப் அதிருப்தியில் இருந்ததாக தகவல்கள் தெரிவிக்கின்றன. அமெரிக்கா மற்றும் ஸ்பெயின் இணைந்து, தெற்கு ஸ்பெயினில் உள்ள இரண்டு முக்கிய கடற்படை மற்றும் விமானப்படை தளங்களை நிர்வகித்து வருகின்றன.

மீண்டும் எழுப்பப்பட்ட கிரீன்லாந்து விவகாரம்: 

நேட்டோ உச்சி மாநாட்டின்போது, கிரீன்லாந்து அமெரிக்காவின் கட்டுப்பாட்டில் இருக்க வேண்டும் என்ற தனது முந்தைய கருத்தையும் அதிபர் டிரம்ப் மீண்டும் வலியுறுத்தினார். இதற்கு பதிலளித்த டென்மார்க் அரசு, தனது நாட்டின் ஒவ்வொரு அங்குல நிலப்பரப்பையும் பாதுகாக்க உறுதியாக இருப்பதாக தெரிவித்தது.

ஸ்பெயின் ஏற்றுமதிக்கு பாதிப்பு?

ஸ்பெயின் உலகின் மிகப்பெரிய ஆலிவ் எண்ணெய் ஏற்றுமதி நாடாக விளங்குகிறது. மேலும், வாகன உதிரிபாகங்கள், எஃகு மற்றும் ரசாயனப் பொருட்களையும் அமெரிக்காவுக்கு ஏற்றுமதி செய்து வருகிறது. எனினும், பிற ஐரோப்பிய நாடுகளுடன் ஒப்பிடும்போது, டிரம்பின் வர்த்தக மிரட்டலால் ஸ்பெயின் பொருளாதாரம் பெரிய அளவில் பாதிக்கப்பட வாய்ப்பு குறைவாகவே இருப்பதாக பொருளாதார நிபுணர்கள் கருத்து தெரிவித்துள்ளனர்.