உண்மைத் தொண்டர்களை எதிரிகளாக பார்க்கும் தலைமை – எடப்பாடி பழனிசாமியை மறைமுகமாக சாடிய சி.விஜயபாஸ்கர்..

அதிமுக உட்கட்சி விவகாரம்:

சட்டமன்றத்தில் தமிழக வெற்றிக் கழக அரசுக்கு சாதகமாக நடைபெற்ற நம்பிக்கை வாக்கெடுப்பின்போது, இந்த தனி அணியைச் சேர்ந்த 25 உறுப்பினர்களும் ஆதரவாக வாக்களித்தனர். இதையடுத்து, அவர்கள் மீது தகுதி நீக்க நடவடிக்கை எடுக்கக் கோரி எடப்பாடி பழனிசாமி தரப்பில் சபாநாயகரிடம் மனு அளிக்கப்பட்டது.

மேலும் படிக்க: காலியான 4 தொகுதிகளுக்கு இடைத்தேர்தல் நடத்த தடைக்கோரி அதிமுக மனு.. நாளை மறுநாள் விசாரணை..

இதற்கிடையில், அதிமுகவிலிருந்து நான்கு எம்எல்ஏக்கள் ராஜினாமா செய்து தமிழக வெற்றிக் கழகத்தில் இணைந்தனர். மேலும், எஸ்.பி. வேலுமணி உட்பட 21 எம்எல்ஏக்கள் மன்னிப்பு கடிதம் எழுதி மீண்டும் எடப்பாடி பழனிசாமி அணிக்கே திரும்பினர்.

ஆனால், அதிமுகவிலிருந்து முன்னாள் நிர்வாகிகள் மற்றும் அமைச்சர்கள் பலரும் விலகி தமிழக வெற்றிக் கழகத்தில் இணைந்து வருகின்றனர். அதிமுக கொள்கைப் பரப்பு துணைச் செயலாளரும் நடிகையுமான கௌதமி கட்சியிலிருந்து விலகுவதாக தெரிவித்திருந்தார். அதேபோல், முன்னாள் அமைச்சர் சி.வி. சண்முகமும் மீண்டும் தலைமைக்கு எதிராக போர்க்கொடி தூக்கியுள்ளார். எடப்பாடி பழனிசாமியை கடுமையாக விமர்சித்துள்ள அவர், விரைவில் செயற்குழுக் கூட்டத்தை கூட்ட வேண்டும் என வலியுறுத்தியுள்ளார்.

எடப்பாடி பழனிசாமியை மறைமுகமாக சாடிய சி. விஜயபாஸ்கர்:

உழைக்கும் உண்மைத் தொண்டர்களை
எதிரிகளாகப் பார்க்கும் தலைமையும்,

கேள்வி கேட்பதையே
குற்றமாகப் பார்க்கும் அரசியலும்..

‘வெற்றிக்கான பாதை அல்ல.’

வரலாறு நினைவில் வைத்திருப்பது
எத்தனை பேரை நீக்கினோம்
என்பதை அல்ல…

எத்தனை பேரை ஒன்றிணைத்தோம்,
எத்தனைக் களங்களை வென்றெடுத்தோம்…

— Dr.C.Vijayabaskar (@Vijayabaskarofl) June 15, 2026

இவ்வாறான பல்வேறு அரசியல் பரபரப்புகள் ஒருபுறம் நடைபெற்று வந்தாலும், முன்னாள் அமைச்சர் சி. விஜயபாஸ்கர் பல நாட்களாக எந்தவித நடவடிக்கையும் மேற்கொள்ளாமல் தனது ஆதரவாளர்களுடன் ஆலோசனையில் ஈடுபட்டு வருகிறார். இந்த சூழலில், அவர் தமிழக வெற்றிக் கழகத்தில் இணைய வாய்ப்பு இருப்பதாக கூறப்படுகிறது.

இந்த நிலையில், முன்னாள் அமைச்சர் விஜயபாஸ்கர், எடப்பாடி பழனிசாமியை மறைமுகமாக விமர்சிக்கும் வகையில் தனது சமூக வலைதளப் பக்கத்தில் பதிவு ஒன்றை வெளியிட்டுள்ளார். அதில், “உழைக்கும் உண்மைத் தொண்டர்களை எதிரிகளாக பார்க்கும் தலைமையும், கேள்வி கேட்பதையே குற்றமாக பார்க்கும் அரசியலும் வெற்றிக்கான பாதை அல்ல. வரலாறு நினைவில் வைத்திருப்பது எத்தனை பேரை நீக்கினோம் என்பதை அல்ல; எத்தனை பேரை ஒன்றிணைத்தோம், எத்தனை களங்களை வென்றெடுத்தோம் என்பதே தான்” என குறிப்பிட்டு, #LeadershipMatters என்ற ஹேஷ்டேக்கையும் பதிவிட்டுள்ளார்.