மாணவி கோபிகா தற்கொலை: நீட் தேர்வை ஒழித்தே ஆக வேண்டும்.. உதயநிதி ஸ்டாலின் வலியுறுத்தல்..

ஜூன் 20, 2026: சேலத்தில் நீட் தேர்வுக்கு தயாராகி வந்த மாணவி ஒருவர், தேர்வு குறித்த மன அழுத்தத்தால் தற்கொலை செய்து கொண்ட சம்பவம் தமிழகத்தில் பெரும் பரபரப்பை ஏற்படுத்தியுள்ளது. இந்த சூழலில், தமிழ்நாடு துணை முதலமைச்சர் உதயநிதி ஸ்டாலின் இது தொடர்பாக தனது சமூக வலைதளப் பக்கத்தில் பதிவு ஒன்றை வெளியிட்டுள்ளார். அதில் அவர் கூறியிருப்பதாவது: “நீட் தேர்வுக்கு தயாராகி வந்த சேலம் மாவட்டத்தைச் சேர்ந்த தங்கை கோபிகா, தேர்வு அச்சத்தால் தற்கொலை செய்து கொண்ட சம்பவம் அறிந்து அதிர்ச்சியும் வேதனையும் அடைந்தேன்.

நீட் தேர்வை ஒழித்தே ஆக வேண்டும் – உதயநிதி ஸ்டாலின்:

நீட் தேர்வுக்கு தயாராகி வந்த சேலம் மாவட்டத்தைச் சேர்ந்த தங்கை கோபிகா, தேர்வு அச்சத்தில் தற்கொலை செய்து கொண்ட சம்பவம் அறிந்து அதிர்ச்சியும் வேதனையும் அடைந்தேன்.

எப்படியும் டாக்டராகிவிடுவார் என்று ஆசை ஆசையாய் வளர்த்த அன்பு மகளை, நீட் அரக்கனிடம் பலி கொடுத்து தவிக்கும் கோபிகாவின்…

— Udhay (@Udhaystalin) June 19, 2026

எப்படியும் மருத்துவராகிவிடுவார் என்று ஆசை ஆசையாக வளர்த்த அன்பு மகளை, நீட் அரக்கனிடம் பலிகொடுத்து தவிக்கும் கோபிகாவின் பெற்றோருக்கு எனது ஆறுதலையும் ஆழ்ந்த இரங்கலையும் தெரிவித்துக் கொள்கிறேன்.

‘தகுதி, தகுதி’ என்று கூறி திணிக்கப்பட்ட நீட், வினாத்தாள் கசிவு, ஆள்மாறாட்டம், பயிற்சி மையங்களின் கொள்ளை, அச்சுறுத்தும் தேர்வறை சோதனைகள் என மாபெரும் உயிர்கொல்லும் மோசடியாக மாறியுள்ளது. மோசடியான நீட் தேர்வை ஒன்றிய அரசு ஒழித்தே ஆக வேண்டும்.

கழகத் தலைவர் தலைமையிலான திராவிட மாடல் அரசு, நீட் ஒழிப்பிற்காக எடுத்துள்ள உறுதியான நடவடிக்கைகளையும், சட்டப் போராட்டத்தையும் சமரசமின்றி தொடர்ந்து முன்னெடுக்க வேண்டும்.

இந்த நேரத்தில், நீட் தேர்வுக்குத் தயாராகும் தம்பி, தங்கைகள் தேர்வு மன அழுத்தத்திற்கு ஆளாகாமலும், தவறான முடிவுகளை எடுக்காமலும், தன்னம்பிக்கையுடன் இந்தச் சூழலை எதிர்கொள்ளுமாறு கேட்டுக்கொள்கிறேன்.” என குறிப்பிட்டுள்ளார்.

நீட் மறுதேர்வு – மாணவி தற்கொலை:

சேலம் மாவட்டம் எடப்பாடி அருகே உள்ள வெள்ளாளபுரம் கிராமத்தைச் சேர்ந்த சேகர் – புவனேஸ்வரி தம்பதியின் மகளான கோபிகா, சேலம் கோட்டை அரசு பெண்கள் மேல்நிலைப் பள்ளியில் பன்னிரண்டாம் வகுப்பை முடித்திருந்தார். மருத்துவராக வேண்டும் என்ற இலக்குடன் நீட் தேர்வுக்குத் தயாராகி வந்த அவர், 2025ஆம் ஆண்டு நடைபெற்ற நீட் தேர்வில் பங்கேற்றிருந்தார். ஆனால் குறைந்த மதிப்பெண்கள் பெற்றதால் மீண்டும் தேர்வுக்குத் தயாராகி வந்ததாக கூறப்படுகிறது.

மேலும் படிக்க: தமிழகத்தில் மீண்டும் நீட் பலி.. சேலத்தில் 19 வயது மாணவி எடுத்த விபரீத முடிவு.. கலைந்தது டாக்டர் கனவு!

இந்த நிலையில், தேர்வு நடைபெறவிருந்த சூழலில் வீட்டில் யாரும் இல்லாத நேரத்தில் மாணவி கோபிகா தூக்கிட்டு தற்கொலை செய்து கொண்டதாக கூறப்படுகிறது. இந்த சம்பவம் பெரும் அதிர்ச்சியை ஏற்படுத்தியுள்ளது. நீட் தேர்வை மையமாகக் கொண்டு மாணவர்கள் மன அழுத்தத்திற்கு ஆளாகும் சம்பவங்கள் தொடர்வது கவலைக்குரியதாக மாறியுள்ளது