அறிமுகமானது ஐபோன் 18 ப்ரோ, ப்ரோ மேக்ஸ்.. கேமரா, பேட்டரியில் அதிரடி அப்டேட்.. இந்தியாவில் இதன் விலை என்ன தெரியுமா?

செப்டம்பர் 10, 2026: ஆப்பிள் நிறுவனம் தனது புதிய முதன்மை ஸ்மார்ட்போன்களான ஐபோன் 18 ப்ரோ மற்றும் ஐபோன் 18 ப்ரோ மேக்ஸ் மாடல்களை அதிகாரப்பூர்வமாக அறிமுகப்படுத்தியுள்ளது. இந்த ஆண்டு கேமரா, செயல்திறன், பேட்டரி திறன் மற்றும் செயற்கை நுண்ணறிவு ஆகிய நான்கு முக்கிய அம்சங்களுக்கு ஆப்பிள் நிறுவனம் அதிக முக்கியத்துவம் அளித்துள்ளது. இரண்டு மாடல்களிலும் புதிய ஏ20 ப்ரோ சிப்செட், ஐஓஎஸ் 27 இயங்குதளம் மற்றும் மறுவடிவமைக்கப்பட்ட டைனமிக் ஐலேண்ட் வசதி இடம்பெற்றுள்ளன.

இந்தியாவில் இதன் விலை என்ன?

இந்தியாவில் ஐபோன் 18 ப்ரோ மாடலின் ஆரம்ப விலை ரூ.1,64,900 ஆகவும், ஐபோன் 18 ப்ரோ மேக்ஸ் மாடலின் ஆரம்ப விலை ரூ.1,79,900 ஆகவும் நிர்ணயிக்கப்பட்டுள்ளது. இரண்டு மாடல்களும் 256 ஜிபி, 512 ஜிபி, 1 டிபி மற்றும் 2 டிபி சேமிப்புத் திறன் கொண்ட வகைகளில் கிடைக்கின்றன.

புதிய ப்ரோ மாடல்கள் கருப்பு, வெள்ளி, பனிப்பாறை மற்றும் புதிதாக அறிமுகப்படுத்தப்பட்ட பர்கண்டி ஆகிய நான்கு வண்ணங்களில் கிடைக்கின்றன. செப்டம்பர் 12ஆம் தேதி முன்பதிவு தொடங்குகிறது. செப்டம்பர் 18ஆம் தேதி முதல் விற்பனைக்கு வருகிறது. முதல் கட்ட விற்பனை நடைபெறும் நாடுகளில் இந்தியாவும் இடம்பெற்றுள்ளது.

கேமராவில் முக்கிய மாற்றங்கள்:

ஐபோன் 18 ப்ரோ மற்றும் ஐபோன் 18 ப்ரோ மேக்ஸ் ஆகிய இரண்டு மாடல்களிலும் 48 மெகாபிக்சல் ஃப்யூஷன் பிரதான கேமரா இடம்பெற்றுள்ளது. இதில் variable aperture எனப்படும் வசதி முதன்முறையாக ஐபோனில் அறிமுகப்படுத்தப்பட்டுள்ளது.

கேமரா செயலியில் தொழில்முறை கட்டுப்பாட்டு வசதியும் அறிமுகப்படுத்தப்பட்டுள்ளது. இதன் மூலம் துளை அளவு, ஷட்டர் வேகம் மற்றும் வெள்ளை சமநிலை ஆகியவற்றை மாற்ற முடியும். ஒளிப்படத்தின் வெளிப்பாட்டை கண்காணிக்க வரைபட வசதியும் வழங்கப்பட்டுள்ளது.

ஒளிப்பட பாணிகள் வசதியில் கூடுதல் அமைப்பு மற்றும் தானியக் கட்டுப்பாடுகள் வழங்கப்பட்டுள்ளன. மேலும், வினாடிக்கு 60 காட்சிகள் வரை பதிவு செய்யப்பட்ட காணொளிகளுக்கு, பதிவு செய்த பிறகு திரைப்படத் தோற்ற விளைவுகளைச் சேர்க்கும் வசதியும் வழங்கப்பட்டுள்ளது. 4K டால்பி விஷன் எச்டிஆர் தரத்தில் கால இடைவெளி காணொளிகளையும் பதிவு செய்ய முடியும்.

மேலும் படிக்க: இந்தியாவில் அதிகம் விற்பனையாகும் 3 எலக்ட்ரிக் கார்கள் – எவை தெரியுமா?

ஏ20 ப்ரோ சிப்செட் – சிறப்புகள் என்ன?

