18 நாடுகளில் பரவிய புதிய கொரோனா வகை PJ.2.1 – உலக சுகாதார அமைப்பு கண்காணிப்புப் பட்டியலில் சேர்ப்பு
Corona New Variant: PJ.2.1 வைரஸின் முதல் மாதிரி 2026 மே 2ஆம் தேதி கனடாவின் ஒன்டாரியோ மாகாணத்தில் சேகரிக்கப்பட்டது. பின்னர் கனடாவின் பிற பகுதிகளுக்கும், ஜூன் 30ஆம் தேதிக்குள் அமெரிக்காவின் நியூயார்க் நகரத்திற்கும் பரவியது. தொடர்ந்து அமெரிக்காவின் பல்வேறு மாகாணங்களிலும் இந்த வைரஸ் கண்டறியப்பட்டது. மேலும், ஸ்பெயின், பிரான்ஸ், இஸ்ரேல், சிங்கப்பூர், ஆஸ்திரேலியா, நியூசிலாந்து உள்ளிட்ட நாடுகளிலும் பாதிப்புகள் பதிவாகியுள்ளன.
நவம்பர் 21, 2026: உலகம் முழுவதும் கொரோனா தொற்றின் தாக்கம் குறைந்துள்ள நிலையில், புதிதாக உருவாகியுள்ள PJ.2.1 என்ற கொரோனா வைரஸ் வகையை உலக சுகாதார அமைப்பு (WHO) தனது கண்காணிப்புப் பட்டியலில் சேர்த்துள்ளது. இந்தப் புதிய வகை JN.1 குடும்பத்தைச் சேர்ந்தது. இதன் ஸ்பைக் புரதத்தில் 24 மரபணு மாற்றங்கள் இருப்பது கண்டறியப்பட்டுள்ளது.
கடந்த நவம்பர் 8ஆம் தேதி நிலவரப்படி, 18 நாடுகளில் இந்த வைரஸ் கண்டறியப்பட்டுள்ளது. குறிப்பாக, கனடா மற்றும் அமெரிக்காவில் இதன் பாதிப்பு விகிதம் அதிகரித்து வருவதாகத் தெரிவிக்கப்பட்டுள்ளது. இருப்பினும், உலக அளவில் இந்தப் புதிய வகையால் ஏற்படக்கூடிய கூடுதல் பொது சுகாதார ஆபத்து குறைவாகவே இருப்பதாக WHO மதிப்பிட்டுள்ளது. இந்த மதிப்பீட்டின் மீதான நம்பகத்தன்மை குறைவாக இருப்பதாகவும் அந்த அமைப்பு குறிப்பிட்டுள்ளது.
PJ.2.1 வைரஸ் என்றால் என்ன? எங்கு முதலில் கண்டறியப்பட்டது?
PJ.2.1 வைரஸின் முதல் மாதிரி 2026 மே 2ஆம் தேதி கனடாவின் ஒன்டாரியோ மாகாணத்தில் சேகரிக்கப்பட்டது. பின்னர் கனடாவின் பிற பகுதிகளுக்கும், ஜூன் 30ஆம் தேதிக்குள் அமெரிக்காவின் நியூயார்க் நகரத்திற்கும் பரவியது. தொடர்ந்து அமெரிக்காவின் பல்வேறு மாகாணங்களிலும் இந்த வைரஸ் கண்டறியப்பட்டது. மேலும், ஸ்பெயின், பிரான்ஸ், இஸ்ரேல், சிங்கப்பூர், ஆஸ்திரேலியா, நியூசிலாந்து உள்ளிட்ட நாடுகளிலும் பாதிப்புகள் பதிவாகியுள்ளன.
இந்த வைரஸை விஞ்ஞானிகள் ‘Saltation Variant’ என்று குறிப்பிடுகின்றனர். அதாவது, படிப்படியாக மரபணு மாற்றங்கள் ஏற்படுவதற்குப் பதிலாக, ஒரே நேரத்தில் அதிக எண்ணிக்கையிலான மாற்றங்களுடன் உருவாகியுள்ள வகையாகும். இதன் ஸ்பைக் புரதத்தில் மட்டும் 24 அமினோ அமில மாற்றங்கள் இருப்பதாக WHO அறிக்கை தெரிவித்துள்ளது.
மேலும் படிக்க: அமெரிக்காவில் அதிகரிக்கும் இந்துக்களின் எண்ணிக்கை.. 5வது இடத்திற்கு செல்லும்.. ஆய்வில் முக்கிய தகவல்!