புதிய ஐபோன் ப்ரோ மாடல்களில் 2 நானோமீட்டர் தொழில்நுட்பத்தில் தயாரிக்கப்பட்ட ஏ20 ப்ரோ சிப்செட் பயன்படுத்தப்பட்டுள்ளது. இதில் 6-மைய செயலி, 7-மைய வரைகலை செயலி மற்றும் 32-மைய நரம்பியல் செயலி இடம்பெற்றுள்ளன.

முந்தைய தலைமுறை ஏ19 ப்ரோ சிப்செட்டுடன் ஒப்பிடும்போது, ஏ20 ப்ரோ 50 சதவீதம் அதிக நினைவக அலைவரிசையை வழங்குவதாக ஆப்பிள் தெரிவித்துள்ளது. வரைகலை செயலியின் வேகம் 40 சதவீதம் வரை அதிகரிக்கப்பட்டுள்ளது. மேலும், மூன்று மடங்கு அதிக பரப்பளவு கொண்ட புதிய நீராவி அறை குளிரூட்டும் அமைப்பு வழங்கப்பட்டுள்ளதால், நீண்ட நேர பயன்பாட்டின்போதும் சிறந்த செயல்திறனை வழங்கும் என தெரிவிக்கப்பட்டுள்ளது.

ஐபோன் 18 ப்ரோ மேக்ஸுக்கு அதிக பேட்டரி திறன்:

பேட்டரி திறனைப் பொறுத்தவரையில் ஐபோன் 18 ப்ரோ மேக்ஸ் மாடல் முன்னிலையில் உள்ளது. மின்னணு சிம் மட்டுமே கொண்ட ஐபோன் 18 ப்ரோ மேக்ஸில் 45 மணி நேரம் வரை காணொளிகளை இயக்க முடியும். ஐபோன் 18 ப்ரோ மாடலில் இது 36 மணி நேரம் வரை இருக்கும்.

மேலும் படிக்க: 2030 முடிவதற்குள் ஏஐ மனிதர்களையே அழித்துவிடுமா? ஆன்த்ரோபிக் ஆய்வாளர் எச்சரிக்கை

ப்ரோ மேக்ஸ் மாடலில் 5 நிமிடங்கள்  சார்ஜ் செய்தால் சுமார் 7 மணி நேரத்திற்கான காணொளி இயக்க நேரம் கிடைக்கும் என ஆப்பிள் தெரிவித்துள்ளது. ஐபோன் 18 ப்ரோ மாடலை சார்ஜ் செய்தால் சுமார் 15 நிமிடங்களில் 50 சதவீதம் வரை சார்ஜ் செய்ய முடியும். வையர்லெஸ் சார்ஜிங் மூலம் 30 நிமிடங்களில் 50 சதவீதம் வரை சார்ஜ் செய்யலாம்.

ஐஓஎஸ் 27 மற்றும் ஆப்பிள் செயற்கை நுண்ணறிவு:

இரண்டு மாடல்களிலும் ஐஓஎஸ் 27 இயங்குதளம் இடம்பெற்றுள்ளது. அடுத்த தலைமுறை ஆப்பிள் செயற்கை நுண்ணறிவு அம்சங்களுடன், சோதனை நிலையில் சிரி செயற்கை நுண்ணறிவு வசதியும் அறிமுகப்படுத்தப்பட்டுள்ளது.

சிரி, பயனரின் தனிப்பட்ட தகவல்களைப் புரிந்துகொள்வது, திரையில் உள்ள தகவல்களை அடையாளம் காண்பது மற்றும் ஆதரிக்கப்படும் செயலிகளில் பல்வேறு பணிகளை மேற்கொள்வது போன்ற வசதிகளை வழங்குகிறது.

முக்கிய அம்சங்கள் என்ன?

• இந்திய ஆரம்ப விலை: ஐபோன் 18 ப்ரோ – ரூ.1,64,900; ஐபோன் 18 ப்ரோ மேக்ஸ் – ரூ.1,79,900
• காணொளி இயக்க நேரம்: ஐபோன் 18 ப்ரோ – 36 மணி நேரம் வரை; ஐபோன் 18 ப்ரோ மேக்ஸ் – 45 மணி நேரம் வரை
• சேமிப்புத் திறன்: 2 டிபி வரை
• சிப்செட்: ஏ20 ப்ரோ
• பிரதான கேமரா: variable aperture வசதியுடன் 48 மெகாபிக்சல் ஃப்யூஷன் பிரதான கேமரா