உலகளாவிய கொரோனா மரபணு வரிசைத் தரவுகளில் PJ.2.1 வைரஸின் பங்கு, 33வது தொற்றுநோயியல் வாரத்தில் 1 சதவீதமாக இருந்த நிலையில், 41வது வாரத்தில் 11.6 சதவீதமாக அதிகரித்துள்ளது. நவம்பர் 8ஆம் தேதி நிலவரப்படி, 18 நாடுகளில் இருந்து 722 மரபணு வரிசை மாதிரிகள் GISAID தரவுத்தளத்தில் பதிவேற்றப்பட்டுள்ளன.
மனித உடலில் வேகமாக நுழையுமா? ஆய்வில் வெளியான தகவல்
ஆய்வகச் சோதனைகளில், மனித உடலில் கொரோனா வைரஸ் நுழைய உதவும் ACE2 ஏற்பியுடன் PJ.2.1 வைரஸ் வலுவாகப் பிணைவது தெரியவந்துள்ளது. ஜெர்மன் பிரைமேட் மைய ஆராய்ச்சியாளர்கள் மேற்கொண்ட ஆய்வு அக்டோபர் 24ஆம் தேதி *Journal of Infection* இதழில் வெளியிடப்பட்டது. குறிப்பிட்ட சில செல்களுக்குள் இந்த வைரஸ் எளிதாக நுழைவதையும் ஆய்வாளர்கள் கண்டறிந்துள்ளனர்.
ஆனால், ACE2 ஏற்பியுடன் வலுவாகப் பிணைவதால் மட்டும் மனிதர்களிடையே வேகமாகப் பரவும் என்று முடிவு செய்ய முடியாது என WHO விளக்கியுள்ளது. இந்தத் தன்மை வைரஸ் பரவல் அதிகரிப்புக்குப் பங்களிக்கலாம் என்றாலும், மனிதர்களிடையே அதன் பரவும் வேகம் அதிகரித்துள்ளது என்பதற்கான நேரடி ஆதாரம் இல்லை என்றும் தெரிவித்துள்ளது.
தடுப்பூசிகள் செயல்படுமா?
PJ.2.1 வைரஸுக்கு எதிராகத் தடுப்பூசிகள் எந்த அளவுக்குப் பாதுகாப்பு அளிக்கின்றன என்பது குறித்தும் ஆய்வுகள் மேற்கொள்ளப்பட்டுள்ளன. LP.8.1 வகைக்கு ஏற்ப தயாரிக்கப்பட்ட தடுப்பூசியைப் பெற்ற 36 பேரின் ரத்த மாதிரிகளை ஆய்வு செய்ததில், பரிசோதிக்கப்பட்ட மற்ற கொரோனா வகைகளைக் காட்டிலும் PJ.2.1 வைரஸ் அதிக அளவில் நோய் எதிர்ப்பு சக்தியைத் தவிர்ப்பதாகத் தெரியவில்லை.
மேலும் படிக்க: உலகில் மீண்டும் அணு ஆயுத போர் நிகழக் கூடாது.. முத்தரப்பு கூட்டத்தில் 3 நாட்டு தலைவர்கள்!
இருப்பினும், ஆய்வகங்களில் கிடைக்கும் முடிவுகள் மட்டுமே நிஜ வாழ்க்கையில் தடுப்பூசிகள் தொற்றையும் தீவிர பாதிப்புகளையும் எந்த அளவுக்குத் தடுக்கின்றன என்பதை உறுதிப்படுத்தாது என WHO தெரிவித்துள்ளது.
அறிகுறிகள் என்ன? யாருக்கு கூடுதல் கவனம் தேவை?
PJ.2.1 வைரஸ் பாதிப்பால் மற்ற கொரோனா வகைகளைக் காட்டிலும் நோய் தீவிரம் அதிகமாக இருப்பதற்கான ஆதாரங்கள் இதுவரை கிடைக்கவில்லை. அதேநேரத்தில், இந்த வைரஸுக்கெனத் தனித்துவமான அறிகுறிகளும் இதுவரை கண்டறியப்படவில்லை.
காய்ச்சல், இருமல், தொண்டை வலி, மூக்கில் நீர் வடிதல் அல்லது மூக்கடைப்பு, தலைவலி, உடல் வலி, சோர்வு உள்ளிட்ட வழக்கமான கொரோனா அறிகுறிகள் ஏற்படலாம். ஒருவருக்கு எந்த வகையான கொரோனா வைரஸ் பாதிப்பு ஏற்பட்டுள்ளது என்பதை மரபணு வரிசை ஆய்வு மூலமாக மட்டுமே உறுதிப்படுத்த முடியும்.
மேலும், தடுப்பூசிகளின் செயல்திறன், மருத்துவமனை அனுமதிகள், தீவிர பாதிப்புகள் மற்றும் வைரஸ் எதிர்ப்பு மருந்துகளின் செயல்பாடு குறித்து கூடுதல் ஆய்வுகள் தேவை என WHO வலியுறுத்தியுள்ளது.